Rusizi: Imbamutima z’umunyeshuri wirukanywe azira urukundo akimurirwa ahandi

  • BAHUWIYONGERA SYLVESTRE
  • Werurwe 11, 2024
  • Hashize ukwezi 1
Image

Umunyeshuri wirukanywe kuri Koleji ya Nkanka mu Karere ka Rusizi kubera kwizihiza umunsi w’abakundana na mugenzi we w’umunyeshuri w’umukobwa wo kuri icyo kigo, yahawe ikindi kigo.

Tariki ya 19 Gashyantare ni bwo ubuyobozi bwa Koleji ya Nkanka mu Karere ka Rusizi, bwafashe icyemezo cyo kwirukana burundu umusore w’imyaka 22, wigaga mu wa 6 wari watumiye bagenzi be mu isabukuru ye y’amavuko ku wa 14 Gashyantare, byahuriranye n’umunsi w’abakundana (Saint Valentin), muri ibyo birori yerekaniramo umukunzi we wiga mu wa 5.

Uwo musore yongeye kubona ishuri yari amaze ibyumweru 2 mu rugo, yibaza aho azakura irindi cyane ko yari agiye gukora ikizamini cya Leta.

Ni inkuru yagarutsweho cyane, inahuruza inzego zitandukanye, zivuga ko nubwo yakoze ikosa ryo gukorera ibirori bitazwi ku ishuri bitemewe, akanerekaniramo umukunzi we bakanahana impano uwo munsi nk’abakundana bose, bitari kuba impamvu imwirukanisha burundu.

 Bamwe banerura bakavuga ko ubuyobozi bw’iri shuri bwahubutse cyane mu gufatira uyu musore ibyemezo bikarishye gutya, bitajyanye na mba n’uburemere bw’ikosa yavugwagaho, cyane cyane ko abo barikoranye bose nta wundi wari wahanwe atyo.

 Ibyo byatumye ku wa 27 Gashyantare, hateramye inama yigaga kuri iki kibazo, iyobowe n’umuyobozi w’Akarere ka Rusizi wungirije ushinzwe imibereho myiza y’abaturage, Dukuzumuremyi Anne-Marie yahurijwemo n’abarebwa n’iki kibazo bose.

Inama yagaraje ko umuyobozi wa Koleji ya Nkanka Mbonabucya Cyiza Modeste, yafatiye uwo munyeshuri igihano kiremereye ndetse yagifashe wenyine, atagishije inama Akarere nubwo n’amakosa umwana yari yakoze akomeye, ariko iki atari igihano yagombaga gufatirwa, ko ntacyo kimukosoraho ahubwo kimwicira ejo hazaza.

Iyi nama yananzuye ko uyu musore yoherezwa mu ishuri ryisumbuye rya Gishoma, akajya kuharangiriza amashuri ye yisumbuye aba mu kigo, ahagera ku wa 5 Werurwe atangira amasomo bundi bushya.

Aganira n’Imvaho Nshya akigerayo yayitangarije ko yishimiye kwakirwa neza n’umuyobozi w’iryo shuri Mwitaba Anaclet.

Ati: “Nishimiye kongera kwitwa umunyeshuri nyuma y’ibyumweru 2 mu bwigunge, ntazi uko ejo hazaza hanjye hazaba hameze. Nkimara guhamagarwa n’umuyobozi wa ES Gishoma ambwira ko nahawe andi mahirwe akaba ari ho nziga kuko ntari namenye ko hari n’inama yabaye ku Karere inyigaho, numvise mbaye nka ya myaka iba yarishwe n’izuba noneho hakagwa imvura iyihembura.”

Yongeyeho ati: “Niyumvise nk’uzutse kuko numvaga gupfa bindutira kubaho, ariko ubuyobozi bwiza dufite bushishoza, buca inkoni izamba bungarura mu ishuri.

Ibyambayeho nabikuyemo isomo rikomeye cyane ryo kwirinda mu buzima bwanjye kuzongera kugendera mu kigare cyo gukora ibibujijwe, kuko nubwo twabikoze turi benshi, aha mpari jyenyine, abandi bariga, nta witaye ku byanjye.”

Yavuze ko nta rwango cyangwa umwikomo wundi azagirira umuyobozi w’ishuri kandi ko agiye kuzitwara neza.

Ati: “No kuvuga ko naguze amandazi hanze y’ikigo si byo. Twayaguze mu kigo, ariko byose ubwo birangiye neza ndashimira cyane Leta y’Ubumwe bw’Abanyarwanda aya mahirwe yandi impaye. Sinzigera nyapfusha ubusa. Ngiye kwiga cyane, nkomeje n’inzozi zanjye zo kuzaba Ingabo y’Igihugu y’imyitwarire myiza nyuma y’inama zose nagiriwe n’ubuyobozi bushya bw’ishuri ninjiyemo.”

Umuyobozi w’Akarere ka Rusizi wungirije ushinzwe imibereho myiza y’abaturage Dukuzumuremyi Anne-Marie, yatangarije Imvaho Nshya ko uwo mwana Atari buhanwe bene ako kageni.

Ati: “Kwirukana umwana burundu si wo muti, ibihano biri ukwinshi, bidahutaje uburenganzira bwe bwo kwiga.  Iyo agisha inama Akarere mbere yo gufata icyemzo nka kiriya, tukicara tukungurana ibitekerezo, tukanagisha inama izindi nzego, hagafatwa umwanzuro ukwiriye umwana ntaba yarabiguyemo kuriya. Twaboneyeho gusaba abayobozi bose b’amashuri kutazongera kwirukana abana burundu batagishije inama Akarere.’’

Imvaho Nshya yanaganiriye n’umuyobozi w’ishuri ryamwakiriye Mwitaba Anaclet.

Ati: “Umwana twaramwakiriye. Nkurikije uko twaganiriye numvise rwose yarahindutse, igisigaye ni icyo tumutegerejeho. Numva ikosa yakoze ritari iryo kumwirukanisha burundu. Natwe dufite abahungu n’abakobwa 634. Si uko badaca muri ibyo bihe ahubwo tubarinda kubicamo nabi, tutirengagije ko kiriya ari igihe cy’irera rigoye.

Umuyobozi w’Ikigo cya Gishoma Mwitaba Anaclet wakiriye uwo munyeshuri wari warirukanywe
  • BAHUWIYONGERA SYLVESTRE
  • Werurwe 11, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE