Rusizi: Barasaba kubakirwa Ibiro by’Akarere bijyanye n’icyerekezo

  • BAHUWIYONGERA SYLVESTRE
  • Werurwe 21, 2024
  • Hashize ukwezi 1
Image

Abaturage b’Imirenge inyuranye y’Akarere ka Rusizi bavuga ko bakurikije ahandi bagenda mu gihugu, babona Ibiro by’Akarere kabo bitajyanye n’icyerekezo cy’umujyi wabo  utera imbere, bagasaba kubakirwa ibiro bisobanutse.

Ni inyubako yubatswe mbere y’amavugurura y’Inzego z’ibanze yabaye mu 2006, yari igenewe gutangirwamo serivisi zijyanye n’uburezi, muri izo mpinduka Akarere aba ari ho gakorera kugeza n’ubu.

Abaturage bavuga ko nubwo iyo nyubako itajyanye n’icyerekezo kubera ubuto bwayo n’ubwinshi bwa serivisi zihakorera, byasabye ko zimwe zishyirwa mu zindi nyubako, serivisi zitandukanye zigakorera mu nyubako 4 zinyuranye, aho umuturage ashobora kwinjira hamwe akabwirwa ko serivisi ashaka iri mu nyubako yindi iri kure y’iyo yari yabanjemo, na byo ngo bikabagora.

Nyamara ngo bagera ahandi mu gihugu bakabona inyubako z’Ibiro by’uturere zagutse, serivisi hafi ya zose zikorera mu nyubako imwe badasiragira mu zitandukanye, bagasanga umujyi wunganira Kigali utagombye gukorera mu biro nk’ibyo.

Ngizwenayo Sophie wo mu Murenge wa Gihundwe yagize ati: “Ukurikije uko mu tundi Turere bimeze, tutarusha ubukungu aka kacu,  n’umujyi wacu wunganira Kigali kandi rwose unagaragaza impinduka, biriya si Ibiro by’Akarere nk’aka, batwubakire ibiro bigezweho n’ubibonye abone koko bijyanye n’umujyi nk’uyu.’’

Ndayambaje Elie wo mu Murenge wa Kamembe uvuga ko akora ingendo nyinshi mu gihugu abona uko ibindi biro by’Uturere bihagaze.

Meya,Dr Kibiriga Anicet avuga ko iki kibanza ari cyo kizubakwamo Ibiro by’Akarere bishya

Ati: “Hera n’aha hafi yacu i Nyamasheke, Rutsiro, Nyabihu n’ahandi, ukuntu ibiro byatwo bisobanutse kandi bivugwa ko nk’Akarere ka Nyamasheke  ari ko gakennye cyane mu gihugu. Ukurikije amafaranga ari muri Rusizi n’ibindi bikorwa remezo bigaragara, ntidukwiye ibiro nka biriya rwose.’’

Bavuga ko n’iyo basabwa uruhare barutanga ariko bakareka kugenda bubitse imitwe bageze mu tundi turere, kuko basanga nta kibuze ngo baherwe serivisi mu biro bisirimutse nk’ahandi, hakaba n’abadatinya kubigereranya na nyakatsi kuko n’uburyo hasi hameze, nta  makaro, nta n’ikindi cy’isuku isobanutse wabibonamo,hakwiye impinduka.

Karemera Christophe wo mu Murenge wa Bugarama na we ati’: “Iki ni ikibazo twagiye tubaza kenshi ubuyobozi butandukanye bw’Akarere  butubwira ko hagiye kubakwa ibiro bifatika, inyigo yamaze gukorwa n’igishushanyo mbonera gihari, ariko imyaka igiye kuba 15 nta mpinduka. Uko basirimura umujyi n’icyaro banasirimure n’ibiro tureke guherwa serivisi mu mfunganwa.”

Umuyobozi w’Akarere ka Rusizi Dr Kibiriga Anicet, yemeranya n’ibyo bavuga ko Ibiro by’Akarere bitajyanye n’impinduka mu iterambere zikagaragaramo, kuba ari imfunganwa bituma serivisi zimwe zishakirwa mu zindi nyubako.

Ati: “Baravuga ukuri. Umujyi uhindura isura gutya unakwiye kujyana n’Ibiro by’Akarere bisobanutse, bihuza serivisi nyinshi zinyuranye. Bashonje bahishiwe kuko inyigo yarangije gukorwa.

Turateganya kubaka ibiro bishya bigezweho hafi y’aho biriya biri, inyubako zihari zikazasenywa, tukazubaka ibiro by’agaciro hafi miliyari 3 z’amafaranga y’u Rwanda, binafite n’ubusitani bwiza, bugezweho.”

Avuga ko na we aho anyura hose mu Karere, ikibazo cy’inyubako y’Akarere kiri mu byo asanganizwa, ariko babanje gukora ibyo babonaga byihutirwa cyane, birimo ubuhinzi n’ubworozi butanga ibiribwa bihagije, bisagurira n’isoko rigari ry’abaturanyi b’Abanyekongo akarere gafite, kimwe n’ibikorwa remezo nk’imihanda myinshi ya kaburimbo n’ibindi, byose bitwara amafaranga menshi.

  • BAHUWIYONGERA SYLVESTRE
  • Werurwe 21, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE