Rusizi: Bamaze imyaka irenga 20 basaba gare amaso yaheze mu kirere

  • BAHUWIYONGERA SYLVESTRE
  • Gashyantare 8, 2024
  • Hashize amezi 4
Image

Abakoresha umuhanda Kamembe- Bugarama, barataka ko bakeneye gare, kuko ubu aho bashyira imodoka ni mu kibanza cy’abantu ku giti cyabo, isaha n’isaha bahabambura.

Barimo abashoferi b’imodoka zitandukanye, abagenzi n’abatuye Umurenge wa Bugarama, bavuga ko bamaze imyaka irenga 20 basaba gare itegerwamo imodoka zitwara abagenzi, bizezwa buri gihe n’ubuyobozi ko bazayibona, ariko amaso agakomeza guhera mu kirere.

Ikindi kibazo kitoroshye bahura nacyo ni ukuba aho bakorera hatazitiye ntikinagire ubwiherero.

Kuba nta gare kandi biteje akajagari kuko mbere bazitegeraga imbere y’isoko rya Bugarama, ariko n’aho ziri akajagari ngo karushijeho kwiyongera.

Kamoso Jean Pierre wahakoreye igihe kirekire wanabaye mu ba mbere basabye iyi gare yabwiye Imvaho Nshya ko iki kibazo kimaze kurambirana.

Ati: “Ndi mu basabye gare muri 2003, jye na bagenzi banjye kuko natwaraga tagisi isanzwe, duhabwa hariya. Harabangamye cyane kuko ni mu kibanza cy’abantu ku giti cyabo badutije, bashobora gusubirana umwanya uwo ari wo wose bakahakorera imishinga yabo yindi”.

Yongeyeho ati: “Nta bwiherero buhari, ntihazitiye, kiri hamwe na banki ya BK na sitasiyo ya lisansi, ni igitaka kiri aho gusa kuko nta kindi hakorerwa, n’abashoferi bashatse kwishyira hamwe ngo bubake ubwiherero barabyangirwa kuko ba nyira cyo badashaka ko hari uhashyira ibiramba kandi bakitwambura umwanya uwo ari wo wose.”

Yarakomeje ati: “Usanga abana bataye amashuri n’abayasibye ari ho baruhukira kuko ni iruhande rwa rond point ya Bugarama, biruka ku modoka zije, bashaka kugurisha ibigori, avoka n’ibindi bacuruza.”

Makuza Anastase, utwara Caoster na we ati’’ Wowe se urabona biriya ari byo? Dukeneye gare byihutirwa ahubwo. Hariya ni mu muhanda si muri gare. Ntitugira aho twiherera, imidoka ni nyinshi,n’abantu ni benshi, ntibagira aho bicara batega imodoka kandi hahurira izituruka i Burundi, RDC no mu Rwanda”.

Umunyamabanga Nshingwabikorwa w’Umurenge wa Bugarama, Nsengiyumva Vincent de Paul, na we avuga ko ari kimwe mu bibazo bihangayikishije cyane ubuyobozi n’abaturage b’uyu Murenge.

Ati: “Iriya si gare ni aho kwifashisha, ariko nk’uko babivuga, irakenewe cyane n’ubuyobozi budukuriye burabizi. Hari urujya n’uruza rw’abaturage mpuzamahanga ruhagera, gutega cyangwa kuva mu modoka ugasanga ni akajagari gasa, imbere ya banki na sitasiyo ya lisansi.

Babuze aho berekeza Yavuze ku ngorane zo kuba imbere haparitse amakamyo menshi na yo babuze aho bayerekeza kuko nta na parikingi […] nk’ubuyobozi ntacyo bitumariye kuko ntibitwinjiriza, gusa muri raporo dukora n’inama n’ubuyobozi budukuriye turabivuga, dutegereje igisubizo.

Umuyobozi w’Akarere ka Rusizi wungirije ushinzwe iterambere ry’ubukungu, Ndagijimana Louis Munyemanzi, na we yemera ko ari kimwe mu bibazo bikomeye cyane aka Karere gafite, ariko nta ngengo y’imari ihari.

Ati: “Turakizi, ni icyifuzo abaturage ba hariya n’abakoresha uriya muhanda bamaranye igihe kirekire, twanagishyize mu igenamigambi ry’Akarere ariko tubura ingengo y’imari yo gutangira gukora inyigo yayo, kimwe na parikingi kuko nk’uko babivuga,usanga koko uburyo imodoka ziparika hariya buteye ikibazo.”

Avuga ko ubuyobozi bw’Akarere ka Rusizi bukomeje gukomanga hirya no hino ngo burebe ko haboneka abafatanyabikorwa bayubaka, ariko igitekerezo kirahari ngo barebe hagati ya gare na parikingi icyaba nibura kibanje kuko byombi bihakenewe cyane.

  • BAHUWIYONGERA SYLVESTRE
  • Gashyantare 8, 2024
  • Hashize amezi 4
TANGA IGITEKEREZO
lg says:
Gashyantare 10, 2024 at 6:31 am

icyo ubundi nticyakabaye ikibazo cya Karere gutwara abantu nubucuruzi nkubundi ucuruza niwe umenya aho acururiza ishyirahamwe ryabo rimaze iki niba batabishoboye nibabimbe mbikore ubutaka ndabufite buhagije, kubaka nzabikora Banki zirahari na Karere kazantere inkunga nibyanga nzashaka uwo tubikorana

Andika igitekerezo

AMATEGEKO AGENGA IYANDIKA RY'IGITEKEREZO CYAWE