Rusizi: Bagenda ikilometero n’igice bikoreye imiti ku mutwe

  • BAHUWIYONGERA SYLVESTRE
  • Gashyantare 20, 2024
  • Hashize amezi 2
Image

Abakozi b’Ikigo Nderabuzima cya Nkaka mu Karere ka Rusizi, babangamiwe n’uko bagenda igihe kirenga igice cy’isaha bikoreye imiti ku mutwe aho baterwa impungenge z’uko ishobora kwangirika, kubera ububi bw’umuhanda Gihundwe-Rwahi-Nkanka.

Uyu muhanda w’ibilometero bigera kuri bitandatu uva mu Kagari ka Burunga, Umurenge wa Gihundwe ahagarukira umuhanda wa kaburimbo, ariko agace ka Rwahi-Nkanka kareshya n’ikilometero n’igice  ni ko kabangamye cyane kuri iryo vuriro n’abarigana.

Kubera imvura nyinshi imaze iminsi igwa, uwo muhanda warangiritse ku buryo uba unanyerera mu gihe cy’imvura, ku buryo iyo imodoka izanye imiti igeze aho kaburimbo igarukira isiga imiti aho, ubundi abaganga bo ku Kigo nderabuzima cya Nkaka bakazana n’abaza kuyikorera.

Umuyobozi w’Ikigo Nderabuzima cya Nkaka Ntamarengero Jean Claude, yavuze ko bagorwa  no gukura imiti kuri kaburimbo bayigeza ku Kigo Nderabuzima kubera ko imodoka idashobora kuhagana.

Ati: “Buri kwezi  Farumasi y’Akarere ituzanira imiti, hakaba ubwo ishize kare bikaba ngombwa ko ari twe tuyisaba tukajya kuyizanira. Iyo tuyizaniye bisaba moto, Farumasi y’Akarere yayizana igakoresha imodoka. Yaba moto yaba imodoka ntibirenga hariya twababwiye.

Icyo gihe dufata umuzamu wacu n’undi muntu umwe cyangwa tugafata babiri, bakajya kuyikorera ku mutwe tukabishyura. Ayo mafaranga agenda atarateganyijwe aba ari menshi.”

Akomeza avuga ko uretse icyo kibazo, n’abarwayi barembye cyangwa ababyeyi bari ku nda bagiye kujyanwa ku Bitaro bya Gihundwe bisaba ko bava ku Kigo Nderabuzima n’amaguru cyangwa bahetswe mu ngobyi, bakagera kuri kaburimbo aho basanga imbangukiragutabara.

Ubuyobozi bw’ikigo Nderabuzima cya Nkanka buvuga ko ububi bw’umuhanda bubangamira cyane abarwayi n’abagore bari ku nda.

Ntamarengero avuga ko gusanga imbangukiragutabara mu kilometero n’igice ari ikibazo gikomereye abarwayi n’ababaheka mu ngobyi.

Ati: “Hano twaragowe bitavugwa. Iyo twatumije imbangukiragutabara igomba kugira uwo ijyana ku Bitaro bya Gihundwe imvura ikagwa, icyo gihe tubwira nyir’umuntu agashaka abahetsi mu giturage, bakamushyira mu ngobyi bakamugeza aho iyo mbangukiragutabara itarenga.”

Mu gihe cy’imvura uyu muhanda uba unyerera cyane ku buryo abawugendamo bikoreye imiti cyangwa bahetse abarwayi bibagora cyane

Avuga ko ibi bifite ingaruka kuko uburyo haba hanyerera cyane nk’umwe mu bahetse umurwayi ashobora kunyerera akamukubita hasi.

Ati: “Ari nk’umugore uri ku nda ashobora gupfana n’uwo agiye kwibaruka, bikaba bibi cyane nk’iyo imvura igwa nijoro kuko haba ari no mu kizima n’abahetsi babaye bake.”

Asaba ko hagira igikorwa ako gace kameze nabi kagakorwa, kuko kabangamiye cyane abagana iki kigo nderabuzima.

Mukayisenga Ernestine umwe mu baturanyin’icyo Kigo Nderabuzima, avuga ko hari igihe umubyeyi afatwa n’ibise nijoro, imvura yakuba akumva kubyarira mu rugo bimurutira kujya ku kigo nderabuzima.

Ati: “Rwose dukeneye ko uyu muhanda ukorwa. Perezida wacu Paul Kagame ntacyo atadukoreye ariko abamuhagarariye muri aka Karere bakwiye gutekereza kuri uyu muhanda, cyane cyane kino gice kinyerera cyane kigera ku kigo nderabuzima.”

Habimana Athanase ukorera kuri Poste de Santé ya Rweya, na we avuga ko ububi bw’uyu muhanda babubonera ku buryo kubona imiti bibagoye.

Ati: “Birababaje cyane rwose. Twumva ngo bagiye kuwushyiramo kaburimbo, ariko ntituzi niba izakomeza ikagera ku Kigo Nderabuzima cya Nkanka. Batayihagejeje n’ubundi ntacyo baba bakoze kuko igice kibangamiye abaturage ntibaba bagikoze. Gusa ntituramenya aho kaburimbo izagarukira nibawukora, ariko itanahageze ako gace kagashyirwamo latelite nziza byafasha cyane.”

Bavuga ko ikibazo kitari ku kwivuza gusa kuko n’ubuhahirane n’Umujyi wa Rusizi buhazaharira, kandi wari ufite amahirwe yo kwegera umujyi, ariko umuhanda mubi ugatuma ayo mahirwe atabyazwa umusaruro.

Umuyobozi w’Akarere ka Rusizi Dr Kibiriga Anicet, abizeza ko uyu muhanda uzatangira gushyirwamo kaburimbo muri uyu mwaka.

Ati: “Amafaranga arahari, uyu mwaka uriya muhanda uzashyirwamo kaburimbo kugera ahitwa ku Busekanka ujya ku Nkombo.  Ibyo bibazo rero turabizi ariko ni iby’igihe gito kuko dutekereza ko iyo kaburimbo izabikemura.”

Uyu muhanda Gihundwe-Rwahi-Busekanka, uvuzwe igihe kirekire abayobozi b’Akarere bizeza abaturage kuwukora amaso agahera mu kirere.

Abaturage basaba Akarere kubasobanurira niba n’ako gace kerekeza ku Kigo Nderabuzima kazajyamo kaburimbo cyangwa niba itazahagera kuko babyumvaho amagambo anyuyanye.

  • BAHUWIYONGERA SYLVESTRE
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE