Rusizi: Abarwayi b’umusipa 50 bavuwe n’inzobere z’abaganga b’Abadage

  • BAHUWIYONGERA SYLVESTRE
  • Werurwe 2, 2024
  • Hashize amezi 2
Image

Ku bufatanye na Minisiteri y’Ubuzima MINISANTE, kuva ku wa 26 Gashyatare kugera ku wa 1 Werurwe2024, inzobere z’abaganga b’Abadage zari mu bitaro bya Gihundwe mu gikorwa cyo kubaga  indwara y’umusipa (Hernie/Hernia), cyarangiye habazwe abarwayi 50.

Ubuyobozi bw’ibyo bitaro burasaba abaturage kwisuzumisha no kwivuza iyo ndwara hakiri kare, badategereje kuremba kuko ari indwara mbi cyane, benshi bashobora kumarana igihe batazi ko ari yo barwaye, bakazibuka kugana muganga barangiritse bikabije.

Umusipa ni indwara ikunze kwibasira abakora imirimo y’ingufu nko guterura no kwikorera ibiremereye cyane n’ibindi, bigatuma bimwe mu bice by’umubiri, cyane cyane ibyo mu nda biva mu mwanya wabyo nk’amara akamanuka ajya mu mayasha no mu ntantu.

Ni igikorwa cyari kibaye ubwa mbere muri ibi bitaro, nk’uko Imvaho Nshya yabitangarijwe n’Umuyobozi wabyo Dr Mukayiranga Edith, cyanagaragaje uburemere bw’iyi ndwara muri kano karere, kuko gusuzuma bakanavura abarwayi 50 mu minsi 5 gusa, atari igikorwa cyoroshye aho hanagaragaye abari bayimaranye igihe kinini kubera kutayivuza.

Umuforomo ku bitaro bya Gihundwe wakoranye n’abo baganga b’Abadage, Uwamahoro Floribert yavuze ko muri bariya 50 bavuwe harimo ab’igitsina gore 3, iyi ndwara ngo nubwo yibasira cyane abagabo hari n’abagore bayirwara.

Ikibazo gikomeye babonye akaba ari uko hari abatayivuriza igihe bakagita muri ba magendu cyangwa mu byumba by’amasengesho, bamwe bayitiranya n’amarozi, bakazajya kuyigeza kwa muganga hari bimwe mu bice by’umubiri byangiritse kandi iyo ivurwa kare yari gukira byoroshye.

Ati’’ Mu banyarwanda hakunze kubaho rimwe na rimwe gusuzugura uburwayi, umuntu yaba agenda yumva ntaho aribwa akibwira ko atarwaye kandi ubu burwayi burazahaza cyane, nyamara buvurwa na mituweli.’’

Yongeyeho ati’’ Icyo twabonye ni uko indwara bazitindana kubera kudasobanukirwa uburwayi ubwo ari bwo. Hari abitiranya umusipa n’imisuha kandi benshi mu giturage bavuga ngo imisuha barayiroga, bakayitiranya n’amarozi.

Ugasanga amariye kwa magendu ibyakayimuvuje neza, cyangwa akamara igihe mu byumba by’amasengesho bamubwira ngo ni abadayimoni bamufashe, akazajya kugana muganga yarangiritse cyane, kuko hari n’abarwara baryama gato bakumva byoroshye, bakagira ngo bakize, kandi bativuje.’’

Anavuga ko Imirenge nka Nkombo, Kamembe, Bugarama, Gihundwe, Gikundamvura na Giheke ari yo babonyemo abarwayi benshi, bigaragara ko bayikinisha ntibayivurize igihe nubwo no mu yindi Mirenge ihari.

Yabasabye kujya bagana muganga kare cyane cyane bo ko banegereye ibitaro.

Safari Jean w’imyaka 43, wo mu Murenge wa Nkombo, avuga ko ayimaranye umwaka n’ukwezi, ubwo yayumvaga bwa mbere yagiye ku kigo nderabuzima cya Nkombo asanga umuganga wari wamubwiye kumurebera ikibazo afite ataje, arabyihorera ntiyasubirayo.

Ati: “Nabanje kumva ari ibintu byoroshye ariko uko iminsi yagiye ihita nagiye mererwa nabi cyane, ku buryo nari nsigaye no kugenda ntakibishobora kandi ndya ariko uko nahagurutse nkora ibiraka by’ubuhinzi, kwikorera, kwasa inkwi n’ibindi kugira ngo abana banjye 6 babashe kubaho. [….] Ndashimira abaganga banyitayeho bakambaga,kuko ubu numva imisonga yose yashize.’’

Ndahimana Ephraim w’imyaka 70, avuga ko yamenyeye iwabo ku kigo nderabuzima cyo mu Murenge wa Mubuga mu Karere ka Karongi ko ari yo afite, aza i Kamembe gukora imirimo y’ingufu irimo kwikorera ibitoki n’ibindi ngo azabone ayo yivuza, ariko ngo yari ageze ubwo atagihaguruka.

Ati: “Nageze ubwo mu ntantu hazamo ikintu kibyimbye cyane, naryama bikoroha, bigeraho numva biranze no kugenda  ntakibishobora kuko nari mbimaranye imyaka 2 yose. Sinari nzi ko bivurwa kuri Mituweli. Namenye ko aba baganga baje ndaza, bamaze kukibaga, ndumva natangiye kumererwa neza, ndabashimira cyane.’’

Umuyobozi Mukuru w’ibitaro bya Gihundwe Dr Mukayiranga Edith, asaba abaturage kugira umuco wo kwisuzumisha no kwivuza hakiri kare

Umuyobozi Mukuru w’ibitaro bya Gihundwe Dr Mukayiranga Edith, yashimiye cyane MINISANTE yateguye iki gikorwa kihabereye bwa mbere, n’izi nzobere uburyo zitanze zikavura abangana kuriya.

Ati: “Batugiriye akamaro cyane kuko banaduhuguriye muri iyi minsi 5 yose abaganga bacu 2, bagiye kujya babaga iyi ndwara, kuko ntawuyikira atabazwe.”

Yunzemo ati: “Twari dufite umuganga w’inzobere umwe udahoraho, uza 2 mu cyumweru kandi uwo ntiyabaga ababikeneye bose ngo abarangize. Ubwo twangutse abandi 2 babisobanukiwe mu bakozi bacu, izi nzobere zizanadusigira bimwe mu bikoresho twaburaga, tugiye kujya duha iyi serivisi benshi bayikeneye,kuko twabonye ko iki kibazo muri aka Karere gihari cyane, kigomba kwitabwaho.’’

Yavuze ko iyi ndwara ari mbi cyane kuko iryana mu buryo bukabije, ifata cyane cyane abakora imirimo y’ingufu nko guterura no kwikorera ibiremereye cyane, kubaza n’ibindi, akaba ari yo mpamvu yibasira abagabo cyane, igatuma bimwe mu bice by’umubiri, cyane cyane ibyo mu nda biva mu mwanya wabyo,bikajya mu wundi mwanya bitateganyirijwe,kuko byahabonye intege nke.

Ugasanga nk’amara yaramanutse ajya mu mayasha no mu ntantu ku bagabo, ku bagore bakabyumvira mu matako,ari yo mpamvu uwumvise ibidasanzwe mu mubiri we asabwa kwihutira kugana muganga.

Ati’’ Bigira ingaruka zikomeye cyane kuko hari igihe bijya aho bitari biteganirijwe, buhoro buhoro uko umuntu agenda yikubaganya bikaba byafunga, bikanagera igihe bibora kuko hari abo dusanga byaraboze,cyangwa amara yarinjiye mu bindi bice by’umubiri,kikaba ikibazo.’’

Ikindi ni uko umurwayi uzajya avurwa hakoreshejwe ibikoresho bizasigwa n’izo nzobere, iyo serivisi izajya itangirwa ubuntu, ibyakoreshejwe ibikoresho bisanzwe akaba ari byo mituweli cyangwa ubundi bwishingizi bwishingira.

Bamwe mu babazwe bavuga ko bari bageze igihe no kugenda byanga
  • BAHUWIYONGERA SYLVESTRE
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE