Rubavu: Iduka rimwe ricuruza udukingirizo ntabwo rihagije

  • NTAWITONDA JEAN CLAUDE
  • Werurwe 12, 2024
  • Hashize ukwezi 1
Image

Abaturage bo mu Karere ka Rubavu by’umwihariko urubyiruko, barasabirwa kongererwa amaduka y’udukingurizo dutangirwa ubuntu mu rwego rwo kubarinda ubwandu bushya.

Ubuyobozi bw’ibitaro bya Gisenyi bwemeza ko kugira iduka rimwe ritanga udukingirizo mu Mujyi wa Rubavu  ridahagije kuko iyo serivisi ikenerwa n’abantu benshi. 

Byagarutsweho nyuma y’ubukangurambaga bwakozwe n’Umuryango Nyarwanda w’Abafite virusi itera SIDA (RRP+) bugamije gukumira ubwandu bushya.

Simbizi Abdul Hakim, umwe mu bafite virusi itera SIDA, ashima Leta yashyizeho imiti kuko byamurinze ibyuririzi aho we yanduye Virusi Itera SIDA muri 1987 ariko kuri ubu akaba akomeye kubera gufata neza imiti no kugendera ku mabwiriza ahabwa na muganga.

We n’abandi baturage bavuga ko Umujyi wa Rubavu ugendwa n’abantu benshi, ukaba ufite n’umwihariko wo guturira umupaka bityo hakwiye kongerwa ahatangirwa udukingirizo.

Agira ati: ”Kugira ngo ubwandu bugabanyuke ni uko hahoraho inyigisho, turasaba ko ingamba zo kugeza udukingirizo ahantu hose zakongerwamo imbaraga kugira ngo urubyiruko ruri mu byago byinshi byo kwandura rwirinde ndetse n’inyigisho zongerwe.”

CSP Dr Tuganeyezu Oreste Umuyobozi Mukuru w’Ibitaro bya Gisenyi, yemeza ko iki kibazo cyo kugira iduka rimwe ricuruza udukingirizo ku buntu bakizi ndetse bakomeje kwiga ku  cyakorwa ngo twongerwe.

Agira ati: “Ku dukingurizo, turi kwigisha abaturage ngo bareke kugira isoni badukoreshe turahari. Muri  Rubavu dufite iduka rimwe badusangamo ku buntu, turi gushaka uko amaduka yaba menshi agashyirwa ahantu hatandukanye hahurira abantu benshi.

Turi kwiga uko umurwayi ugeze ku kigo nderabuzima cyangwa ku ivuriro ashaka izindi serivisi yajya asaba udukingirizo two gutahana yakwifashisha bibaye ngombwa, amahoteli tugiye kureba ko yose twaba turimo aho tutari dushyirwemo.”

Mukakibibi Perus Umuyobozi ushinzwe gukurikirana abafite VIH/SIDA muri RRP+ ishami rya Rubavu, ashima Leta aho igeze yita ku bafite iyo virusi ariko na we agasaba ko ahaboneka udukingirizo hakongerwa mu Mujyi wa Rubavu. 

Agira ati: ”Uyu mujyi wacu ugira urubyiruko rwinshi rusohoka, buri gihe bashobora gucikwa bakaba bahuye n’ubwandu. Hari abanyamahanga, hari abarobyi, hari abatwara amakamyo yambuka umupaka abo bose bashobora gukwirakwiza ubwandu, ariko udukingiriro tubaye twinshi byadufasha cyane.”

Uyu muyobozi wemeza ko urubyiruko rufite ibyago byinshi byo kwandura ubwandu bushya arushishikariza kwitwararika no kutirara ahubwo bakabyaza umusaruro ingamba zashyizweho.

Minisiteri y’Ubuzima iherutse gutangaza ko icyerekezo cy’umwaka wa 2030 abantu bazaba batacyandura SIDA, bikaba  n’imwe mu mpamvu zituma ingamba z’ubwirinzi zirushaho kongerwa.

  • NTAWITONDA JEAN CLAUDE
  • Werurwe 12, 2024
  • Hashize ukwezi 1
TANGA IGITEKEREZO
Twitter says:
Werurwe 13, 2024 at 10:50 am

Ndumva
rubavu udukingirizo batugura nkabaragura amasuka ndumva hameze nko mukarere ka bugesera mumurenge wa ririma reziyeri no mumurenge wa juru ahitwa mukabagore hino ya ka bukuba .

Andika igitekerezo

AMATEGEKO AGENGA IYANDIKA RY'IGITEKEREZO CYAWE