Rubavu: Hari abagurisha muri RDC amashyiga bahabwa kuri Nkunganire ya Leta  

  • Imvaho Nshya
  • Ugushyingo 15, 2023
  • Hashize amezi 4
Image

Ubuyobozi bw’Akarere ka Rubavu bwemeje ko nubwo abaturage banyuzwe na Nkunganire ku mashyiga avuguruye bahawe na Leta y’u Rwanda, hari abagenda bafatwa bashaka kuyagurisha muri Repubulika Iharanira Demokarasi ya Congo (RDC).

Ubuyobozi bw’aka Karere buvuga ko hafashwe ingamba zo gukumira ibyo bikorwa bitemewe nyuma yo kumenya ko abo baturage banyuzaga ayo mashyiga avuguruwe mu nzira zitemewe.

Ibi byatangajwe mu bukangurambaga bwakozwe n’Ikigo cy’Igihugu gishinzwe Ingufu (REG) mu mushinga wa Leta y’u Rwanda watewe inkunga na Banki y’Isi binyuze muri Banki y’u Rwanda y’Amajyambere (BRD).

Ni umushinga washyiriweho gufasha ingo zirenga 500,000 kubona uburyo bwo gucana bwizewe kandi butangiza ibidukikije cyangwa ngo bugire ingaruka ku buzima.

Ishimwe Pacifique, Umuyobozi w’Akarere ka Rubavu wungirije ushinzwe imibereho myiza y’abaturage, yavuze ko bigeze gufata abaturage bagera kuri babiri bagurishije mu gihugu cy’abaturanyi amashyiga bahawe kuri Nkunganire ya Leta.

Avuga ko akenshi ababikoraga bari abo mu Mirenge ikora ku mupaka uhuza u Rwanda na RDC ariko kuri ubu hafashwe ingamba.

Agira ati: “Hamenyekanye inzira abaturage banyuzagamo amashyiga harimo mu kibaya gihuza u Rwanda na RDC, hari amasoko baremaga hakurya muri RDC. Kuri ubu turagenzura kubera ko abahawe amashyiga bazwi hari ahantu baba banditse imyirondoro yose ku buryo dukora umukwabu kenshi tureba niba bagifite amashyiga bahawe kandi bayakoresha neza icyo yagenewe.”

Yakomeje agira ati: “Icyo dusaba abaturage ni uko babyaza umusaruro amahirwe bahabwa n’ubuyobozi bwiza bw’Igihugu cyane nk’iyo Nkunganire yaje ikenewe cyane.”

Uyu Muyobozi kandi avuga ko kuva abaturage batangira kugezwaho iyi Nkunganire yagiye ibagurirara umumaro ndetse n’ibidukikije bikomeje kubungabungwa.

Ubuyobozi bwa REG buvuga ko iyi gahunda imaze kugera henshi mu gihugu kandi yishimirwa n’abaturage cyane ko yaje ari igisubizo, ariko abo baturage bagurisha amashyiga bahawe na Leta mu gihugu cy’abaturanyi baba barimo guhombya Igihugu kibagenera ibyiza.

Karera Issa umukozi ushinzwe ubukangurambaga muri EDCL/REG ashima uburyo abaturage batuye mu Karere ka Rubavu bafite inyota yo gukoresha amashyiga avuguruye, aboneraho kwamagana abafite ingeso yo kuyagurisha.

Agira ati: “Ikibazo cyo kugurisha amashyiga avuguruye atangwa kuri Nkunganire tugisanga ahantu hose ariko abaturage batishoboye kubera ubuzima basanzwe babamo usanga bakunze kugurisha ikintu cya Nkunganire no muri Girinka. Byagiye bibaho, turi gukorana n’Inzego z’ibanze haba mu kwigisha abaturage no kubakurikirana umunsi ku munsi, tunakomeza ubukangurambaga kuko amashyiga iyo agurishijwe rwiyemezamirimo abura raporo agahomba, Igihugu kigahomba kuko kitageze ku ntego zacyo.”

Yashishikarije abaturage bose kwitabira gahunda ya rondereza kuko itanga inyungu haba ku kuzamura ubukungu bw’uyikoresheje ubona uko yizigamira akiteza imbere ndetse n’ubuzima bwe bukarushaho kuba bwiza kuko butazengerezwa n’imyotsi.

Nyirarukundo Francoise utuye mu Mudugudu wa Kabashara, Akagari ka Rushubi, Umurenge wa Rugerero, Akarere ka Rubavu, ashima gahunda ya Nkunganire ku mashyiga kuko imufasha guteka neza kandi heza, bikamuha amahirwe yo gukora n’indi mirimo.

Agira ati: “Mbere wasangaga duhura n’ibihombo byo gukoresha inkwi nyinshi zikadutwara amafaranga menshi bikagusaba kwicara hamwe ugateka nta kundi wakora, ariko ubu byarahindutse. Naguraga amakara nk’ay’ibiumbi 10 akamara icyumweru ariko inkwi z’amafaranga 1500 ziramfasha mu cyumweru nkizigamira nkiteza imbere.”

Uyu mugore yasabye abagurisha amashyiga kwisubiraho, agira ati: “Twamenye ko hari abagurisha amashyiga, kugurisha inkunga wahawe ni ikosa rikomeye ribuza abandi amahirwe. Tubasaba kwisubiraho kuko ujya kugera i Goma ukabona amashyiga ameze nk’ayo twahawe mu Rwanda bisubireho.”

Ubuyobozi bwa REG butangaza ko gahunda yo kugeza ku Banyarwanda amashyiga avuguruye yaje igamije gufasha mu kubungabunga ibidukikije, kurwanya imyuka ihumanya abantu n’ikirere.

Ariko yatangiye igera ku baturage hagendewe ku byiciro by’ubudehe ariko ubu byavuyeho hari gahunda nshya igamije gufasha abaturage kubona amashyiga hatendewe ku byiciro. Hagiye gushyirwaho gahunda yo kuringaniza Nkunganire ku buryo buri Munyarwanda wese azibonamo.

  • Imvaho Nshya
  • Ugushyingo 15, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE