RRA  yatangije uburyo bushya bworoshya gutanga imisoro 

  • ZIGAMA THEONESTE
  • Ukuboza 6, 2023
  • Hashize amezi 6
Image

Ikigo cy’Igihugu cy’Imisoro n’amahoro (RRA) cyatangije uburyo bushya bwo kwishyura  imisoro (MyRRA) bugamije koroshya inzira z’ikoranabuhanga abasora banyuragamo batanga imisoro.

Komiseri Mukuru  wa RRA Bizimana Ruganintwali Pascal, yagaragaje ko MyRRA ari uburyo bushya bwo  gusora  gusa budasimbura ubwari buriho ariko ko bugamije korohereza abasora, bajyaga bagorwa n’inzira ndende mu ikoranabuhanga mu gihe cyo gusora.

Yagize ati: “Biriya byose twasanze bivuna abasora. Niba ushaka gukora amasezerano ashingiye ku bugure bw’ikinyabiziga cyawe, wazaga ukinjira muri sisitemu kugira ukore ibyo washakaga gukora, niba ushaka gutanga imisoro yeguriwe inzego z’ibanze  wazaga ukinjira muri sisitemu yabo. Ibyo byose twasanze bishobora guca n’intege abantu tubona rero ari byiza kugira ngo tworohereze abasora kugira batange imisoro byihuse.”

RRA ivuga ko ubu buryo bushya bworohereza abasora kumenya amakuru ajyana n’imisoro ku buryo niba habonetse ibibazo umuntu ukigize ku misoro akurikirana byihuse kuko ari sisitemu ihuriza hamwe ubwoko bw’imisoro butandukanye.

Komiseri Ruganintwali yagize ati: “Ni ikintu rero gikomeye kuko uyu munsi hari abantu bajyaga mu birarane by’imisoro ibihano bikiyongera ugasanga turi kumwishyuza  n’umusoro atibukaga cyangwa atarazi.”

Yakomeje agira ati: “Icyiza rero ni uko azajya amenyera amakuru ku gihe imisoro yagombaga kumenyekanisha ayimenyekanishe, ibyo atamenyekanishije amenye ko igihe cyarenze cyangwa se yaba yishyuye umusoro akabibona ko nta deni agifite”.

Umuyobozi Mukuru w’Agateganyo w’Urugaga rw’Abikorera (PSF) Jeanne Françoise Mubiligi, yavuze ko ubwo buryo bushya RRA yazanye bufitiye akamaro abikorera benshi bajyaga  bahanirwa ubukererwe bw’imisoro n’ibindi bishingiye ku kutamenya amakuru ajyanye n’imisoro basabwa.

Yagize ati : “Nk’abikorera rero twebwe turabibonamo inyungu cyane hari umwanya ugabanyuka wo kwinjira muri sisitemu ureba imisoro ndetse no kuba ibihano byaganyuka.”

Yongeyeho ati: “Aha rero turabibonamo inyungu cyane cyane kuri bizinesi nshyashya hari ubwo batangira ariko ntibamenyeshe imisoro, hari aho twajyaga duhura n’abantu bavuga ko bahanwe, ubu rero biramufasha kumenya imisoro asabwa.”

RRA yagaragaje ko mu kwinjira  muri iyi sisitemu nshya yo gusora ya MyRRA ari  ugukoresha uburyo busanzwe bwa sisitemu ya E-Tax.

Icyakora  ku barimo kwinjira bashyashya RRA ivuga ko ushaka kwinjiramo abanza gukanda aho biyandikishiriza akamenyesha RRA kugira ngo imwandike muri ubu buryo.

MyRRA  igenewe abantu giti cyabo n’ibigo banditswe ko basora umusoro ku nyungu, akaba ari uburyo bushya bwatangirijwe i Kigali ku wa Kabiri tariki ya 5 Ukuboza 2023.

  • ZIGAMA THEONESTE
  • Ukuboza 6, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE