Rotary Club Kigali Mont Jali yabonye umuyobozi mushya ahigira kongera abanyamuryango

  • Imvaho Nshya
  • Nyakanga 7, 2023
  • Hashize amezi 11
Image

Mu mugoroba wo kuri uyu wa Kane taliki 06 Nyakanga 2023, Amb. Habyarimana Jean Baptiste wari umaze umwaka ayobora Rotary Club Kigali Mont Jali yasimbuwe na Murekatete Clementine ugiye kuyiyobora kugeza mu 2024.

Murekatete na bagenzi be bahize ko bazinjiza abanyamuryango 15 bashya, kwishyurira abatishoboye ubwisungane mu kwivuza no gutanga umusanzu ku Kigo cy’abana bafite Autisme.

Yagize ati:  “Ingamba nshya dushaka gukora n’itsinda ryanjye ni ukubaka kiriya kigo cya Autisme, ikindi ni ukugira ngo tugire abanyamuryango benshi kuko iyo mufatanije muri benshi mugera ku bintu byinshi”.

Yongeraho ko bazatanga umusanzu kandi bagafatanya na Fondation ya Rotary International.

Murekatete Clementine yabaye umuyobozi mushya wa Rotary Club Kigali Mont Jali asimbuye Amb Habyarimana J.Baptiste wari umaze umwaka ayiyobora

Agaragaza ko Rotary Club zo mu bindi bihugu ziza bagafatanya kubaka amashuri, gutanga amazi ibyo byose ngo bazakomeza babikorane na bo.

Agira ati “Ikintu kiri hafi cyane ku mutima n’ibyo ngibyo by’abaturage badafite mituweli, turagerageza buri mwaka, n’ubundi tuzakomeza dukore”.

Mu burezi, Murekatete avuga ko bazakomeza gufashanya kugira ngo barebe ko batera imbere.

Amb. Habyarimana Jean Baptiste ucyuye igihe yagaragaje bimwe mu bikorwa bakoze 2022-2023.

Yavuze ko hakoreshejwe miliyari 2 mu mishanga itandukanye.

Ku bufatanye na Rotary International hazanywe abaganga 4 bakorera mu bitaro bya Gisirikare i Kanombe (Rwanda Miltary Hospital) bavura abarwayi 50.

Binjije abanyamuryango bashya 10 barimo abagabo 6 n’abagore 4.

Murekakate Clementine yavuze ko bazongera umubare w’abanyamuryango bakanishyurira mituweli imiryango itishoboye

Batanze imashini zidoda 50 muri gereza ya Nyamagabe, Musanze na Rubavu.

Amb. Habyarimana avuga ko bagobotse abaturage bagizweho ingaruka n’ibiza bakoresha amafaranga angana na 1,185,000.

Mu minsi mikuru by’umwihariko kuri Noheli, Rotary Club Kigali Mont Jali isangira n’abana bafite ubumuga, bagasura abo mu bigo by’imfubyi.

Mu Karere ka Rutsiro mu Ntara y’Iburengerazuba Rotary Club Kigali Mont Jali yubatseyo Urugo mbonezamikurire y’abana bato (ECD).

Yanditswe na KAYITARE JEAN PAUL

  • Imvaho Nshya
  • Nyakanga 7, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE