RICA irasaba abaturage kwirinda ubuzunguzayi bw’inyama

  • KAMALIZA AGNES
  • Mutarama 18, 2024
  • Hashize ukwezi 1
Image

Ikigo cy’Igihugu gishinzwe Ubugenzuzi bw’Ubuziranenge, Ihiganwa mu bucuruzi no kurengera Umuguzi (RICA), kirasaba abaturage kwirinda ubuzunguzayi bw’inyama no kuzicururuza ahatarabugenewe kuko bishyira mu kaga ubuzima bw’abazigura.

Ni mu gihe bamwe mu batuye mu bice by’Amajyaruguru y’u Rwanda bo bavuga ko hari inyama ziba zihenze mu mabusheri nk’amafi n’izindi, bagahitamo kuzigura make mu dusoko two mu makaritsiye.

RICA yo ivuga ko bidakwiye ko abantu bazunguza inyama kuko ari ibicuruzwa byangirika vuba kandi bisaba umwihariko mu kubyitaho ndetse no kubifata neza.

Inyama zitabungabunzwe neza zishobora kugira ingaruka zikomeye ku buzima bw’abantu.

Gaspard Simbarikure, Umukozi ushinzwe ubugenzuzi bw’isuku, ubuziranenge n’akato k’ibikomoka ku matungo muri RICA, avuga ko kuzunguza inyama bikwiye kwamaganirwa kure kandi bitemewe, n’abazigura bakumva ko nta buziranenge zifite kuko mikorobe zazo zikura bitewe n’uko ziba zitakonjeshejwe.

Ati: ”Ni ukwamaganira kure ibintu byo kuzunguza inyama kuko ibikomoka ku matungo birimo n’inyama n’ibicuruzwa byangirika vuba bisaba umwihariko mu kubyitaho. Abaguzi bakwiye kumva ko izi nyama nta buziranenge na buke zifite kuko inyama zajungujwe ntiziba zikonjeshejwe bityo biha umwanya mikorobe zigakura; rero izi si inyama twavuga ngo abantu nibagure.”

A

Naho  bamwe mu batuye mu Karere ka Gakenke ndetse na Musanze ho mu Ntara  y’Amajyaruguru y’u Rwanda, bavuga ko inyama baguriye ku mihanda ari zo zibahendukira kuko ugura uko wifite.

Nizeyimana Jean Damascene utuye mu Murenge wa Gakenke, Akarere ka Gakenke, avuga ko mu isoko rya Gakenke ajya ahagurira amafi kandi akenshi aba apfunyitse mu ndobo.

Ati: ”Sinkunze kurya amafi cyane ariko iyo nyaguze njya mu bayacururiza mu ndobo kuko ni byo bihenduka kurusha uko najya aho basanzwe bayagurishiriza. Aho n’iyo ushaka imwe barayiguha cyangwa nyinshi biterwa n’amafaranga ufite.”

Nyirabageni Makurata utuye mu Karere ka Musanze mu murenge wa Musanze, na we avuga ko aba yumva inyama zose ari inyama, aho yazigurira hose zipfa kuba zidapfuye azitekera umuryango we.

Ati: ”Hari ubwo ujya kugurira abana wagira amahirwe ukazibona nk’aho hafi kandi ubona ari nzima ntacyo zitwaye; urazigura ukazibakarangira ntakibazo. Hari ubwo wenda tugura udufi mu gasoko  dukawushije mu mavuta cyangwa tukiri dushyashya.”

Kugeza ubu mu Rwanda hari amabagiro 257 arimo amabagiro manini arindwi  7, aringaniye 12, amato 28, mu gihe adafite icyiciro abarurwamo kugeza ubu agera kuri 200.

Mu Rwanda habarizwa amabagiro asaga 257 arimo amenshi atagira icyiciro abarizwamo
  • KAMALIZA AGNES
  • Mutarama 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE