Rayon sports yatsinzwe na Musanze FC inanirwa kwegera APR FC

  • SHEMA IVAN
  • Gashyantare 23, 2024
  • Hashize amezi 2
Image

Rayon sports yatsinzwe na Musanze FC  1-0 mu mukino w’umunsi wa 22 wa shampiyona inanirwa kugabanya ikinyuranyo cy’amanota irushwa na APR FC.

Uyu mukino wabaye ku mugoroba wo kuri uyu wa Gatanu tariki 23 Gashyantare 2024, Kuri Kigali Pele Stadium.

Iminota icumi ya mbere Rayon sports yateye koruneri eshanu ariko ba myugariro ba Musanze bakomeza kugarira neza cyane.

Musanze FC yahise ikanguka itangira gukina ariko icungira ku mipira yihuta inyuze kuri Solomon Adeyinka wari mwiza kuri uyu mukino.

Ku munota wa 12 Rayon Sports yabonye koruneri enye zikurikiranya zashoboraga kuvamo igitego, Charles Bbaale azitereramo ishoti ariko umunyezamu Muhawenayo Gad awukuramo ashyiramo iya gatanu.

Umunyezamu wa Rayon Sports Khadime Ndiaye yakoze amakosa asohoka nabi ku munota wa 20 bihurirana n’uko Sulley Mohammed yamubonye ahita amurenza umupira habura gato ngo ujye mu rucundura.

Solomon Adeyinka yongeye guhusha igitego ku mupira yaherejwe ari mu rubuga rw’amahina ashaka gushyira mu izamu ariko ku bw’amahirwe make uca ku ruhande rw’izamu gato.

Igice cya mbere cyarangiye amakipe yombi anganya ubusa ku busa.

Igice cya kabiri umutoza, Julien Mette wa Rayon Sports yatangiranye impinduka akuramo Iradukunda Pascal, amusimbuza Iraguha Hadji kugira ngo yongere imbaraga hagati mu kibuga.

Umunota wa 65 wageze nta kipe n’imwe irabona mu izamu ariko zitangira kureba ko zabona amanota atatu. Icyo gihe Tuyisenge yageze mu rubuga rw’amahina yitura hasi, ariko umusifuzi Ruzindana Nsoro amusaba guhaguruka kuko nta penaliti yabayeho.

Umutoza wa Musanze FC, Habimana Sosthène yakoze impinduka akuramo Sulley Mohammed na Nduwayo Valeur, ashyiramo Tuyisenge Pacifique na Tinyimana Elissa.

Aba bombi bahise bafatanya babona igitego ku munota wa 75 gitsinzwe na Tuyisenge Pacifique aherejwe umupira na Tinyimana.

Ku munota wa 89 habaye Impanuka ikomeye ubwo Muhire Anicet wa Musanze FC yagonganaga na Rudasingwa Prince, bombi bitura hasi bigaragara ko bababaye cyane. Rutahizamu wa Rayon Sports yahise yihutanwa kwa muganga hifashishijwe imbangukiragutabara yari ku kibuga.

Muhire na we yakuwe mu kibuga ku ngobyi ntiyasubira mu kibuga ahita asimburwa na Uwiringiyimana Christophe, Mvuyekure Emmanuel asimbura Rudasingwa.

Muhire Anicet byarangiye ubuzima bukomeje kugorana ahabwa ubundi butabazi bw’imodoka isanzwe yinjiye mu kibuga imujyana kwa muganga hakiri kare.

Umukino warangiye Rayon sports itsinzwe na Musanze FC Igitego 1-0 inanirwa kugabanya ikinyuranyo cy’amanota irushwa na APR FC iyoboye urutonde rwa shampiyona n’amanota 46 inafite imikino ibiri y’ibirarane.

Rayon sports yagumye ku mwanya wa kabiri n’amanota 42 mu gihe Musanze FC nayo yagumye ku mwanya wa gatatu igira amanota 41.

Ni ubwa mbere muri shampiyona Musanze FC itsinze Rayon Sports umukino ubanza n’uwo kwishyura.

Imikino iteganyijwe ku wa Gatandatu tariki 24Gashyantare 2024

Amagaju azakira Gasogi United saa cyenda kuri stade Mpuzamahanga ya Huye

Police FC izakira AS Kigali saa cyenda kuri Kigali Pele Stadium

Marines FC izakira Kiyovu Sports saa cyenda kuri stade Umuganda

Muhazi United izakira Etoile de l’Est saa cyenda kuri stade ya Ngoma

Ku cyumweru tariki 25 Gashyantare 2024

Mukura Victory Sports izakira APR FC saa cyenda kuri stade Mpuzamahanga ya Huye

Etincelles izakira Sunrise FC saa cyenda kuri stade Umuganda

Gorilla FC izakira Bugesera FC saa cyenda kuri Kigali Pele Stadium

Rudasingwa Prince yababaye bikomeye cyane ubwo yagonganaga na Muhire Anicet wa Musanze FC
  • SHEMA IVAN
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE