Rayon Sports WFC yegukanye igikombe cya shampiyona bwa mbere

  • NYIRANEZA JUDITH
  • Werurwe 23, 2024
  • Hashize ukwezi 1
Image

Rayon Sports y’abagore yegukanye igikombe cya shampiyona y’icyiciro cya mbere mu mupira w’amaguru nyuma yo gutsinda Muhazi United WFC igitego 1-0 mu mukino w’umunsi wa 21 wa shampiyona.

Uyu mukino wabaye kuri uyu wa Gatandatu tariki 23 Werurwe 2024 ku kibuga cya AVEGA mu Karere ka Rwamagana

Rayon Sports WFC yatangiye uyu mukino isabwa gutsinda ngo yegukane igikombe cya shampiyona.

Umukino watangiye utinze bitewe n’uko ku kibuga hari imbangukiragutabara itujuje ibyangombwa bikaba ngombwa ko hazanwa ibyujuje. Yaje kuzanwa, umukino utangira saa munani n’iminota 18.

Ikipe ya Muhazi United WFC yatangiye igora ikipe ya Rayon Sports WFC ikina imipira miremire ndetse ukongeraho n’ikibuga kitari cyiza ku buryo gukina umupira wo hasi byagoranaga.

Umukinnyi usanzwe ugenderwaho mu ikipe ya Rayon Sports WFC, Mukandayisenga Jeannine uzwi nka ‘Kaboy’ yagerageje uburyo bwinshi imbere y’izamu, gusa ntibimukundire.

Igice cya mbere cyarangiye amakipe yombi anganyije ubusa ku busa.

Mu gice cya kabiri Rayon sports WFC yakomeje gusatira izamu rya Muhazi WFC ishaka igitego cy’intsinzi ariko ba myugariro ba Muhazi United WFC bihagararaho.

Rayon Sports WFC yafunguye amazumu ku munota wa 66 birakunda aterekamo igitego cya mbere cyatsinzwe na Mukandayisenga Jeannine.

Mu minota 10 ya nyuma y’umukino imvura yaguye ari nyinshi biba ngombwa ko amakipe ava mu kibuga, nyuma yaho yaje guhita abakinnyi basubira mu kibuga. Umukino warangiye Rayon Sports WFC itsinze Muhazi United WFC igitego 1-0 yegukana igikombe cya shampiyona ku nshuro ya mbere ikina icyiciro cya mbere mu bagore.

Umukino wa nyuma wa shampiyona 2023-2024, Gikundiro izakira Fatima WFC y’i Musanze, mu mukino uzabera kuri Kigali Pele Stadium ari nabwo izashyikirizwa igikombe cyayo.

Rayon sports WFC yegukanye igikombe ifite amanota 58 irusha AS Kigali WFC iyikurikiye amanota 7 nubwo yo ifite umukino w’ikirarane.

Iyi kipe ya Gikundiro y’abagore yashinzwe muri 2022 ihita itangira gukina shampiyona y’icyiciro cya 2. Yazamutse muri shampiyona y’icyiciro cya mbere mu mwaka ushize none yegukanye igikombe cya shampiyona uyu mwaka.

  • NYIRANEZA JUDITH
  • Werurwe 23, 2024
  • Hashize ukwezi 1
TANGA IGITEKEREZO
Toyota says:
Werurwe 24, 2024 at 8:51 am

Reyosiporo
Yabagore
Oyeeee…..
Mukomereze
Aho.

Toyota says:
Werurwe 24, 2024 at 10:56 am

Bwana muyobozi wa reyosiporo jean fidel uwayezu turagusabako uzongerakwiya mamazariza kuyobora reyosi poro kuko urabonako ikipeyacu ikomeje gutera intambwe yaba mubagabo ndetse nomubagore reyosiporo yacu tukuri inyuma.

Toyota says:
Werurwe 24, 2024 at 11:01 am

Reyosiporo
Yabagore
Mukomereze
Aho
Kuko
Mwadushimishije
Abafanabareyo
Ahobarihose
Bagubweneza
Abareyoooooo

Andika igitekerezo

AMATEGEKO AGENGA IYANDIKA RY'IGITEKEREZO CYAWE