Umwongereza Phil Foden wa Manchester City yabaye umukinnyi w’umwaka muri Shampiyona y’u Bwongereza mu bihembo bitangwa n’Ishyirahamwe ry’Abakinnyi muri iki gihugu (Professional Footballers’ Association).
Ku mugoroba wo ku wa Kabiri tariki 20 kanama 2024, ni bwo abakinnyi bahize abandi muri Premier League ya 2023/24 bashyikirijwe ibihembo byabo.
Foden yatsinze ibitego 19 mu mikino 35 yakinnye muri uyu mwaka anafasha Manchester City kwegukana igikombe cya Shampiyona ku nshuro ya kane yikurikiranya.
Uyu mukinnyi yatsinze mugenzi we Erling Haaland na Rodri bakinana, Palmer, Martin Ødegaard na Ollie Watkins wa Aston Villa.
Nyuma yo kwegukana igihembo, Foden yavuze ko ari iby’agaciro gutorwa na bagenzi be.
Ati: “Kwegukana iki gihembo ni ibintu byiza nishimira cyane. Guhabwa agaciro n’abakinnyi bagenzi bawe bisobanuye buri kimwe kandi ndashimira buri umwe wantoye.”
Cole Palmer ukinira Chelsea yahembwe nk’umukinnyi mwiza ukiri muto, nyuma yo gutsinda ibitego 22 mu mikino 34 yakiniye mu mwaka ushize.
Uyu mukinnyi w’imyaka 22 yahigitse Bukayo Saka wa Arsenal, Kobie Maino na Alejandro Garnacho ba Manchester United, Michael Olise wahoze muri Crystal Palace na João Pedro wa Brighton & Hove Albion.
Ikipe y’umwaka yiganjemo abakinnyi ba Arsenal na Manchester City n’ubundi.
Iyi kipe igizwe n’umunyezamu David Raya (Arsenal), myugariro ni William Saliba (Arsenal), Virgil van Dijk (Liverpool), Gabriel Magalhães (Arsenal) na Kyle Walker (Manchester City).
Abakina hagati ni Rodri (Manchester City), Declan Rice (Arsenal) na Martin Ødegaard (Arsenal). Ni mu gihe ba rutahizamu igizwe na Erling Haaland (Manchester City), Phil Foden (Manchester City) na Ollie Watkins (Aston Villa).
Phil Forden Oye Oye Oyeee Igihembo Uragikwiye Nkumukinnyi Wahize Abandi .