Perezida wa Senegal agiye kubabarira abigaragambije bamwamagana

  • ZIGAMA THEONESTE
  • Gashyantare 27, 2024
  • Hashize amezi 2
Image

Perezida w’Igihugu cya Senegal Macky Sall yatangaje umugambi wo gutanga imbabazi rusange ku bigaragambyaga kubera impamvu za Politiki kuva mu mwaka wa 2021 kugeza mu 2024, zirimo no kuba baramaganye ko yasubitse amatora yagombaga kuba muri uku kwezi kwa Gashyantare.

Ni imyigaragambyo yafashe intera ikomeye mu Murwa Mukuru Dakar, aho bamwe mu bigaragambyaga batawe muri yombi, Perezida Sall yavuze ko azabababarira kubera ko ashaka kugabanya amakimbirane yugarije icyo gihugu.

Ibyo biraba mu gihe igihugu cya Senegal kirimo kwitegura amatora y’Umukuru w’Igihugu bitaratangazwa itariki azaberaho.

Kuri uyu wa Mbere, mu biganiro by’igihugu (Nation Dialogue), Perezida Sall yabwiye abaturage ba Senagal ko yiteguye gutanga ubutegetsi bitarenze muri Mata 2024.

Mu rwego rwo kwimakaza ubwiyunge mu gihugu, Perezida Sall yagaragaje ko ashaka kugeza umushinga w’Itegeko mu Nteko Ishinga Amategeko, agasaba imbabazi z’ibikorwa bya politiki byabaye mu gihugu mu gihe ari ku butegetsi birimo n’imyigaragambyo.

Icyakora mu gihe umwuka mubi ukomeje kwiyongera mu gihugu umukandida Perezida Alioune Sarr, umukire ukomeye mu mateka ya Senegal, yavuze ko ibiganiro by’igihugu byari bikwiye kuba umwanya wo kuganira uko bakwimakaza Demokarasi y’aho abantu basimburana ku butegetsi nta nkomyi.

Perezida Sall yifuza ko Demukarasi yakwimakazwa buri wese akayibonamo, agahamya ko byahozeho mu mateka yo hambere muri Senegal, kandi ko ari amasezerano yari yumvikanyweho yari yitezweho kugeza icyo gihugu kuri Politiki ihamye.

Umwe mu bagize Inteko Ishinga Amategeko Seydou Diouf, yashimangiye ko ari inshingano za Perezida zo gutumiza abafatanyabikorwa mu biganiro, ashimangira ko hakenewe inama nyinshi  zishingiye ku bwizerane  kugira ngo amatora abeho neza kandi mu mucyo.

  • ZIGAMA THEONESTE
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE