Perezida wa Komisiyo ya EU aritabira itahwa rya BioNTech mu Rwanda 

  • NTAWITONDA JEAN CLAUDE
  • Ukuboza 17, 2023
  • Hashize amezi 5
Image

Perezida wa Komisiyo y’Umuryango w’Ubumwe bw’u Burayi (EU) ategerejwe mu Rwanda kuri uyu wa Mbere tariki ya 18 Ukuboza 2023, umunsi hatangizwa icyiciro cya mbere cy’uruganda rw’inkingo n’imiti rwa BioNTech. 

Uruganda rwa BioNTech rwubatswe mu cyanya cyahariwe inganda i Masoro mu Mujyi wa Kigali, rukaba ari rwo rwa mbere rufite ikoranabuhanga rigezweho rya BioNTainers rwubatswe muri Afurika mu kubaka ubushobozi bwo gukorera inkingo n’indi miti kuri uyu mugabane. 

Madamu Ursula von der Leyen, yitezwe muri uwo muhango kimwe n’abandi banyacyubahiro, mu ruzinduko rw’umunsi umwe aho anagirana ibiganiro na Perezida wa Repubulika y’u Rwanda Paul Kagame n’abandi bayobozi.

Ibyo biganiro biribanda mu ngingo z’ubutwererane bw’u Rwanda na EU ndetse n’ingingo z’inyungu impande zombi zihuriyeho.

Muri urwo ruzinduko rw’umunsi umwe, Perezida wa EU yitezweho gusura Urwibutso rwa Jenoside rwa Kigali rushyinguyemo abasaga 250,000 bishwe mu gihe cya Jenoside yakorewe Abatutsi mu 1994. 

Muri urwo ruzinduko, binateganyijwe kandi ko ari bube aherekejwe n’abayobozi batandukanye baturutse ku mugabane w’u Burayi, nk’abahagarariye Guverinoma zitandukanye, ubuyobozi bwa bw’Ikigo cy’Abadage BioNTech, n’abandi banyacyubahiro. 

Urwo ruganda ruzakora inkingo zigezweho za mRNA, ruzaba rufite ubushobozi bwo gukora nibura doze miliyoni 50 z’inkingo ku mwaka rwubatswe guhera muri Kamena 2022 kuri metero kare 30,000. 

Urwo ruganda rugizwe n’ibyiciro bibiri bishyirwamo Kontineri (BioNTainers) ziza ari uruganda rwuzuye, aho icya mbere gikorerwamo inkingo cyageze mu Rwanda ari na cyo cyamaze kubakirwa. 

Ni mu gihe icyiciro cya kabiri kizakora imiti cyitezweho kuzaba cyubakiwe bitarenze mu mpera z’umwaka wa 2024, aho urwo ruganda rwitezweho kuzaba rumaze guha akazi Abanyarwanda barenga 100. 

Ikigo BioNTech cyubatse izina rihambaye mu gutegura, gutunganya inkingo n’indi miti gikoresheje ikoranabuhanga rigezweho; cyiyemeje gufasha u Rwanda kubona uruganda rukora inkingo zitandukanye zirimo n’iza COVID-19.

Uretse mu Rwanda, icyo kigo cyiteguye  kubaka inganda nk’izo mu bindi bihugu by’Afurika ari byo Senegal n’Afurika y’Epfo. 

Umuryango w’Ubumwe bw’u Burayi wizeye ko iyo nkunga y’Ikigo cy’Abadage izarushaho kwagura imikoranire y’Afurika n’u Burayi, no kuziba icyuho cyo kubura kw’inkingo kuri uyu Mugabane.

  • NTAWITONDA JEAN CLAUDE
  • Ukuboza 17, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE