Perezida Kagame yakiriye Perezida wa Hungary wasuye u Rwanda

  • NTAWITONDA JEAN CLAUDE
  • Nyakanga 16, 2023
  • Hashize amezi 11
Image

Kuri iki Cyumweru Perezida wa Repubulika y’u Rwanda Paul Kagame, yakiriye muri Village Urugwiro Perezida wa Hongiriya (Hungary) Katalin Novák, uri mu ruzinduko rw’akazi mu Rwanda. 

Katalin Novàk ni we Muperezida wa mbere w’Umugore watorewe kuyobora  Hungariya, akaba ari na we Mukuru w’icyo gihugu wa mbere usuye u Rwanda. 

Ari mu Rwanda guhera ku wa Gatanu taliki ya 14 Nyakanga, akaba ari umwe mu bihumbi by’abashyitsi bitabiriye Inama Mpuzamahanga y’Umuryango uharanira  Iterambere ry’Abagore (WD2023), iteraniye i Kigali. 

Madamu Katalin yatangaje ko uretse uru ruzinduko yagiriye mu Rwanda yasuye na Tanzania, aho intego ari iyo kurushaho gushimangira umubano w’Igihugu cye n’ibyo bihugu ndetse n’Afurika muri rusange. 

Mu butumwa yanyujije ku mbuga nkoranyambaga, yahishuye ko uretse gushimangira umubano azanywe no kuganira n’abayobozi ibirebana no gutanga ubufasha kuko Igihugu cye cyiteguye gutera inkunga aho ikenewe hashoboka. 

Katalin Novàk, Perezida wa mbere wa Hungariya w’umugore

Yakomeje agira ati: “Nka Perezida wa mbere wa Hungariya w’umugore, kwimakaza no gushyigikira iterambere ry’abagore na yo ni intego kuri njye, ari na yo mpamvu nzatanga ikiganiro mu Nama ya Women Deliver iteraniye i Kigali aho nzaba ndi kumwe n’abandi Bakuru b’Ibihugu.”

Perezida Katalin yanashimishijwe no guhura n’abaturage b’Igihugu cye baryohewe no gutura mu Rwanda. 

Mu Rwanda, yafashe umwanya wo kunamira impirimbanyi yo kubungabunga urusobe rw’ibinyabuzima, Krisztian Gyöngyi ukomoka muri Hungariya, watanze umusanzu ukomeye mu kugarura inyamaswa z’inkura mu Rwanda, nyuma y’aho akagwa mu mpanuka y’imodoka. 

Ni igikorwa yafatanyijemo n’umufasha we Orsolya Bedő n’abarinda Pariki y’Igihugu y’Akagera batojwe na we, aho bamwunamiye bibuka uburyo yatanze umusanzu watumye aba n’umwe mu bubashywe mu Rwanda. 

Perezida Katalin yanishimiye uburyo n’Abanyarwanda bamwakiranye urugwiro, by’umwihariko i Nyanza aho abana biga muri rimwe mu mashuri abarizwa mu Karere ka Nyanza bamususurukije mu ndirimbo iri mu rurimi rw’igihugu cye (Hungarian). 

Abo banyeshuri yabashyikirije igikorwa remezo cy’aho gukarabira intoki cyubatswe ku nkunga yatanzwe na Leta ya Hungariya. 

Biteganyijwe ko mu mwanya uri imbere haza gusinywa amasezerano y’ubutwererane hagati y’u Rwanda na Hungariya, aho Abakuru b’Ibihugu byombi bakurikirana uwo muhango mbere yo kuganira n’abanyamakuru. 

  • NTAWITONDA JEAN CLAUDE
  • Nyakanga 16, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE