Perezida Kagame yahaye Mubarakh Muganga ipeti rya Jenerali

  • NTAWITONDA JEAN CLAUDE
  • Ukuboza 20, 2023
  • Hashize amezi 2
Image

Perezida wa Repubulika akaba n’Umugaba w’Ikirenga w’Ingabo z’u Rwanda (RDF) Paul Kagame, yazamuye mu ntera Mubarakh Muganga amuha ipeti rya Jenerali w’inyenyeri enye (General Full) avuye kuri Liyetona Jenerali (Lt. Gen).

Gen Mubarak Muganga ni Umugaba Mukuru w’Ingabo z’u Rwanda, inshingano yahawe guhera mu ntangiriro za Kamena uyu mwaka, asimbuye Gen Jean Bosco Kazura.

Gen. Muganga ni umwe mu basirikare bafite uburambe mu bya gisirikare ndetse akaba yaragize amahirwe wo kongera ubumenyi mu gisirikare cy’umwuga.

Kuva mu mwaka wa 2008-2012,yabaye umuyobozi wa Diviziyo ya Kane naho mu 2013-2015 aba Umuyobozi wa Diviziyo ya Gatatu mu ngabo z’u Rwanda.

Mu 2016 kugeza muri 2021, yari umuyobozi wa Diviziyo ya Mbere mu ngabo z’u Rwanda, ihuza Umujyi wa Kigali n’Intara y’Iburasirazuba.

Ni inshingano yafatanyaga no kuyobora Inama y’Ubutegetsi y’Amaguriro y’Ingabo z’u Rwanda (Armed Forces Shop) ahahiramo Abasirikare, Abapolisi, Abacungagereza n’imiryango yabo.

Muri uwo mwaka yanabaye Umugaba w’Ingabo zirwanira ku butaka (ACOS), ari na zo nshingano yavuyeho ahita aba Umugaba Mukuru w’Ingabo z’u Rwanda (CDS).

Gen Mubarakh Muganga ufite impamyabumenyi y’Icyiciro cya Kabiri cya Kaminuza mu bijyanye n’imiyoborere, yize amasomo ya gisirikare mu bijyanye no gutegura urugamba muri Kaminuza ya Gisirikare yo mu Bushinwa yitwa, National Defense University of PLA, mu 2012.

Muri uwo mwaka kandi yize ubumenyi mu bijyanye n’imiyoborere ya gisirikare n’amasomo y’Abasirikare bakuru, n’uburyo bwo kugena ingamba z’ibigo (Strategic Management) muri Kaminuza ya Tsinghua na Kaminuza ya Gisirikare zo mu Bushinwa.

Mu 2008 yize amasomo ya African Strategy Course, mu Ishuri Rikuru rya Gisirikare rya Nasser mu Misiri, amasomo ku Bikorwa Mpuzamahanga byo Kugarura Amahoro, n’amasomo ku butumwa bw’Abayobozi Bakuru yayigiye mu Kigo gitoza Kugarura Amahoro [Peace Support Training Centre] cyo muri Kenya aho yize mu 2007.

Mu mwaka wa 2006 Gen Mubarakh Muganga yize imicungire y’Ingabo muri Kenya, Amashuri makuru ya Gisirikare yayize i Lusaka muri Zambia mu 2005, mu gihe amasomo amwinjiza muri ba Ofisiye Bato [Cadet Officer Course] yayigiye i Jinja muri Uganda mu 1988-1989.

Mu bihe bitandukanye Gen Mubarakh Muganga yahawe imidali y’ishimwe irimo Umudali wo Kubohora Igihugu, uwo Guhagarika Jenoside, Umudali w’Irahira rya Perezida, Umudali wo Gutabarira Igihugu hanze yacyo, Ribbon (umudali bambara ku mufuka w’ishati, ibumoso) yo kurwana ku rugamba, iy’ibikorwa by’urugamba n’iy’umuganda.

  • NTAWITONDA JEAN CLAUDE
  • Ukuboza 20, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE