Nyanza: Bafitiye ubwoba indwara ziterwa n’umwanda kubera ko nta bwiherero bafite

Abatishoboye batujwe mu Mudugudu wa Nyagasambu uzwi nka Nyabugogo mu Murenge wa Busoro, Akarere ka Nyanza, bavuga ko bugarijwe n’umwanda baterwa no kuba nta bwiherero bafite, ku buryo bafite impungenge zo kwibasirwa n’indwara ziterwa n’umwanda.

Umwe mu bahatuye avuga ko ubwiherero yari afite bwaguye noneho abura ibiti byo kongera kubutinda ku buryo afitiye ubwoba indwara ziterwa n’umwanda.

Ati: “Ubu mfitiye ubwoba indwara ziterwa n’umwanda, kuko ubwiherero nari mfite bwaraguye noneho mbura ibiti byo kongera kubutinda kandi iki kibazo si jyewe ugifite jyenyine muri uyu mudugudu, kuko urabona n’uriya muturanyi wanjye na we yacukuye akobo gatoya ni ko bitumamo.”

Mugenzi we na we utuye muri uwo Mudugudu wa Nyagasambu, avuga ko kubera inzu bari bafite zaguye, hari bamwe ubwiherero bwabo bahise babugira aho kuba ku buryo usanga isuku ari nkeya.

Ati: “Indwara ziterwa n’umwanda zishobora kutwibasira da, none se ko nta bwiherero buzima tugira, ndetse n’uwari abufite yabugize inzu yo kubamo nyuma y’uko iyo yubakiwe iguye, muri make umwanda wo hano urahari kuko usanga n’ufite ubwiherero buba ari buto butarenze metero imwe, ahubwo ubuyobozi nibudutabare.”

Umuturanyi w’uwo mudugudu na we akaba yemeza ko abawutuye nta buzima bafite kubera umwanda wo kutagira ubwiherero kuko usanga abana bituma aho babonye.

Ati: “Nta buzima bafite bariya baturanyi bo mu mudugudu kuko usanga ikibazo cy’ubwiherero bafite gituma hahora umwanda, ndetse natwe ukaba utugeraho kuko usanga abana bituma mu myaka yacu no mu bisambu rero kereka ubuyobozi nibubafasha n’aho ubundi bashobora kuzarwanda indwara ziterwa n’umwanda”.

Umuyobozi w’Akarere ka Nyanza Ntazinda Erasme, avuga ko ikibazo cy’iyi miryango idafite ubwiherero kigomba kwihutirwa kigakemuka.

Ati: “Abatuye uriya mudugudu badafite ubwiherero, cyangwa bafite ubumeze nabi bagiye kwitabwaho kugira ngo bashakirwe ubwiherero bwujuje ibisabwa, na cyane ko uriya mudugudu batujwemo wubatswe mu buryo bwa huti huti kubera imiryango yagombaga kwimurwa.”

Mu gihe bamwe bo mu miryango 31 y’abatishoboye yatujwe mu Mudugudu w’abatishoboye wa Nyagasambu mu karere ka Nyanza, bataka kutagira ubwiherero, Ibyavuye mu ibarura rusange rya 2022 ryakozwe n’Ikigo cy’Igihugu cy’Ibarurishamibare mu Rwanda (NISR), bigaragaza ko mu Rwanda ingo zifite imisarane yujuje ibisabwa kandi idasangirwa ari 72%, abiherera ku gasozi cyangwa mu mashyamba ari 1% mu gihugu hose, naho abatuye mu mijyi bafite ubwiherero budasangirwa bo bagera kuri 56%.