Nyamasheke: Umusore wari wibye moto kabiri yafashwe atwaye indi y’inyibano

  • BAHUWIYONGERA SYLVESTRE
  • Gashyantare 20, 2024
  • Hashize amezi 2
Image

Bikorimana Jean Bosco w’imyaka 29 wo mu Mudugudu wa Murenge, Akagari ka Murambi, Umurenge wa Cyato, Akarere ka Nyamasheke, yongeye gufatirwa kuri moto yari akimara kwiba nyuma y’izindi nshuro ebyiri nab wo yagiye agerageza kuziba agafatwa.

Uyu musore afungiye kuri sitasiyo ya RIB ya Kanjongo, mu Karere ka Nyamasheke, nyuma yo gufatwa atwaye iyo moto ayigejeje mu Mudugudu wa Gakenke, Akagari ka Rugali, Umurenge wa Cyato.

Umunyamabanga Nshingwabikorwa w’Akagari ka Rugali Mubayire Eliel, yatangarije Imvaho Nshya ko ubu bujura bwabaye ahagana  sita z’amanywa zo ku wa mbere tariki ya 19 Gashyantare.

Bikorimana yacunze umumotari ari mu nama y’ikimina abarizwamo i Tyazo, mu Murenge wa Kanjongo, ahita atwara iyo moto yari iparitse hafi y’aho inama yaberaga.

Gitifu Mubayire yavuze ko Bikorimana na we yabanje kwitabira iyo nama agacunga uwo mumotari ku jisho, yabona ahuze akabona akajya gucomokora moto ye akayitwara bitamusabye kuba afite urufunguzo rwayo.

Inama y’ikimina irangiye nyiri moto yagiye kureba aho yayisize arayibura, ahita ajya gutanga ikirego kuri RIB, maze ku bufatanye bwa RIB n’abaturage bavugaga ko babonye uwo musore kuri moto baramukurikirana.

Kubera ko ngo yagendaga kuri iyo moto yirukanka cyane, bagerageje guhanahana amakuru maze afatirwa mu Murenge wa Cyato ahagana munani z’igicamunsi, ayimazeho amasaha 2 ayitwaye.

Uyu musore avuga ko yari afite umuntu ayishyiriye wari kuyigura akayishwanyaguza akagurisha ibyuma

Gitifu Mubayire ati: “Amakuru yaratanzwe natwe atugeraho, bivugwa ko yerekeje mu bice byacu, dufatanya gushakisha. Yarayitwaye ageze mu Kudugudu wa Gakenke mu kagari kacu ka Rugali, ayivaho ashakisha inzira yanyuramo ntafatwe, ayibonye yurira moto amaze kuyatsa tuba twamugezeho tumufata agiye kuyihagurutsa.”

Gitifu Mubayire avuga ko uyu musore agifatwa yavuze ko moto yari ayishyiriye uwari wamutumye moto iyo ari yo yose yabona ngo ayimugurirena we afite umugambi wo kuyikataguramo akagurisha ibyuma byayo.

Gusa ngo ntiyavuze izina ry’uwayimutumye, ngo hamenyekane ibye niba ari usanzwe afite aho ahuriye n’ubucuruzi bwa moto n’ibyuma byayo.

Uyu musore utagira uruhushya rumwemerera gutwara ibinyabiziga, yari  inshuro ya 3 yiba moto nk’uko bivugwa na Gitifu Mubayire.

Ubwa mbere ngo yarayibye arayifatanwa afungwa umwaka wose ararekurwa, ubwa 2  yiba indi mu gace k’iwabo bayimwaka amaze kuyatsa agiye guhaguruka.

Icyo gihe nyina babana yamusabiye imbabazi barayimwaka ariko ntiyafungwa. Ariko ubu bwo yahise atabwa muri yombi.

Gitifu Mubayire yasabye urubyiruko  rutekereza iby’ubujura kubireka, rugahagurukira gukora rukiteza imbere  cyane ko akazi katabuze.

Yatanze urugero rw’uko abafite ubushake bwo gukora babona akazi  mu busoromyi bw’icyayi n’ahandi.

Yavuze ko ingaruka zo kwiba ziba mbi cyane zikangiza ejo hazaza h’urubyiruko ruba rufite amahirwe menshi yo gukoresha imbaraga rukaba n’umusemburo w’iterambere ry’Igihugu.

  • BAHUWIYONGERA SYLVESTRE
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE