Nyamasheke: Umusore utabona washoye 10,000 Frw yunguka 150,000 ku kwezi

  • BAHUWIYONGERA SYLVESTRE
  • Mutarama 11, 2024
  • Hashize amezi 4
Image

Irambona David ufite ubumuga bwo kutabona, ucuruza serivisi zijyanye n’ikoranabuhanga rikoresheje telefoni, MoMo, gutanga amayinite (unités), n’izindi bijyanye, mu Murenge wa Kagano, Akarere ka Nyamasheke, avuga ko mu gihe gito amaze muri aka kazi, kamaze kumuha ijambo mu bandi.

Mu buhamya bwe avuga ko yatangiye ashora amafaranga y’u Rwanda 10,000 yari yahawe nk’itike, none ubu avuga ko ashobora kunguka nibura amafaranga y’u Rwanda ibihumbi 150 ku kwezi.

Irambona w’imyaka 34 utaraciwe intege no kuba afite ubumuga bwo kutabona muri ako kazi korohera ababona, akorera hafi y’Ibiro by’Akarere ka Nyamasheke.

Uyu musore usanga abantu benshi bamugezeho baba bafite amatsiko yo kumenya uburyo akoresha telefoni atanga serivisi ntiyibeshye, bagatungurwa n’uko atanga serivisi kinyamwuga kandi ngo abamugannye bose bagenda bishimiye ko abakira neza.

Mu kiganiro yagiranye n’Imvaho Nshya, yavuze ko mu mwaka wa 2013 ubwo yari ashaririwe n’ubuzima ari bwo yitabiriye inama y’abantu bafite ubumuga yataha bakamuha itike y’amafaranga 10,000.

Mu gihe yabonaga bagenzi be bayarya, we yatekereje kuyashora, ati: “Jye nanze kugura amandazi n’utundi two kurya tw’uwo munsi, nanga gutega imodoka ntaha n’amaguru, amafaranga ndayabika.

Yemeza ko ayo mafaranga yambereye umugisha, ati: “Mu mwaka wakurikiyeho, nisunze uwacuruzaga amayinite ubizi mubwira ko mfite amafaranga 10,000 nshaka kwinjiza muri uwomwuga, ambwira ko afite impungenge ko bazanyiba mubwira ko niyizeye, aramfasha ndatangira”.

Yemeza ko icyo gihe agitangira abantu bamugannye ku bwinshi ariko bamwe bagamije kumwiba bumva ko adashobora gukurikirana ubwo bucuruzi kubera ubumuga afite.

Ati: “Nashyizemo imbaraga mbereka ko byose bishoboka, bambera ab’umugisha cyane ku buryo buri munsi najyaga nunguka arenga 5000 ubuzima burahinduka.”

Avuga ko hari n’abamugeragaho bakanezezwa n’uburyo akora, bakamusigira amafaranga yo kumushimira uko kwigira.

Yakomeje gukora nyuma aza kujya kwiga ibyo kuboha imipira i Rubavu, avuyeyo ashinga itsinda ry’abana barimo n’abafite ubumuga abigisha umwuga wo mwuga.

Ati: “Kugeza ubu rero ndigize nshobora kubona amafaranga atari munsi ya 150,000 mu kwezi. Ntawe unsuzugura kuko ntawe ntegera amaboko. Nishimira gutanga akazi kubandi ku ko nk’iyo nkodesheje imirima abayihinga ndabishyura, nkanishimira ko hari abaza kunguza amafaranga kandi badafite ikibazo na kimwe cy’ubuzima nkabaha ayo bakeneye yose”.

Irambona afite utundi tuntu acururiza aho atangira serivisi za MoMo

Yemeza ko gukorana n’ibigo by’imari, amatsinda yo kwiteza imbere n’amakoperative y’abantu bafite ubumuga abarizwamo na byo bituma arushaho kwiteza imbere.

Ubuzima bushaririye mbere yo kwigira

Mu kiganiro n’Imvaho Nshya, uyu musore wavukiye mu Kagari ka Ninzi, Umurenge wa Kagano muri Nyamasheke, yavuze ko ubumuga bwo kutabona yabuvukanye.

Akiri uruhinja ababyeyi bamujyanye kumuvuza mu Bitaro Bikuru bya Kaminuza bya Butare (CHUB), mu gihe yari atangiye kubona gake, umuganga wamukurikiranaga yicwa muri Jenoside yakorewe Abatutsi.

Ati: “Muganga wanyitagaho amaze kwicwa muri Jenoside yakorewe Abatutsi, nanjye n’umuryango wanjye twahungiye muri Repubulika Iharanira Demokarasi ya Congo (RDC). Tugezeyo natangiye amashuri abanza, nkomeza n’ayisumbuye mu bukungu, ubumenyi bw’isi n’amateka, nkora n’ikizamini cya Leta. Ndimo nyarangiza kubera gukoresha cyane amaso atabona neza nahumye burundu.”

Icyo gihe ahuma burundu hari mu 2009, ari naho yaje kuburana n’ababyeyi be kugeza n’uyu munsi akaba akeka ko baguye mu mashyamba ya Congo.

Yagarukanye n’umuntu wari inshuti ye wari ufite ubumuga bw’ingingo, amwitaho ndetse bagerana i Kamembe mu Karere ka Rusizi.

Abo mu muryango we bamenye ko yaje baramutwaye, bamuha nyirakuru ariko na we babanye igihe gito kuko yahise yitaba Imana.

Avuga ko ubuzima bwarushijeho kumusharirira, ariko ku bw’amahirwe abona umupadiri wamwitayeho agenda amushakira amashuri y’abantu bafite ubumuga bwo kutabona.

Ubumenyi yakuye muri ayo mashuri yizemo bwamugiriye umumaro, kugeza mu 2013 ubwo yabonaga igishoro gito ariko cyamuhinduriye ubuzima.

Avuga ko mu mafaranga abika, afite intego yo kugura ikibanza cya miliyoni 5 z’amafaranga y’u Rwanda akacyubaka ndetse akaboneraho no kuzashinga urugo.

Afite n’umushinga wo guhagararira banki zitandukanye nka Agent, akaba yarandikiye Akarere agasaba inkunga ya miliyoni eshatu z’amafaranga y’u Rwanda yatangiza.

Muri uwo mushinga yizeye ko nutangira azajya yunguka nibura amafaranga y’u Rwanda 400,000 ku kwezi.

Ashimira cyane Perezida wa Repubulika Paul Kagame wahaye agaciro abantu bafite ubumuga, bakagaragaza impano n’imbaraga bifitemo.

Abamugana batangazwa n’uburyo akora akazi ke neza

Bamwe mu bakiliya ba Irambona, bavuga ko bibaza uburyo abikira  amafaranga kuri telefoni cyangwa akababikuriza atibeshya bikabayobera.

Muhayimpundu Agnès, umwe muri bo, yagize ati: “Aratangaje! Amafaranga yose umuhaye arayamenya ntiyibeshya. Atanga serivisi neza, mbese ni urugero rw’ibishoboka binatanga isomo ku babyeyi batita ku bana babo bafite ubumuga.”

Uwabakurikiza Joseph, Uhagarariye Inama y’igihugu y’abantu bafite Ubumuga mu Karere ka Nyamasheke, ashimira Irambona uburyo yirwanaho akigira, akaba yaranakoresheje neza inkunga ya miliyoni yahawe, kuri ubu akaba akoresha ikoranabuhanga rya musadobwa.

Ati: “Turamushimira rwose ko yatinyuye abandi. Abyaza umusaruro ufatika imbaraga n’ubushobozi yifitemo, n’inkunga twamuteye ayifata neza, bikaba byabera urugero abatazifata neza n’abacyitinya. Tugerageza gufasha abakiri hasi ngo bazamuke ariko ubushobozi bukaba buke, tugasaba Leta gukomeza kutuba hafi mu rwego rw’iterambere ry’abantu bose bafite ubumuga muri aka Karere.”

Umuyobozi w’Akarere ka Nyamasheke Mupenzi Narcisse, avuga ko uko kwirwanaho kugaragaza imbaraga, ubwenge, impano, n’ubushobozi by’abantu bafite ubumuga, bityo ubuyobozi butazatezuka ku kubaba hafi.

Akarere ka Nyamasheke kabarurwamo abantu barenga 16,000 bafite ubumuga bunyuranye.

ABamugana batungurwa n’uburyo amenya amafaranga yose bamuhaye kandi atayabona
Kuba anoza umurimo biri mu bituma agira abakiliya benshi bakenera serivisi zo kubitsa no kubikuza
Irambona azi gukoresha na musadobwa, akaba ari na yo yifashisha akora raporo
  • BAHUWIYONGERA SYLVESTRE
  • Mutarama 11, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE