Nyamasheke: Hafashwe 7 bakekwaho uruhare mu rupfu rwa Mukashema

  • BAHUWIYONGERA SYLVESTRE
  • Werurwe 26, 2024
  • Hashize ibyumweru 4
Image

Kuri sitasiyo ya RIB ya Ruharambuga mu Karere ka Nyamasheke hafungiye abantu 7 bakekwaho uruhare mu rupfu rwa Mukashema Dorothée w’imyaka 53, wiciwe mu nzu yabagamo wenyine mu Mudugudu wa Gabiro, Akagari ka Kagarama, Umurenge wa Mahembe mu ijoro ryo ku wa 18 Werurwe 2024.

Ku wa Mbere tariki ya 25 Werurwe, Umuvugizi wa Polisi mu Ntara y’Iburengerazuba, SP Karekezi Twizere Bonaventure, yabwiye Imvaho Nshya ko hamaze gutabwa muri yombi abantu 7 bakekwaho uruhare muri uru rupfu.

Ati: “Ni byo. Polisi, ku bufatanye n’izindi nzego yataye muri yombi abantu 7 bakekwaho uruhare mu rupfu rwa nyakwigendera Mukashema Dorothée. Muri bo hari uwafatanywe bimwe mu bikoresho bye birimo telefoni ye igendanwa, n’ibindi. Bose bashyikirijwe ubugenzacyaha, bafungiye kuri sitasiyo ya RIB ya Ruharambuga, bafashwe mu bihe bitandukanye.”

Nk’uko Imvaho Nshya yari yabitangarijwe n’umukobwa we Musabyimana Cécile utuye mu Mudugudu wa Gasharu muri aka Kagari, ku wa 18 Werurwe saa munani z’amanywa, yagiye kumureba ngo bazinduke bajya kubagara umuceri wabo mu gishanga cya mugonero.

Batandukana nyina amubwiye ko agiye mu isoko rya Mugonero kugura kawunga, yavayo akajya gukura imyumbati, akayitonora bugacya bahurirayo.

Saa yine z’igitondo ku wa 19 Werurwe, umukobwa we yageze mu murima azik o ahamusanga ntiyahamubona. Amuhamagaye telefoni ntiyacamo arakomeza arabagara.

Akomeza guhamagara byanga, bigeze saa cyenda z’amanywa ajya kumureba mu rugo, asanga inzugi zose zegetseho, akinguye icyumba  cy’uburiri, asanga araryamye yapfuye, afite igikomere ku mutwe, amaraso mu matwi, mu mazuru no mu kanwa, n’imbere y’igikoni amaraso ahuzuye, akeka ko yishwe aratabaza.

Musabyimana Cécile yari yabwiye Imvaho Nshya ko icyatumaga akeka ko nyina yishwe, ari uko yari arambitse ku buriri atoroshe, yambaye uko yari yiriwe yambaye, atanakarabye nibura ibirenge, ibyo yari atetse bikiri ku ziko n’ayo maraso yaheraga imbere y’umuryango w’igikoni kugera ku buriri bwe.

Bikekwa ko bamwinjiranye atetse mu ma saa moya y’umugoroba, yabikanga, yasohoka bakamwicira imbere y’igikoni, umurambo bakawuterura bakawujyana, bakawurambika ku buriri bwe.

Telefoni ye n’amafaranga 124.000 yari afite mu nzu, ibishyimbo na soya byose bidahari, akaba yarasabaga iperereza ricukumbuye hakamenyekana uwabaciye umubyeyi.

Umuvugizi wa Polisi mu Ntara y’Iburengerazuba, SP Karekezi Twizere Bonaventure mu butumwa yatanze, yavuze ko buri muturarwanda afite uburenganzira bwo kubaho  atekanye, aho atuye hose, kimwe n’abo baturanye.

Ati: “Polisi ntizigera yihanganira na rimwe uwo ari we wese uzishora mu bikorwa by’ubugizi bwa nabi kugera n’aho amena amaraso ngo birangirire aho. Amategeko agomba kubimubaza akabiryora.’’

Ubwicanyi buragenda bufata intera idasanzwe muri aka Karere ka Nyamasheke, cyane cyane muri uyu Murenge wa Mahembe. Abaturage Imvaho Nshya yavuganye na bo nyuma yo kumva iyi nkuru bavuze ko bakiranye ibyishimo bikomeye kubera ubwoba bahorana bw’abaza bakicira abantu mu nzu.

Bashimiye cyane Polisi y’Igihugu ikorera mu Ntara y’Iburengerazuba, banasaba ko bajya bamenyeshwa buri gihe icyo iperereza ryatanze ku bikorwa bibi nk’ibi.

  • BAHUWIYONGERA SYLVESTRE
  • Werurwe 26, 2024
  • Hashize ibyumweru 4
TANGA IGITEKEREZO
lg says:
Werurwe 26, 2024 at 8:27 pm

Aliko ibi mpora mbivuga igihe cyose abicanyi bazumva ko bafite ubudahangarwa ko badashibora kwicwa ubwicanyi ntibuteze gushira nkabo bakabaye ikibazo cyabo cyarangiye kare maze ukareba ko abantu batarmara kabili batumva izonkuru mbi zabo bicanyi

Andika igitekerezo

AMATEGEKO AGENGA IYANDIKA RY'IGITEKEREZO CYAWE