Nyamasheke: Batewe impungenge n’umuhanda ugiye gucikamo kabiri

  • BAHUWIYONGERA SYLVESTRE
  • Mutarama 5, 2024
  • Hashize amezi 2
Image

Umuhanda Mwaga- Kibaya, uva ku muhanda munini Kivu Belt ugana ku cyambu cya Mwaga uteje inkeke kuko watangiye utenguka gahoro gahoro, ku buryo ushobora kuzacikamo kabiri bigafunga imigenderanire n’ubuhahiranire.

Ubusanzwe, icyo cyambu cya Mwaga cyifashishwa mu kwambutsa inka, ingurube n’andi matungo Abanyekongo baba baguze mu masoko ya Bumazi na Rukuta mu Karere ka Nyamasheke bayajyana iwabo, bityo udakozwe vuba ushobora kuba utakiri nyabagendwa.

Ndekeyaho Emmanuel, umwe mu baherekeza amatungo mu modoka agiye gupakururirwa ku cyambu cya Mwaga ajyanwa muri RDC, avuga ko ari wo bakeshaga amarariro n’amaramuko, gucika kwawo kukaba kwashyira benshi mu bwigunge.

Yagize ati: “Ku munsi w’isoko ntihashobora kubura inka nibura 200, ingurube 500 n’andi matungo atari make ahanyuzwa yambuka asanga abanyekongo baba bayaguze. Dufite impungenge ko ubwo ugiye kurangira wazateza impanuka imodoka yuzuye inka cyangwa ingurube harimo n’abantu igacuranguka ntihagire ikirokoka. Gucika kwawo cyaba ari igihombo gikomeye cyane ku baturage b’ibihugu byombi”.

Umunyeshuri wa GS Nyanza na we yagize ati: “Dufite impungenge ko nta gikozwe igihembwe cya 2 tutazacyiga kuko ntitwabona aho tunyura tujyayo, kandi haca benshi. Akarere kari gakwiye kuwushyira mu byihutirwa na ho ubundi gutegereza ko urangira byazaduteza ibibazo bikomeye cyane.’’

Mukamunana Verdiana utuye mu Mudugudu wa Muko avuga ko ucitse imyaka yahinzwe mu gishanga cyo hafi y’icyambu cya Mwaga idasaruwe, cyaba ari igihombo gikomeye cyane, kuko abaturage ba Ruharambuga, Bushekeri, Kagano n’indi mirenge bahahinga imyaka myinshi kandi ibinyabiziga byinshi bihaca bijya kuyizana ntibyaba bikigiye.

Ati’’ N’ubuhinzi bwo mu gishanga bwahagarara, ariko ntitwibaza ko bizagera aho, dutekereza ko ubuyobozi bubizi, bubitekerezaho”.

N’abantu bakuru bagaragaza impungenge zo kuhanyura.  

Mukakosita w’imyaka 80 y’amavuko yagize ati: “ Nkatwe abakecuru bwo sinzi ko tuzongera kuwunyuraho utarakorwa kuko ugiye gucika neza neza kandi aho ugenda uridukira haba ari harehare cyane ku buryo n’uwahanyura atabizi ,akuze nkanjye yagwamo akagwa muri uriya mugezi, agapfa. ‘’

Umuyobozi w’akarere ka Nyamasheke,Mupenzi Narcisse, yatangarije Imvaho Nshya ko  yawubonye,awuzi, bari gushakisha uburyo bwihuse bwo kuwukora.

 Ati: “Twarawubonye,turatekereza uburyo twahakora”.

Uwo muhanda ufite ibilometero birenga 4, uri mu Kagari ka Ntendezi, Umurenge wa Ruharambuga, ni umwe mu mihanda ifatiye runini imihahiranire y’Akarere ka Nyamasheke n’abanyekongo bahakura amatungo ku bwinshi bayajyana iwabo.

Unafasha mu migenderanire cyane abatuye Imirenge ya Ruharambuga, Bushekeri n’indi ihegereye gusarura imyaka bahinga mu gishanga kiri ku cyambu cya Mwaga, abanyeshuri b’Imidugudu ya Muko, Murambi na Gasharu bawunyuramo bajya kwiga muri GS Nyanza n’abandi bawukenera.

  • BAHUWIYONGERA SYLVESTRE
  • Mutarama 5, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE