Nyamagabe: Abasemberaga batujwe mu nzu za miliyoni 120 Frw yavuye mu bukerarugendo

  • AKIMANA JEAN DE DIEU
  • Ukuboza 5, 2023
  • Hashize amezi 6
Image

Imiryango 10 yo mu Murenge wa Kitabi, Akarere ka Nyamagabe irabyinira ku rukoma nyuma yo gutuzwa heza mu nzu zubatswe mu nkunga yatanzwe n’Urwego rw’Iterambere mu Rwanda (RDB) ivuye mu madovize yinjijwe n’ubukerarugendo bukorwa muri Pariki y’Igihugu ya Nyungwe.  

Miliyoni zisagaho gato 120 z’amafaranga y’u Rwanda ni zo zakoreshejwe mu kubakwa inzu 10 ndetse hanavugururwa isoko rito rihererye mu Isanteri y’ubucuruzi ya Kitabi.

Iyo miryango yari imaze igihe kinini isembera irashimira Akarere ka Nyamagabe na RDB byafatanyije mu kububakira inzu nziza zo guturamo muri uyu murenge ukora kuri Pariki y’Igihugu ya Nyungwe.  

Uwimpuhwe Jeaninne, umwe mu bahawe inzu avuga ko amaze igihe yaratawe n’umugabo we wishakiye undi mugore, byose bikaba byaraturutse ku make=imbirane yaterwanga n’uko batagiraga icumbi.

Yagize ati: “Njyewe nashakanye n’umugabo abonye tudafite ubushibozi bwo kuzibonera icumbi aranta arigendera ashaka undi mugore ariko ndashimira Akarere na RDB bampaye icumbi nkaba mbonye aho ngomba kuba n’abana banjye.

Yakomeje ashimira Perezida wa Repuburika Paul Kagame kubw’imiyoborere myiza yatumye ava mu buzima bubi atari yarigeze atekereza ko aazabuvamo, ati: “Kuba mbonye inzu n’ibikoresho byo mu nzu ntabwo mbyumva”.

Abatujwe bavuga ko baruhutse gusembera, bagashima ubuyobozi burangajwe imbere na Perezida Kagame

Undi na we yagize ati: “Ndishimye cyane kuko binsabye imyaka myinshi kugira ngo mbone icumbi. Ndabikesha ubuyobozi bwiza burangajwe imbere na Nyakubahwa Perezida wa Repubulika y’u Rwanda Paul Kagame butekerereza Abaturage bukabaha ibibakwiye. Nishimiye cyane ko nibura ibyo bagiye batubwira ko Pariki duturiye itabereyeho kutubangamira ahubwo ari iyo kutuzanira ibyiza mbibonye. Na twe tuzakomeza kuyibungabunga kurushaho. Nta muntu wayangiza tumureba.”

Umuyobozi w’Akarere wungirije ushinzwe Iterambere ry’Ubukungu, Thadee Habimana, yasabye abahawe izi nzu kuzifata neza kandi bakarushaho kubungabunga Pariki y’Igihugu ya Nyungwe kugira ngo bazakomeze kugerwaho n’ibindi byiza biyiturukaho.

Yagize ati: “Izi nzu muhawe zubatswe ku mafaranga Igihugu cyaduhaye yakomotse kuri iyi Pariki ya Nyungwe, muzifate neza kuko ni izanyu. Mwabonye ko twanabahaye n’isoko, rikwiye kubabera imbarutso ibageza ku iterambere rirambye. Ikindi iyi Pariki ya Nyungwe mugomba kuyibungabunga kugira ngo ibyiza byayo bizakomeze kubageraho n’ikindi gihe”.

Umukozi wa RDB ushinzwe guhuza ibikorwa bya Pariki z’Igihugu n’Abaturage Madame Marie Louise Mbabazi, avuga ko Pariki z’Igihugu zigomba kugira uruhare mu gufasha abazituriye kugira ubuzima bwiza, ariko na bo bakagira umukoro wo kuzibungabunga kugira ngo umusaruro zibyara wiyongere.

Yagize ati:” Ibi bikorwa byose byubakiwe abaturage kuri miliyoni 120, ni muri gahunda yuko amafaranga yinjizwa na Pariki agomba kugira ibikorwa akorera abaturage baturiye iyi Pariki kugira ngo bagire ubuzima bwiza. Ntabwo ubuzima bwiza bwaboneka nayo madovize ntiyaboneka mu gihe batagize uruhare mu kubungabunga Pariki y’Igihugu ya Nyungwe”.

Buri mwaka buri Murenge wegereye Pariki y’Igihugu ya Nyungwe ugenerwa amafaranga yo guteza imbere imibereho y’abaturage, muri gahunda yo gusaranganya 10% by’umutangwa n’ubukerarugendo mu mishinga y’iterambere n’imibereho myiza y’abaturage.

  • AKIMANA JEAN DE DIEU
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE