Nyamagabe: Abagabo basiramuwe ku buntu barabyinira ku rukoma

  • AKIMANA JEAN DE DIEU
  • Ukuboza 15, 2023
  • Hashize amezi 3
Image

Bamwe mu bagabo n’abasore bo mu Karere ka Nyamagabe bamaze kwisiramuza baravuga ko bishimiye iki gikorwa begerejwe bakagikorerwa ku buntu bagaragaza ko ubukene nk’imwe mu mbogamizi yababujije kubikora mbere.

Mu kiganiro n’Imvaho Nshya, bemeje ko bari bamaze igihe bumva bakaneye kwisiramuza (gukebwa) ariko bakabura ubushobozi n’ubwo hari bamwe babiterwa no kudasobanukirwa neza n’akamaro kabyo.

Rukundo Jean Luc w’imyaka 24 y’amavuko, yavuze ko kubura ubushobozi bwo kujya kwikebesha byatumye atabikorera igihe kubera  ko atuye kure y’ibitaro bikorerwaho.

Yagize ati: “Njyewe narabitekerezaga ko najya kwisiramuza, ariko ubushobozi bw’amafaranga bukambera intambamyi kuko kwa muganga batubwiraga ko bihenda, ariko usanga n’ubujiji bwaraduhumaga amaso ntitubishyiremo ingufu tukikomereza imirimo yacu. Kandi twebwe tunatuye kure y’ibitaro twagakwiye kujya gusabiramo iyi serivisi idufasha kongera isukiu no kwirinda zimwe mu ndwara zandurira mu mibonano mpuzabitsina.”

Minani Sylvere w’imyaka 36, avuga ko yajyaga abona bagenzi be bajya kwa muganga bakamubwira ko bihenda, akumva ntiyabikoresha kubera ubushobozi.

Yagize ati: “Njyewe najyaga mbona abandi bajya kwa muganga kwikebesha nababaza amafaranga nkumva ntahita nyabona ariko ndashimira aba baje kuduha iyi serivisi. Gusa banatubwiraga ko bibabaza tukabitinya, rwose barankoreye mbyuka njya guhinga ntabwo byambabaje kandi baranahapfukuye mbese ntabwo nari kuzabikora iyo hataza aba basirikare barimo kudufasha kugira isuku no kugabanya ibyago byo kwandura indwara zandurira mu mibonano mpuzabitsina.”

Sebukayire Protogene w’imyaka 39, avuga ko atabitekerezaga kumva ko yajya kwikebesha ariko nyuma yo gusobanurirwa ko harimo no kugira isuku bikanafasha kwirinda virusi itera SIDA yahisemo kwikebesha.

Yagize ati: “Ntabwo nabitekerezaga ariko nasanze bigisha numva ukuntu bizadufasha kugira isuku  ndetse umuntu wikebesheje bishobora kumufasha kwirinda virusi itera SIDA ku kigero cya 60% numvise gahunda nk’iyi itanshika mpitamo kwikebesha nanjye”.

Minisiteri y’Ubuzima yemeza ko gukebwa ku mugabo bimuha amahirwe yo kugabanya ibyago byo kwandura virusi itera SIDA n’izindi ndwara zandurira mu mibonano mpuzabitsina ku kigero kiri hejuru ya 60%.

Umuyobozi w’Akarere ka Nyamagabe Hildebrand Niyomungeri, yabwiye Imvaho Nshya ko bishimiye iki gikorwa kirimo gukorwa kizafasha abagabo n’abasore kwikorera isuku kandi bikaba bizabafasha kugabanya ibyago byo kwandura indwara zandurira mu mibonano mpuzabitsina.

Yagize ati: “Turishimira ko ubwitabire bugenda buzamuka kandi bigakorerwa ubuntu ndetse kuva twatangira kino gikorwa abagera kuri 663 bamaze gukebwa. Ibi rero birafasha abagabo kugira  isuku ndetse bikanafasha kwirinda kwandura Virusi itera Sida nkuko ubushakashatsi bwerekanye ko uwakebwe bimurinda kwandura ku kigero cya 60% ndetse no kugabanya ibyago byo kwandura n’ izindi ndwara zandurira mu mibonano mpuzabitsina mu gihe uwayikoze adakoresheje  neza agakingirizo”.

Ubushakashatsi bwa Gatandatu ku buzima n’imibereho y’abaturage n’ubuzima (RDHS) bwagaragaje ko abagabo bafite imya 14-49, abagera kuri 56% basiramuye muri bo 51% basiramuwe n’abaganga babyigiye mu gihe 3% basiramuwe n’abahanga gakondo cyangwa abandi.

Nkuko ubu bushakashatsi bubigaragaza mu Mujyi wa Kigali ni ho hari abagabo benshi bikebesheje naho Intara y’Iburengerazuba ikagira 62,6%, iy’Iburasirazuba ikagira 56.3% iy’Amajyaruguru ifite 49.8% mu gihe intara y’amajyepfo ifite abagera kuri 41.1%.

Ugendeye ku madini, abagabo b’Abanyagatolika bisiramuje mu Rwanda ni 52.9%, Abaporotesitanti ni 57%, Abadivantisiti ni 57.2%, Abayisilamu ni 90.7%, Abahamya ba Yehova ni 57%, Abatagira idini babarizwamo ni 47.5%.

Akarere ka Nyamagabe mu gihe hatangazwaga ubu bushakashatsi kari gafite abagabo badasiramuye bagera kuri 75%. Bivuze ko nibura mu bagabo 100 bari hamwe haba harimo 25 gusa basiramuye bingana na 25%.

Iki gikorwa kirimo gukorwa ku bufatanye n’ingabo z’igihugu n’umuryango wa AHF (Alliance for Health Communities) n’ibigo nderabuzima 11 byo mu mirenge 9 kuri 17 yo mu Karere ka Nyamagabe mu bukangurambaga buzamara ukwezi kuva tariki ya 04-22 ukuboza 2023.

  • AKIMANA JEAN DE DIEU
  • Ukuboza 15, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE