Nyagatare: Ibigo mbonezamikurire byabaye igisubizo ku kurwanya igwigingira

  • NSHIMIYIMANA FAUSTIN
  • Gashyantare 9, 2024
  • Hashize amezi 4
Image

Ibigo mbinezamikurire by’abana bato byafashishe mu gihashya igwingira mu bana, gutanga amata byatanze umusaruro igwingira riva kuri 36.8% muri 2015 rigera kuri 30.7% muri 2020 ndetse ubu rikaba rigeze kuri 29%.

Bamwe mu babyeyi bafite abana barererwa mu bigo mbonezamikurire by’abana bato bavuga ko kuba barashyiriweho gahunda yo guha abana amata bituma biga bafite imikurire myiza n’ubuzima bwiza kuko babona intungamubiri nziza bigakumira ko bagwingira.

Ababyeyi bafite abana mu Kigo mbonezamikurire cy’Imena gikorera mu Kagari ka Cyabayaga, mu Murenge wa Mimuli mu Karere ka Nyagatare bavuze ko batarazana abana babo mu bigo mbonezamikurire byari bigoranye kubabonera amata bitewe n’amikoro make.

Kuri ubu bashimira politiki nziza yo gushyira umuturage ku isonga no guteza imbere imibereho myiza y’abaturage batarobanuye, kuko yatumye abana babo bashyirwa mu bigo mbonezamikurire bifasha abana babo kubona indyo yuzuye, kugira ubumenyi no kuba batekanye mu gihe bo bagiye mu mirimo yabo ya buri munsi.

Mukabahizi Estoienne avuga ko babohotse kuko bahoranaga impungenge z’abana babo mu gihe babasize mu ngo kandi ntawubitaho. Gusa ariko yemeza ko byari bigoranye kubonera umwana we amata ariko kuri ubu ayaherwa mu kigo mbonezamikurire agakura neza mu gihagararo no mu bwenge.

Yagize ati: “Nta bushobozi bwo kugura amata buri gihe mbona bitewe nuko ntari umworozi ariko umwana wanjye w’imyaka hafi itatu aho yagiriye mu irerero nta nzara imwica kuko amata ayabonera ku gihe. Mu gihe ari mu masomo birumvikana ko nta mururumba agira kuko abana bose bahabwa amata kandi njya mu mirimo yanjye nta kibazo, nahurira nawe mu rugo nkabona aranezerewe kandi nkabona akunze kwiga.”

Bihoyiki Alphonsine nawe yagize ati: “Umwana wanjye ataratangira kunywa amata ku ishuri, najyaga nifashisha igikoma cy’ibigori n’amasaka gusa. Ubu rero biratandukanye kuko anywa amata aho yiga yataha nanjye nkongeraho indyo yuzuye akagira ubuzima bwiza.”

Tuyiringire James yagize ati: “Mu gihe gito ahamaze usanga amaze kumenya gusoma inyuguti no kubara kandi ukabona afite ikinyabupfura kuko iyo ageze mu rugo asuhuza abo asanze; ubona yaratinyutse atakigira amasoni.”

Ntibicwa n’inzara kubera amata bahabwa ahubwo bahorana akanyamuneza kandi bakiga neza

Mukamutara Beatrice urera abana mu Kigo mbonezamikurire cy’Imena avuga ko abana bahawe amata bagira ubuzima bwiza bakiga neza batuje bitewe n’amasomo bigisha afasha abana gukanguka mu bwonko no gukura neza.

Yagize ati: “Iyo bamaze kunywa amata usanga batuje n’uwo wabonaga ko ashonje usanga nta kibazo agifite, iyo bigeze mu masaha maremare umwana ntacyo yafashe usanga ibyo uri kumubwira atari kukumva, ariko iyo umaze kubaha amata ubona abana bishimye bagahaguruka bakabyina kandi ugasanga ibyo bize barabifata neza.”

Umuhuzabikorwa wa gahunda mbonezamikurire y’abana bato mu Karere ka Nyagatare Gatete Katabogama Mike, yavuze ko kuva gahunda y’imbonezamikurire yatangira imaze gutanga umusaruro.

Yagize ati: “Hari ubwo usanga hari imiryango itaragira inka ku buryo umwana ashobora gutaha akabona amata, none ubu umwana ayabonera ku ishuri. Ubu tuvugana hamaze gukira abana 163 bari bafite imirire mibi, twavuye kuri 36.8% ubu tugeze kuri 29% n’uduce turengaho mu kurwanya igwingira, ariko niyo urebye mu buryo bw’igihagararo cy’abana ubona ko harimo impinduka nini cyane.”

Akomeza asobanura ko ababyeyi bakwiye kongera uruhare rwabo mu kwita ku mwana no mu gihe ari mu rugo ntibabiharire imbonezamikurire gusa.

Ati: “Turasaba ababyeyi rero gukomeza guhashya ikibazo cy’igwingira mu bana kuko mu gihe bari mu rugo baba bakwiriye kubagaburira indyo yuzuye kandi na bo bakabigisha nk’uturirimbo dukangura ubwonko.”

Ubuyobozi bw’Akarere ka Nyagatare butangaza ko mu mwaka w’ingengo y’imari wa 2023-2024 buri gukoresha miliyoni 126 z’amafaranga y’u Rwanda mu kurwanya imirire mibi n’igwingira mu ngo mbonezamikurire z’abana bato, dore ko aho batangiriye gutanga amata byatanze umusaruro igwingira rikava kuri 36.8% muri 2015 rikagera kuri 30.7% muri 2020 ndetse n’ubu rikaba ryaragabanyutse bigaragara kuko rigeze kuri 29%.

Mu Karere ka Nyagatare habarurwa ingo mbonezamikurire z’abana bato 1 593 ziri hirya no hino mu Mirenge 14 igize ako Karere.

  • NSHIMIYIMANA FAUSTIN
  • Gashyantare 9, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE