Nyagatare: Abahinzi b’umuceri biyubakiye sitasiyo ya lisansi ya miliyoni 350 Frw

  • NSHIMIYIMANA FAUSTIN
  • Ukuboza 13, 2023
  • Hashize amezi 6
Image

Bamwe mu banyamuryango ba Koperative y’Abahinzi b’Umuceri mu kibaya cy’umugezi w’Umuvumba (CODERVAM) mu Karere ka Nyagatare, bishimira ko bamaze gutera imbere kuko biyubakiye ibikorwa remezo birimo sitasiyo ya Lisansi na Mazutu ifite agaciro ka miliyoni 350.

Kuri ubu barishimira ko ideni ryose ryarangiye, umutungo wa sitasiyo ya Lisansi ukaba wiyongeraho inyubako yo gukoreramo, ibinamba n’ibindi bikorwa remezo bifite umutungo wa miliyoni zisaga 500 z’amafaranga y’u Rwanda.

Sitasiyo ya Lisansi bayubatse ku muhanda Nyagatare-Rukomo-Base ahitwa Cyabayaga, aho itanga serivisi ku bafite ibinyabiziga bakorera muri uwo muhanda.

Intambwe bishimira bavuga ko bayiteye nyuma yuko bahuye n’igihombo cya miliyoni 400 z’amafaranga y’u Rwanda kuva mu mwaka wa 1996 kugera muri 2012 bishyuzwaga n’Ikigo cy’Igihugu cy’Imisoro n’Amahoro (RRA), abantu ku giti cyabo ndetse na kompanyi zitandukanye.

Perezida wa CODERVAM Nyirandikubwimana Gaudance, yavuze ko bahisemo ishoramari rya Lisansi na Mazutu kugira ngo bakomeze biteze imbere bitewe n’uko inyungu babona bakwiye kuzishora mu bindi bikorwa bibyara inyungu.

Yagize ati: “Twageze ku rwego rushimishije rw’ishoramari rya lisansi na Mazutu ariko inzira iracyari ndende kuko tugomba kurushaho tugatera imbere, umunyamuryango wacu wa koperative agomba gukomeza kugira imibereho myiza, abana bacu bakagira ubuzima bwiza.”

Nyirandikubwimana Gaudance yakomeje avuga ko kandi ishoramari rizakomeza no mu bindi bikorwa bibyarira inyungu Koperative bigateza imbere abanyamuryango.

Yagize ati: “Twaguye ubutaka tukaba duteganya kubakamo hoteli igizwe n’inzu zigeretse kugira ngo na yo izadufashe guteza imbere abanyamuryango birushijeho.”

Umuyobozi w’Akarere ka Nyagatare Gasana Stephen, yavuze ko Akarere kazakomeza gufasha amakoperative kurushaho kuyegereza ibikorwa remezo no kubibungabunga kugira ngo bitangirika bigasubiza inyuma iterambere ry’amakoperative.

Yagize ati: “Leta yafashishije koperative kuzegereza ibikorwa remezo kugira ngo umusaruro urusheho kuzamuka, koperative zihabwa ibyangombwa ndetse ziyubakira ubushobozi zihabwa ibyangombwa. Ni yo mpamvu na bo rero bakwiye kugira uruhare mu gusana ibyo bafitiye ubushobozi ariko natwe nk’Akarere tukabafasha ndetse tukabashyigikira kugira ngo ibikorwa byubatswe bibungabungwe kandi biteze imbere abagize koperative.”

Minisitiri w’Uburinganire n’Iterambere ry’Umuryango Dr. Uwamariya Valentine, asaba abanyamuryango ba Koperative CODERVAM gukoresha neza umutungo bakura muri koperative bakirinda icyakurura amakimbirane mu miryango yabo kuko bidindiza iterambere ry’imiryango n’Igihugu.

Yagize ati: “Bakwiye kumenya gukoresha neza umutungo n’inyungu bakura muri koperative kuko hari igihe batangira kuwukoresha nabi kandi ari amafaranga babonamo babanye neza, ariko umwe mu bashakanye yatangira kuwukoresha nabi hakaba intonganya n’amakimbirane bikabasubiza inyuma mu bukene.”

Yakomeje avuga ko kuba abagize iyo koperative barateye imbere bisobanuye ko bakwiye no gutera imbere mu mahoro n’umutekano mu muryango.

Ati: “Kuba barateye imbere rero ntibivuze ko ari bwo ibibazo bikwiye kuvuka kandi barabanye muri bikeya babikorera hamwe kugira ngo bagera ku iterambere. Ni umwanya mwiza wo kwishimira ibyo bagezeho ariko bakirinda gusubira inyuma kuko iyo bashyamiranye ntibumvikane habaho gusesagura umutungo w’urugo.”

Koperative y’Abahinzi b’Umuceri mu kibaya cy’Umuvumba (CODERVAM) yatangiye mu mwaka 1987, ikaba ifite abanyamuryango 1,300 barimo abagore 586 n’abagabo 714.

Ikaba ihinga umuceri ku buso bungana na hegitari 400 aho mu gihembwe cy’ihinga cya 2023B babonye umusaruro ungana na toni 2,156.

Kuri ubu kandi bakaba bishimira ko bavuguruye inyubako zaho bakorera n’ibikoresho birimo bifite agaciro ka miliyoni 60 z’amafaranga y’u Rwanda.

CODREVAM ibikorwa imaze kugeraho birimo umutungo ufite agaciro ka miliyoni 500 z’amafaranga y’u Rwanda.

  • NSHIMIYIMANA FAUSTIN
  • Ukuboza 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE