Nyabihu: Ibigori byaciwe ibisage bigiheka byera intagarane

  • NGABOYABAHIZI PROTAIS
  • Mutarama 11, 2024
  • Hashize amezi 5
Image

Bamwe mu bahinzi b’ibigori bo mu Karere ka Nyabihu bararirira mu myotsi nyuma y’aho ibigori bahinze byaciwe imitwe bigiheka, bigatuma byera intagarane.

Abo bahinzi bo mu Murenge wa Rugera, bavuga ko batewe igihombo n’abaje bababwira ko baje kubongera umusaruro, bo muri Koperative KOTEMI yaje ikuraho ibisage kandi bo ngo bari bamenyereye ko ari yo nzira nziza yo kugira ngo ibigori bibe byabangurirana.

Murenzi Francois wo mu Murenge wa Rugera, Akagari ka Nyaritembe avuga ko nta musaruro biteze kubera ko ibigori byabo ngo bisa n’aho nta musaruro bazabona.

Yagize ati: “Abantu baje hano ngo baje gutubura ibigori, bimaze gukura baraje baca imitwe ibigori ngo barimo kubibangurira, ariko kuri ubu iyo turimo gutonora ikigori dusanga ari ibitiritiri gusa, ibindi ari ibitarutaru, twifuza ko bazaduha indishyi y’akababaro kuko baduteye igihombo, nkanjye nezaga Toni 2 z’ibigori ariko ntabwo nakubwira ngo nzakira inzara, impeke z’ibigori ni nkeya cyane ku kigori”.

Nyiramahirwe na we ni umwe mu bahinga ibigori mu kibaya cya Rugera na we ashimangira ko bazahura n’igihombo kinini cyane ndetse ngo akaba yiteze kutazihaza mu biribwa mu minsi iri imbere.

Yagize ati: “Hano haje koperative itugurisha ku kilo amafaranga ibihumbi 5, none ibigori byamaze guheka baraza bakuraho ibisage ngo ni ibigore, basigamo utugori dutoya ngo tuzabibangurira aho kubibangurira ngo bifate byibereye ibihuhwe, none ibigori byarapfuye mu buryo bugaragarira amaso, nkanjye aho nakuraga Toni 6 nta n’ebyiri nzakuramo”.

Yongeyeho ko bizamutura mu bukererwe bwa banki kubera ko nta musaruro yiteze ngo azagurishe, baraje ibigori bimwe babica imitero

Hakizimana Jean Claude perezida wa KOTEMI (Koperative Terimbere Muhinzi, Ibigori n’Ibishyimbo) ishyirwa mu majwi ko ari yo yaciye ibisage ibyo bigori avuga ko byakozwe mu rwego rw’ubutubuzi.

Abahinzi bavuga ko ibigori byabahombeye

Amara abahinzi impungenge zo guhomba ngo kuko mu kugura biriya bigori hatazitabwa ku bilo cyangwa ibigori bihunguye ahubwo bazagura ikigori uko kiri kose.

Hakizimana akomeza avuga ko kiriya gikorwa cyakurikiranywe n’umukozi ushinzwe ubuhinzi mu Karere ka Nyabihu iyi gahunda rero ikaba yizewe kandi ngo barabihuguriwe kandi bakora ingendoshuri.

Yagize ati: “Akarere kaduhaye urugendoshuri  mu Karere ka Kamonyi kandi igeragezwa twarikoreye mu Kagari  ka Gakoro kandi   byagaragaye ko imbuto ari nziza nyuma yaho byagiye mu gishanga cyose mu Kagari ka Nyarutende, byabereye mu nteko y’abaturage n’ikompani yitwa Tri Seed, kandi abahinzi bagurijwe amafaranga yo guhingisha bagendeye uko buri wese ubutaka bungana hari abahawe kuva ku mafaranga 20 000 kugera kuri 80 000, kandi abajyanama b’ubuhinzi bose baraje barabisonuriwe  banahawe ifumbire”.

Umukozi w’Akarere ka Nyabihu ushinzwe ubuhinzi Musango Didace avuga ko amakuru nawe ayazi ko biriya bigori byatewe mu rwego rwo gutubura.

Yagize ati: “Ikibazo kirazwi tugiye kureba iyo kompanyi yitwa Tri Seeds turebe impamvu ibyo bigori bifite ikibazo, ikindi ni uko bariya bahinzi bari mu bwishingizi nta gihombo bazahura nabyo”.

Abataka igihombo bazahura nacyo ni abahinzi 217, bahinze kuri Hegitari zisaga 10, mu gishanga cya Nyaritende ho muri Rugera.

  • NGABOYABAHIZI PROTAIS
  • Mutarama 11, 2024
  • Hashize amezi 5
TANGA IGITEKEREZO
confiance Mugisha says:
Mutarama 11, 2024 at 8:08 pm

Murakoze kubwiyi nkuru! Aba bahinzi bazokerwe ubuvugizi niyo koperative KOTEMI ikurikiranwe. Isobanure neza aho ubwo bushakashatsi yabukuye buhindura ibyo abantu twese tuzi neza! Kuko nubwo byakozwe ntamusaruro mwiza byatanze!

Murakoze! Ariko kandi byaba byiza munakoze inkuru kukibazo cyumuhanda wa Musanze-Vunga, kuko dutegereje kaburimbo igihe kirekire pe! Kandi byose bijyana niterambere!

Karori says:
Mutarama 17, 2024 at 5:10 am

Ubutubuzi niko bigenda. Bariya bahinzi ntibakwiriye gucika intege ahubwo bareba impamvu habayeho ikibazo cyo kuzamo impeke intaragurike muri ibyo bigori ubutaha kigakosorwa. Kuko iriya ntabwo ari innovation yakozwe niyo nzira yo gutubura ibigori bya hybrids. Abahinzi mwari mubonye amahirwe yo kuba abatubuzi. Mukwiye guhindura uburyo mwakoze ibyabaye bikababera amasomo na mwarimu. Ubutaha mukabinoza neza. Kandi muzabonamo inyungu nyinshi. Ababaca intege mubime amatwi kuko barahari cyane cyane abagamije gukomeza kuvangavanga imyaka banshaka kwigumira mu buhinzi bwa Gakondo.

Karori says:
Mutarama 17, 2024 at 6:24 am

Ubutubuzi niko bigenda. Bariya bahinzi ntibakwiriye gucika intege ahubwo bareba impamvu habayeho ikibazo cyo kuzamo impeke intaragurike muri ibyo bigori ubutaha kigakosorwa. Kuko iriya ntabwo ari innovation yakozwe niyo nzira yo gutubura ibigori bya hybrids. Abahinzi mwari mubonye amahirwe yo kuba abatubuzi. Mukwiye guhindura uburyo mwakoze ibyabaye bikababera amasomo na mwarimu. Ubutaha mukabinoza neza. Kandi muzabonamo inyungu nyinshi. Ababaca intege mubime amatwi kuko barahari cyane cyane abagamije gukomeza kuvangavanga imyaka banshaka kwigumira mu buhinzi bwa Gakondo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE