Nyabihu: Bagowe no kutagira aho bugama muri Gare ya Mukamira

  • NGABOYABAHIZI PROTAIS
  • Werurwe 17, 2024
  • Hashize ukwezi 1
Image

Abagana n’abakoresha Gare ya Mukamira iherereye mu Karere ka Nyabihu, batewe impungenge no kutagira aho bugama imvura n’izuba ryinshi kuko nta tuzu abagenzi bategererezamo tukihaba.

Abaturanye n’iyo gare bavuga ko babangamirwa n’abagenzi biroha mu ngo zabo baza kugama, bikaba bibateza umutekano muke, ndetse rimwe na rimwe imodoka zije igiye imvura irimo kugwa zikabasiga.

Iyi gare ifasha abagenzi bava n’abajya mu Karere ka Rubavu, mu Karere ka Nyabihu, Ngororero na Musanze. Iyo binjiyemo imvura ikagwa bahita bakwira imishwaro bajya gushaka aho kugama muri resitora no mu zindi nzu z’ubucuruzi ziri hafi aho.  

Abagenzi bavuga ko rimwe na rimwe bikurura amakimbirane abandi ngo bakibwa ibyabo, muri uko guhuzagurika bahunga imvura iyo bategereje imodoka.

Bavuga ko ubundi iyo Gare yigeze kugira utuzu twinshi abantu bugamagamo ariko twagiye dushiramo, none hasigayemo akazu kamwe gusa.

Mukamurigo Manizabayo Collette yagize ati: “Iyi Gare ya Mukamira ni yo nabonye isigaranye akazu kamwe, abagenzi baruhukiramo iyo bateze imodoka. Iyo imvura iguye urumva ni ho twugama ariko muri iyi minsi turimo kugorwa no kubona aho turuhukira cyangwa twugama, twifuza ko turiya tuzu twongera kubakwa kuko akazu kamwe ntigahagije.”

Mukamurigo akomeza avuga ko turiya tuzu two muri gare ari ingirakamaro ngo kuko n’iyo umuntu agiye kuvuza mugenzi we amwicazamo mu gihe aba ategereje imodoka, ikindi ngo n’imizigo iba ifite umutekano.

Yagize ati: “Nk’ubu iyo umuntu amerewe nabi, afite intege nke, umujyanye kumuvuza, uba umwicaje muri utwo tuzu ukajya kumushakira amazi. Imizigo yacu na yo iyo imvura iguye turayikurubana nk’ibigori, inkweto bimwe bikagenda bisosoka ubwo n’insoresore zititwara neza hano zimwe zigatwara ibyacu n’aho tugiye kugama bakatwinuba.”

Umwe mu bafite resitora hafi ya Gare ya Musanze, we avuga ko mu gihe imvura iguye hari bamwe mu bagenzi baza kubabangamira, bakabuza amahwemo abakiriya bakiriye.

Muri Gare ya Mukamira hasigayemo akazu kamwe bugamamo, abatakagiyemo bagakwira imishwaro

Yagize ati: “Abava muri gare baje kugama baratubangamira bakabangamira n’abakiriya bacu. Tekereza kuza muri resitora ukarya abantu 10 bareba mu isahane yawe wagira apettit se? Inzego bireba nizubake iyi gare natwe twisanzure.”

Nshakirahe Joseph we asanga no kuba utuzu bugamamo izuba n’imvura twarasenyutse ntidusanwe ari ikibazo gishimangira ko baratereranwe.

Yagize ati: “Iyi gare ibibazo byayo rero ni uruhuri kuko yarirengagijwe cyane mbese ni nka kwa kundi umuntu abaho atagira kirengera. Ni gute gare nk’iyi yahozemo utuzu twugamagamo izuba n’imvura kugeza ubu hakaba nta kazu na kamwe karangwamo? Kandi utwo tuzu twagiye dusenyuka buhoro buhoro ubuyobozi burebera, kuko tumwe abashoferi baratugongaga, utundi umuyaga uradutwara, ahubwo njye nibaza ibikoresho byari bitwubatse byariwe na nde?”

Umuyobozi wungirije w’Akarere ka Nyabihu ushinzwe iterambere ry’ubukungu Habanabakize Jean Claude, avuga ko  iyi Gare itakiri mu maboko y’Akarere.

Yagize ati: “Gare ya Mukamira ntikigenzurwa n’Akarere, ibibazo birimo rero twabiganira n’uyikoresha. Ubu ifite umufatanyabikorwa, ubu rero birasaba ko tuganira na we tukareba imigambi afite kuko natwe dusanga itakijyanye n’igihe, noneho gahunda afite tukazayimenyesha abaturage bakamenya gahunda igihe izatangirira.”

Kugeza ubu Gare ya Mukamira icungwa na Rwanda Federation of Transport Cooperatives (RFTC), Umuyobozi wa Jali Imvestimen LTD Nsengiyumva Benoit akemeza ko izatangira kubakwa mu minsi iri imbere.

Yagize ati: “Kuri ubu Gare ya Mukamira ntabwo biri hafi ngo yubakwe mu buryo twumva tubyifuzamo, ariko ubu harimo gushakishwa ingengo y’imari kuko hari izindi zabanje kubakwa nk’iya Rubavu n’izindi. Aha rero nabwira abagana iriya gare gukomeza kwihangana kuko ikibazo natwe turakibona, turiya tuzu tumwe twagiye tugongwa n’abashoferi utundi dutwarwa n’imvura yabaga irimo umuyaga mwinshi.”

Gare ya Mukamira yubatswe mu mwaka wa 2003, ikaba ikoreshwa cyane kuko iri ku isangano ry’imihanda minini ihuza Intara y’Iburengerazuba, iy’Amajyepfo n’ioy’Amajyaruguru.

Ahahoze utuzu muri gare abagenzi bicara hasi iyo bategereje imodoka
  • NGABOYABAHIZI PROTAIS
  • Werurwe 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE