Ngororero: Bamaze imyaka 2 batabona amazi kubera umuyoboro wangijwe n’ibiza

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
Image

Imyaka ibiri irashize amavomo yarakakaye kubera umuyoboro w’amazi waturukaga mu Karere ka Muhanga ugeza amazi ku baturage bo mu Karere ka Ngororero wangijwe n’ibiza.

Abaturage bo mu Tugari twa Kanseke na Mugano ho mu Murenge wa Ngororero, Akarere ka Ngororero, baravuga ko kuri ubu bagorwa cyane no kubona amazi kuko uwo muyoboro waturukaga mu Murenge wa Kibangu, Akarere ka Muhanga usa n’uwibagiranye.

Abo baturage bavuga ko ibiza byangije ibitembo byambukaga uruzi rwa Nyabarongo mu mwaka wa 2021, kuva icyo gihe kugeza uyu munsi bakaba bari mu bwigunge bwatewe no kuba bamaze imyaka ibiri batorohewe no kubona amazi meza.

Abavuganye na Imvaho Nshya bavuga ko ayo mazi bayahawe mu mwaka wa 2020 ariko nyuma y’imyaka itatu gusa bagahita bayamburwa n’ibiza.

Ni umuyoboro w’amazi wari wabakuye mu bwigunge kuko wagezaga amazi ku bigo by’amashuri bibiri by’ayisumbuye, amashuri abanza ane, ibigo nderabuzima bibiri, amavuriro y’ingoboka atatu n’ahandi hahurira abantu benshi.

Ayo mazi yageraga mu Murenge wa Ngororero n’uwa Sovu, abaturage bakaba bari borohewe cyane no kubona amazi meza ariko bikaza kurangira kuri ubu bakora ibilometero byinshi bajya gushaka amazi hafi y’uruzi rwa Nyabarongo.

Ibyo ngo bigira n’ingaruka ku myigire y’abana kuko buri wese asabwa kugera ku ishuri yitwaje agacupa k’amazi nay o aba yavomye mu bishanga.  

Uwitonze Evergiste atuye mu Kagari ka Mugano, yemeza ko hashize imyaka ibiri batavoma bityo bakaba bagorwa no kubona amazi meza.

Yagize ati: “Hashize imyaka 2 tutavoma kandi bari baraduhaye amazi meza yaturukaga i Muhanga akambuka umugezi wa Nyabarongo ariko batubwiye ko ngo itiyo yayamburaga yatwawe n’amazi ya Nyabarongo mu gihe cy’ibiza ariko ntabwo dukwiye kumara iki gihe cyose hatarasanwa”.

Barirwanda Jean Claude atuye mu Kagari ka Kanseke avuga ko bibabaje kuko bari batandukanye no kudakoresha amazi mabi akavuga ko ubuzima bari baribagiwe babusubiyemo.

Amavomo yarakakaye nta mazi aherukamo, imyaka ibiri irashize

Ati: “Biratubabaje kuko twari twarahawe amazi meza twarasezeye kuvoma amazi mabi ariko kuva mu myaka 2 ishize biragoranye rwose tujya kudaha mu mibande kandi iyo bakurikira bakayasana byari kugenda neza”.

Mugengana  Desire avuga ko ubuyobozi bukwiye kubasanira uyu muyoboro kuko wari ubafatiye runini harimo no kubafasha guhangana n’indwara zikomoka ku mwanda, akemeza ko inzego bireba zikwiye kubikurikirana zigakemura ibi bibazo byatuma hagaragara ibyorezo by’indwara zikomoka ku mwanda.

Yagize ati: “Uyu muyoboro wari wadufashije kuko twanywaga kandi tugakoresha amazi meza kuko ntabwo twari tukirwara indwara zikomoka ku mwanda kandi twagiye tubwira inzego ko zadufasha zikayasana ariko ntabwo bigeze babikora. Ibi rero bishobora kuzatuma twongera kurwara indwara zikomoka ku mwanda kuko ni ho bigana”.

Umuyobozi w’Akarere ka Ngororero Nkusi Christophe, yemeza ko hashize imyaka 2 uyu muyoboro warangiritse ndetse ngo bandikiye inzego zitandukanye kugira ngo zibafashe gukemura icyo kibazo.

Yagize ati: “Uyu muyoboro wavaga i Muhanga wambuka mu Kagari ka Kanseke uciye muri Nyabarongo utwarwa n’ibiza tubona rero ko bigoranye ko twawusana ariko twabonye bigoranye kongera kwambutsa amazi.  Ariko twandikiye Ikigo gishinzwe amazi, isuku n’isukura mu Rwanda (WASAC Group Ltd) tubasaba ubwunganizi mu bya tekinike kugira ngo badufashe kwiga uburyo hasanwa.”

Yakomeje agira ati: “Ariko turanatekereza ko mu gihe bitarakorwa twazakoresha umushinga w’umuyoboro w’amazi wa Muhembe uzageza amazi mu Murenge wa Ngororero uvuye muri Gishwati mu Murenge wa Muhanda dutegereje ko urangira, hagasuzumwa ko wazafatirwaho amazi akagezwa mu gice uyu muyoboro wahaga amazi mu gihe uyu muyoboro uzaba wananiranye ko wasanwa”.

Uyu muyoboro ni na wo wajyanaga amazi mu Mudugudu w’Icyitegererezo wa Kanyenyeri uherereye mu Murenge wa Ngororero, bikaba bigoranye ko wakongera gucishwamo amazi kubera ibiza bikunze guterwa n’umugezi wa Nyabarongo.

AKIMANA JEAN DE DIEU

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE