Ngororero: Amavomo bahawe amaze imyaka irenga 3 yarakakaye

  • NGABOYABAHIZI PROTAIS
  • Gashyantare 26, 2024
  • Hashize amezi 2
Image

Abaturage bo mu Murenge wa Matyazo, Akarere ka Ngororero, bavuga ko bamaze imyaka itatu bahawe amavomo yakakaye hatarashira ukwezi none ubu bavuga ko babangamiwe no kuba bavoma ibirohwa bafite amavomo abegereye.

Abo baturage bavuga ko babonye amazi mu byumweru bitatu bya mbere nyuma yo gushyikirizwa amavomo mashya n’ubuyobozi, nyuma y’aho basubira kuvoma amazi y’ibirohwa ava mu migezi ya Mukungwa na Rubagabaga.

Muvunyi Jean Pierre yemeza ko bavomye amazi meza mu muhango wo gutaha ayo mavomo.

Yagize ati: “Umunsi batashye ku mugaragaro ariya mavomo twahise twumva ko tugiye guca ukubiri n’indwara zikomoka ku mwanda harimo inzoka zo mu nda. Ariko tumaze imyaka 3 tuvoma mu migezi ya Rubagabaga na Mukungwa  nyamara ziriya robine tuzirebesha amaso; tubabajwe gusa no kuba hari umutungo wakoreshejwe bubaka iriya miyoboro”.

Iranzi Antoinette we avuga ko iriya migezi ari iy’umuhango ashingiye ko byabuze gikurikirana.

Yagize ati: “Umunsi ariya mazi dutangira kuyabura kuko twavomye mu gihe gito kitageze no ku kwezi. Twabibwiye Inzego z’ibanze kugera ku Karere, ariko ari abaterankunga ku bufatanye n’Akarere ndetse n’Akarere nta n’umwe wigeze akurikirana iki kibazo kandi gikomeye ku mpande ebyiri. Ari umutungo warahatikiriye ndetse natwe twongeye kuvoma ibirohwa”.

Uyu mubyeyi akomeza avuga ko nyuma yo guhabwa amazi haje ibiza, ariko ngo byari kuba byiza iyo iki kibazo gikurikiranwa imiyoboro igasanwa.

Yagize ati: “Ni ikibazo gikomeye kuvoma iborohwa uciye kuri robine mu isibo yawe. Ubu iyo dushaka amazi dutuma abana bayatuzanira ku magare bayakuye mu Karere ka Nyabihu, ijerekani imwe ku mafaranga 200. Twifuza ko natwe Perezida yaduha amazi nk’uko yabikoreye abaturage bi mu Murenge wa Gaseke duhana imbibe.”

Umuyobozi wungirije w’Akarere ka Ngororero ushinzwe iterambere ry’ubukungu Uwihoreye Patrick, yavuze ko icyo kibazo batari bakizi ariko ngo aho bakimenyete agiye kugikurikirana.

Yagize ati: “Tumaze gukora imiyoboro myinshi myiza ku bufatanye na World Vision muri uyu Murenge dufite amazi ahagije. Birashoboka ko uwo muyoboro waba warangirijwe n’ibiza biroroshye guhita tubikora. Ubu ingengo y’imiri yo kubikora irahari mu minsi iri imbere tugiye kubikurikirana.”

Kugeza ubu aho za robine zubatswe hatangiye kuzengurukwa n’ibihuru, ahandi abana birirwa bazikinira hejuru.

Abaturage basaba ko bahabwa amazi meza kugira ngo birinde indwara zikomoka ku mwanda cyane ko ubushakashati bugaragaza ko 90% by’indwara bikomoka ku mwanda ziterwa no kunywa cyangwa gukoresha amazi mabi.

Ziriya robine zatashywe ku mugaragaro mu mwaka 2021 ugamije guha amazi meza abaturage bibumbiuye mu miryango 204 yo muri Matyazo.

  • NGABOYABAHIZI PROTAIS
  • Gashyantare 26, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE