Ngoma: Babangamiwe n’Ivuriro ry’Ingoboka rimaze amezi 4 rifunze

  • NSHIMIYIMANA FAUSTIN
  • Gashyantare 6, 2024
  • Hashize amezi 4
Image

Bamwe mu baturage batuye mu Kagari ka Kibare, Umurenge wa Mutenderi, Akarere ka Ngoma babangamiwe no kuba hashize amezi ane ivuriro ry’ingoboka rya Kibare rifunzwe ku mpamvu batazi, kandi ari ryo baboneragaho serivisi z’ubuvuzi bw’ibanze.

Abo baturage bavuga ko kuba iryo vuriro rifunzwe bikomeje kubagiraho ingaruka zikomeye zirimo kurembera mu ngo ababishoboye bakaba bajya kwivuriza kure.

Bemeza ko ubwo Ivuriro ry’Ingoboka rya Kibare ryatangaga serivisi byabafashaga kubona serivisi z’ubuzima hafi no kugabanya umubare w’abarwariraga mu ngo kubera ko ibigo nderabuzima byari kure yabo.

Gusa kuri ubu, bahangayikishijwe no gukora ingendo ndende kugira ngo bagere ku Kigo Nderabuzima cya Mutenderi, bakaba bifuza ko bafashwa rigafungurwa bakivuriza hafi nkuko byahoze.

Rwamurangwa Anastase yagize ati: “Poste de Santé yatangiye gukora twishimira ko tugiye kujya twivuriza hafi none yarafunze. Ntituzi impamvu itagikora kuko tumaze igihe tujya ku Kigo Nderabuzima cya Mutenderi kandi biratugora. Kujya kwivuza ugahabwa ibitaro ni ikibazo kuko kubona ukugemurira biragorana bitewe nuko urugendo ari rurerure, umumotari utamwishyuye 1500 Frw ntiyagutwara.”

Mukeshimana Laurence na we yagize ati: “Nta gisubizo turamenya k’igihe iri vuriro rizongera gukorera kuko rimaze amezi rifunze. Twayobewe impamvu ryakoraga ariko nyuma rikaza gufunga.”

Ibi kandi bishimangirwa na Kamanzi Deogratius, yagize ati: “Kujya ku Kigo Nderabuzima birabangamye kuko dusangayo abarwayi benshi ugasanga biteye ikibazo. Abarwayi baba ari benshi ku buryo bidusaba kujya kwivuza tuzindutse ariko bikarangira dutashye mu gicuku. Badufashijije bafungura ivuriro tukivuriza hafi.”

Umuyobozi w’Akarere ka Ngoma wungirije ushinzwe Iterambere ry’Ubukungu, Mapambano Nyiridandi Cyriaque, yavuze ko ikibazo cyifungwa kiri vuriro ry’ingoboka akizi, asobanura ko byatewe n’ikibazo cy’ubuke bw’abaganga bajyanywe ahandi ariko ko kubufatanye na Ministeri y’Ubuzima hari icyizere cyo kuzazana abandi bidatinze.

Yagize ati: “Twagize ikibazo kijyanye n’umubare muke w’abaganga dufite, mu Karere rero turi gukorana na MINISANTE kuko ni yo iduha abangaga bakora ku bigo nderabuzima hakavamo n’ukora ku mavuriro y’ingoboka. Ubu turi gukorana bya hafi na MINISANTE kugira ngo ibaduhe, nibamara kuboneka turakemura ikibazo mu buryo bwihuse kandi iki kibazo turakizi twarakibonye kugira ngo turebe ko twazamura ibipimo by’ubuvuzi muri kariya gace.”

Ubuyobozi bw’Akarere ka Ngoma butangaza ko mu mwaka w’ingengo y’imari 2022/2023 hari umuhigo wo kubaka amavuriro mato y’ingoboka (Poste de Santé) 15, muri yo 12 akaba yaramaze kuzura atwaye arenga miliyoni 980 Frw.

Izikiri kubakwa zikaba ziri ku rwego rwa kabiri aho zifite umwihariko wo kuvura amaso, gufasha abagore babyara, indwara z’amenyo n’izindi serivisi.

  • NSHIMIYIMANA FAUSTIN
  • Gashyantare 6, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE