Musanze: Uwari umushumba wabaye umubaji arashimira Perezida Kagame

  • NGABOYABAHIZI PROTAIS
  • Mutarama 4, 2024
  • Hashize amezi 5
Image

Yari umushumba uragirira abandi mu Murenge wa Kinigi, Akarere ka Musanze, ahemberwa kwata ku matungo no kugemura amata, ariko ubu ni umubaji nyuma yo kwegerezwa Agakiriro ka Kinigi.

Uwo ni Nsabimana Innocent w’imyaka 30, umwe mu rubyiruko rushimira Perezida wa Repubulika y’u Rwanda Paul Kagame wabukakiye ako Gakiriro kabahinduriye ubuzima kuko bihangiye imirimo ibateza imbere.

Nsabimana avuga ko atari yagera mu gakiriro yahoze ari umushumba atunzwe no kuragira inka z’abaturanyi no kugemura amata mu majerekani ayajyana mu Mujyi wa Musanze.

Agakiriro kageze muri uwo Murenge, Nsabimana yatangiye kuza gukoramo nk’umuyede kugeza ubwo amenya kubaza no gukora ibikorresho binyuranye, akaba yishimira intera amaze kugeraho.

Yagize ati: “Perezida Kagame ni umuntu wo gushimira muri iki gihugu, kuko iyo ataba we ntabwo mba mpagaze gutya. Nirirwaga niruka inyuma y’inka z’abandi, bampembaga nyuma y’umwaka ni yo masezerano twagiranaga.”

Avuga ko abamukoreshaga bamugaburiraga mu gihe cy’umwaka wose bakamuhemba ibihumbi 100 by’amafaranga y’u Rwanda.

Nsabimana akomeza avuga ko nyuma y’imyaka 7 kora umwuga w’ububaji yiteje imbere kuko ubu na we asigaye atanga akazi, agashishikariza urubyiruko kwiga umwuga.

Agakiriro ka Kinigi

Yagize ati: “ Ubu maze imyaka 7 nkora uyu mwuga w’ububaji kuko nanjye ndikorera singikoreshwa, ntanga akazi hano mfite abasore batatu dukorana n’abo nk’abayede, maze kwiyubakira inzu nziza itari munsi ya miliyoni 5, aka kazi ni ko nakuyemo inkwano z’umugore tubana. Mfite abana batatu ndihira mu mashuri meza abanza, urumva ko Kagame muri make asa n’aho yankuye mu mva cyangwa se mu icuraburindi ry’ubukene.”

Ntabwo ari Nsabimana wenyine ushima Perezida Kagame kuko n’uwitwa Munyaziboneye Phocas w’imyaka 21 avuga kubakirwa agakiriro agakiriro muri Kinigi byatumye bajijuka bamenya akamaro k’umwuga

Munyaziboneye na we avuga ko yarangije amashuri atatu yisumbuye ariko ahagarika kwiga nyuma yo gutsindwa ikizamini cya Leta.

Ubuzimabwe bwakurikiwe no gutwara imizigo, kurindwishwa ibirayi bitari byera bikiri mu murima, kuragirira abaturanyi n’ibindi.

Aho agereye mu Gakiriro ubuzima bwe bwarahindutse, ati: “Aho agakiriro kaziye hano rero hari umuturanyi wampaye ikiraka cyo kujya mufasha gusatura imbaho ku mashini, ngera nanjye ubwo mba umubaji. Mu myaka 3 maze hano ubu mfite uruhushya rwo gutwara ibinyabiziga ku rwego rwa B, Kagame yatumye umusore wa hano akura aziko umwuga atari ukwisuma ibirayi no kwibera mu bikuyu.”

Urubyiruko rwo mu Murenge wa Kinigi muri rusange rwari rusanzwe ruzwiho kuyobora no gutwaza ba mukerarugendo imizigo, kuragira inka ziri mu bikuyu byo hafi ya Pariki y’Igihugu y’Ibirunga, kurarira ibirayi n’ibigori mu gihe bitegereje gusarurwa.

Kuva mu mwaka wa 2021, ni bwo bashyikirijwe Agakiriro ka Kinigi, none ubu urubyiiruko rusaga 300 rwabonyemo akazi bigabanya umubare w’abari barabaye indakoreka kubera ubushomeri.

Abavuganye n’Imvaho Nshya, biyemeje ko batazatenguha Umukuru w’Igihugu cy’u Rwanda ndetse ko biteguye kumuhundagazaho amajwi mu matora ateganyijwe mu kwezi kwa Nyakanga 2024.

Munyaziboneye Phocas yamenye ko kwikorera imizigo atari umwuga, ayoboka ububaji
  • NGABOYABAHIZI PROTAIS
  • Mutarama 4, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE