Musanze: G.S Birira bishimira ko imirimo yo kubaka igikoni igeze kuri 90%

  • NGABOYABAHIZI PROTAIS
  • Gashyantare 7, 2024
  • Hashize amezi 4
Image

Abanyeshuri bo ku Rwunge rw’amashuri rwa Birira, riherereye mu Murenge wa Kimonyi, Akarere ka Musanze, bavuga ko bishimira ubuvugizi bagiye bakorerwa none kugeza ubu imirimo yo kububakira igikoni ikaba igeze ku gipimo gishimishije, bakaba bakitezeho ko kizabaruhura imvune yo gukora urugendo rurerure bikoreye ibiryo bishyushye ku mutwe.

Bamwe mu banyeshuri baganiriye n’Imvaho Nshya bavuga ko bishimiye ubuvugizi bakorewe ni ubwo ngo hakiri inzira ndende ngo nibura baruhuke imvune no gutakaza umwanya.

Maniriho Irene ni umwe mu banyeshuri yishimira inzira imaze kugerwaho yagize ati: “Twishimira ubuvugizi itangazamakuru ryadukoreye, ubwo Imvaho mwadusuraga mwiboneye ko ari ikibazo gukomeza kurirana umusozi ibiryo, ariko ubu igikoni rwose mbona bakigeze kure  cyamaze kubakwa, hasigaye gushyiramo za muvero ubundi tukaruhuka urugendo”.

Aba banyeshuri bavuga ko bakora urugendo bajya kuzanira ibiryo bagenzi babo munsi y’umusozi kandi bavuga ko n’ubwo imirimo yo kubaka igikoni igeze ku gipimo cyiza inzira ikiri ndende nk’uko Umutoni Anisie abivuga

Yagize ati: “Ni byo koko itangazamakuru ryatumye ubuyobozi n’izindi nzego bakangukira iki kibazo ariko nanone inzira iracyari ndende, hashize hafi amezi 2 inyubako y’igikoni yuzuye, ariko nanone nta bikoresho birageramo, twifuza ko babyihutisha yaba ari na rwiyemezamirimo wakerereje ibi bikorwa nawe akaba yakurikiranwa”.

Abayobozi basuye G.S Birira barimo Gitifu na Perezida wa Njyanama

Umunyamabanga Nshingwabikorwa w’Umurenge wa  Kimonyi Mukansanga Gaudence wasuye iki kigo  ari kumwe n’inzego zinyuranye ku munsi w’intwari nawe ashimangira koko ko abana bahura n’imvune maze yizeza abarezi n’abanyeshuri baho ko mu minsi mike igikoni kizaba kimaze kujyamo ibyangombwa byose nkenerwa.

Yagize ati: “Ikibazo cyo kuba abana bazamuka umusozi bikoreye ibiryo hano kuri GS Birira kigiye kuba amateka kuko igikoni cyaruzuye hasigaye gushyiramo za mivero gusa, ni ibintu bizakorwa mu gihe gito ngira ngo mwabyiboneye imirimo igeze ku gipimo cya 90%, tugiye gukomeza dukore ubuvugizi”.

Umuyobozi w’iri shuri rya Bilira Mukafeza Solange avuga ko kiriya gikoni kizatuma abana baruhuka imvune yo kujya kuvana ibiryo munsi y’umusozi

Yagize: “Kuba igikoni kigiye kuzuza ibyangombwa ngo gitegurire abana amafunguro ni ibintu twishimiye bizatuma gahunda zo mu burezi zigenda neza kuko hari iminota abana bamariraga mu ngendo bajya kuzanira bagenzi babo ibiryo, iki gikoni kizaba gifite ubushobozi bwo gutegurira indyo abantu 400”.

Umuyobozi w’Akarere ka Musanze Nsengiyumva Claudien avuga ko icyo akarere kakoze kubatse igikoni ibindi bikoresho MINEDUC izabishyiramo

Yagize ati: “Igikoni cy’ishuri rya Birira ni kimwe mu bibazo ubu turimo kwitaho cyane dushingiye ko abana bahura n’imvune bikorera ibiryo babijyana aho barira, kuri ubu rero za muvero ni zo zisigaye kujyamo ngo gitangire gikoreshwe , twaranditse  muri Nzeri 2023 ngo batuzanire ibikenerwa ubwo nibo bazagena agaciro kabyo babihereze rwiyemezamirimo uzabishyiramo ”.

Ikigo cya Birira kuri ubu gifite abanyeshuri basaga 1500 biga mu mashuri abanza n’ayisumbuye.abanyeshuri bo mu muyisumbuye bakaba bakora urugendo rwa metero 600 bajya kuzamura ibiryo ku gikoni kiri ku nyubako zo munsi y’umusozi.

  • NGABOYABAHIZI PROTAIS
  • Gashyantare 7, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE