Musanze: Abarokotse Jenoside bashengurwa no kuba baraburiye ababo mu nzu y’ubutabera

  • NGABOYABAHIZI PROTAIS
  • Mata 17, 2024
  • Hashize ukwezi 1
Image

Ubwo hibukwagwa Abatutsi bazize Jenoside yakorewe Abatutsi mu 1994, baguye ku cyahoze ari Urukiko rw’Ubujurire rwa Ruhengeri (Court d’Appel Ruhengeri) n’abaroshywe mu mugezi wa Mukungwa ku nshuro ya 30, abarokotse bavuga ko babajwe no kuba barazanywe kuri iriya nzu y’ubutabera bazi ko bagiye kuhakirira bakahicirwa.

Umwe mu barokokeye ku cyahoze ari Urukiko rw’Ubujurire rwa Ruhengeri, Umuhoza Brigitte avuga ko yababajwe no kuba barazanywe hariya bizezwa amahoro n’ubuzima ariko bikarangira bahiciwe n’ababo.

Yagize ati: “Twakuwe hirya no hino mu byahoze ari za Komini, Kigombe, Nyarutovu n’ahandi, maze batuzana hano batwizeza ko ngo tugiye kuharindirwa abacanyi, rwose twaje tuhizeye ubuzima, ariko nko mu kigo gitanga ubutabera si ko byagenze, kuko barahatwiciye, rwose twari duhari turi umubare ntazi kuko twari abantu benshi ku buryo utabashaga no kureba hasi ngo urebe ku butaka”.

Uyu mubyeyi mu gihe Jenoside mu 1994 yari mu kigero cy’imyaka 16, avuga ko mu ijoro ryo ku itariki 06 Mata 1994, we n’umuryango we bari bavuye iwabo i Musanze berekeza mu cyari Komini Gatonde (ubu ni mu Karere ka Gakenke), bajya gutaha ubukwe bw’umwe mu bakobwa bo mu muryango wabo wagombaga gushyingirwa, ariko ngo ntibyabahiriye kuko baje kuhabicira abasigaye bizezwa ko babarindira kuri Superefegitura ya Busengo, ariko byarangiye babazanye mu Ruhengeri ku rukiko nk’abaje kuburana, ashengurwa kandi no kuba baraguye imbere y’ibigo bishinzwe umutekano w’abanyagihugu.

Umuhoza Brigitte

Yagize ati: “Hari ikintu ntari niyumvisha neza ni gute abacu natwe ubwacu twiciwe hano kandi ari hafi y’ikigo cy’abajandarume, hano hafi hari ikigo cya gisirikare cya Muhoza, hari gurupoma hepfo hariya, urumva ko twarenganiye ahantu hari hakwiye kuba hari ubuzima ariko twarahabuburiye”.

Uyu mubyeyi akomeza avuga ko yageze ku cyahoze ari Urukiko rw’Ubujurire rwa Ruhengeri aturutse   mu cyahoze ari Komini Nyarutovu, muri Perefegitura ya Ruhengeri ari kumwe n’ababyeyi be ndetse n’abavandimwe be dore ko ngo bari bagiye mu bukwe bw’umugeni nawe waje kwicwa muri iryo joro, indege y’uwahoze ari Umukuru w’Igihugu Habyarimana Juvenal ubwo yahanukaga nyuma y’igihe gito, ariko akavuga ko kugira ngo arokoke n’Imana yabigizemo uruhare ibinyujije mu gikorwa yise ubugiraneza.

Yagize ati: “Nkigera hano kuri Cour d’Appel kuko njye mvuka muri uyu mujyi wa Musanze abo nasanzemo bari bashonje cyane badaheruka kurya, bababaye nta cyizere cyo kubaho bafite, bamwe bo mu muryango wanjye bakamubaza bati “Kuki uje hano nta kintu utuzaniye cyo kurya ni uko nasohotsemo mperekejwe n’umujandarume nawe ibyo yankoreye ni agahomamunwa namwe murabyumva, nakomeje kurorongotana kugeza inkotanyi zigeze hano”.

Uyu mubyeyi kandi akomeza ashimira ingabo zahoze ari iza RPF Inkotanyi zo zabohoye u Rwanda.

Yagize ati: “Hano hari ingabo nyinshi muri 1994, urumva abajandarume, abasirikare, icyo bakoze ni ukutwica ariko RPF Inkotanyi zaraturokoye  ubu turiho dufite icyizere kandi tirimo kwiyubaka ntituzapfa ukundi.”

Guverineri w’Intara y’Amajaruguru Mugabowagahunde we asaba abaturage kurangwa n’ubumwe.

Yagize ati: “Ndabasaba kwirinda ingengabitekerezo ya Jenoside n’andi macakubiri, gupfobya ndetse n’ihakana rya Jenoside, kuko muri   Musanze mu cyumweru cyo kwibuka hagaragaye abafite ingengabitekerezo, tubyiyame kandi tubyirinde, ndabasaba gukomera ku bumwe bwacu kuko twamaze kumenya ko ari zo mbaraga zacu”. Kuri ubu habarurwa abantu basaga 800 bazize Jenoside yakorewe Abatutsi  biciwe muri Cour d’Appel ya Ruhengeri

  • NGABOYABAHIZI PROTAIS
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE