Musanze: Abagore batinya ibise bagahitamo kubagwa baburiwe ko biyegereza urupfu

  • NGABOYABAHIZI PROTAIS
  • Gashyantare 20, 2024
  • Hashize amezi 2
Image

Muri iyi minsi hakomeje kumvikana bamwe mu bagore bahitamo kujya kubagwa iyo igihe cyo kubyara cyegereje babyita ko ari ubusirimu no kwanga kuribwa n’ibise, ariko impuguke mu by’ubuzima zibagira inama yo kubireka kuko bibagiraho ingaruka zikomeye.

Abgore bavuganye n’Imvaho Nshya ku Bitaro Bikuru bya Ruhengeri, bagaragaje uburyo kubagwa biborohereza ubuzima ku buryo iyo babona bakuriwe bajya kwa muganga bagasaba kubagwa mbere y’uko ibise bibafata.

Umwe muri bo wo mu Murenge wa Muhoza, Akarere ka Musanze, yavuze ko we ahitamo kubagwa aho gukomeza kuribwa n’ibise nyuma yo kumva uko byamugendekeye ubwo yabyaraga bwa mbere.

Yagize ati: “Ubundi bwa mbere nabyaye neza ntabazwe, inda yarandiye ku buryo nageze ubwo mvuga ngo sinzongera kubyara. Bagenzi banjye dukorana rero bambwiye ko nta musirimu kuri ubu wize nkanjye ukwiye kujya ku bise imisi ine amasaha 24, banyumvisha ko kubagwa ari byo byiza. Narabikoze banteye ikinya mbona umwana aravutse nyuma yo kumbaga ariko kuri iyi nda ya gatatu barimo kungira inama nahisemo ko ntongera kubagwa none nabyaye neza.”

Uyu mbuyeyi akomeza avuga ko nubwo yihagazeho ubwo yabagwaga, yasanze ari byo bibi kurusha kubyara neza kubera ko utegekwa kubaho imibereho itajyanye n’iy’umubyeyi wabyaye neza.

Yagize ati: “Ibyo umuntu wabazwe arya biba ari bike cyane mu gihe umubyeyi aba afite inzara. Iyo yabazwe rero muganga amusaba kurya ibiryo no kunywa biringaniye kugira ngo adaca indodo, urwara igikomere nyamara ubu nabyaye ibise byanjye byaje neza umwana na we avuka neza ndimo ndarya nkanywa ngahaga ku rugero nshaka, kwibagisha nta busirimu burimo.”

Mukabahizi Elina we ngo bamubwiye ko kubyara bibabaza, akaba ari yo mpamvu yahisemo kubyara abazwe nubwo bimusaba igihe kugira ngo akire indodo.

Yagize ati: “Kubyara bambwiye ko ari urugamba mu gihe umwana arimo gusohoka. Nahisemo kujya mbagwa n’ubu nahoze mvugana na muganga ntarimo kubyumva neza ariko byanga bikunda arambaga kuko ntabwo nabivamo. Gusa nanone bambwiye ko nta muntu ubagwa ishuro 4 ubwo na byo bizatuma ngera ubwo mfungisha urubyaro.

Umuyobozi w’Ibitaro bya Ruhengeri Dr. Muhire Philbert, we avuga ko bamwe mu bagore bakunda kubyara babazwe kubera gutinya ibise nyamara ngo si byiza kuko bigira ingaruka ku buzima bw’umubyeyi.

Yagize ati: “Ikibazo cy’abagore bifuza kubyara babazwe ni kimwe mu bibazo bihangayikishije cyane. Imibare igaragaza ko mu myaka ya za 2012, ababyeyi bajyaga babyara babazwe bari ku gipimo kiri hasi ntabwo bari barenze 12%, ubu imibare tugezeho ni 23%. Ibi rero ni ibyago kuko kuba warabyaye ubazwe bigushyira ku rwego ruri hejuru mu byago byo kuba wagira ikibazo ubyara cyagwa se mu gihe utwite.”

Umuyobozi w’Ibitaro bya Ruhengeri Dr. Muhire Philbert

Dr. Miuhire akomeza avuga ko ababyeyi bagera muri 37% bapfa babyara usanga barigeze kubagwa mu bihe byashize, bityo ibyo ari byago biri hejuru byo kubura ubuzima nubwo imibare y’ababyeyi bapfa babyara yagabanyutse cyane mu Rwanda.

Yagize ati: “Kubyara ubazwe si ngombwa  umuntu ashobora kubyara neza. Yego no kubyara ubazwe si ukutabyara neza, ariko umuntu ashobora kubyara atabazwe kandi akabyara umwana na we akabaho. Gutinya ibise yenda hari ababitinya impamvu akenshi aba ari iyo ngiyo cyangwa se akavuga ngo inzira bizafata nkurikiranwa natangiye ibise kuzageza mbyara hashobora kubamo ikibazo. Ariko no mu kubyara hashobora kubamo ikibazo ndetse no kubagwa bwa kabiri hashobora kubamo ikibazo”.

Dr Muhire akomeza avuga ko kubagwa bishyira umubyeyi mu bibazo byinshi cyane iyo yongeye gutwita, birimo no kuba baturika nyababyeyi.

Yagize ati: “Abenshi hari ubwo baba baranabazwe kandi 85.4% bagera mu mavuriro batangiye ibise kandi barabazweho. Kugira ibise rero warabazweho noneho ukabigirira ahantu hatari mu Kigo cy’Ubuvuzi  bigushyira ku rwego ruri hejuru rwo kuba wagira ikibazo  kuri iyi nda wagiriyeho ibise.”

Yongeyeho ati: “Twe dukora kwa muganga turabizi ababyeyi tugira hano bagaturika nyababyeyi, biba ari ikibazo gikomeye cyane mu kubavura usanga abenshi baba barabazweho. Ni yo mpamvu tubakangurira kubyara batabazwe mu gihe abaganga babona ko nta mpamvu yo kubyara babazwe.”

Niyonkuru Mathieu, Umukozi w’Umushinga witwa USAID Tubeho mu Ntara y’Iburengerazuba n’Amajyaruguru, na we yashimangiye ko kuva mu mwaka wa 2000 kugeza mu 2020 abagore y’abagore babyaye babazwe yikubye inshuro 8.

Ati: “Abantu bavuye kuri 2% bagera kuri 18.5% by’abaza kubagwa.  Mu by’ukuri iyo umugore atwite muganga ntabwo afata icyemezo cyo kuba yamuteruramo umwana adafite ibyo ashingiyeho. Icyo dushishikariza abaganga ni ukujya bababaga umugore ukwiye kubagwa koko, kuko iyo umugore umubaze uba umushyize mu kiciro cy’abazahura n’akaga ko gupfa babyara.

Ibitaro bya Ruhengeri bigaragaza ko byakira ababyeyi bari hagati ya 570 na 600 baba baje kuhabyarira, aho  hagati ya 47% na 50% babyara babazwe baba baturutse mu bigo nderabuzima bigaragara ko bakwiye kubagwa.

Ni mu gihe abasaba kubyara babazwe kubera gutinya ibise batarenga 10%.

  • NGABOYABAHIZI PROTAIS
  • Gashyantare 20, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE