Muri Rwanda Rushya hitwaga ku Kabatwa barashimira Perezida Kagame

  • NGABOYABAHIZI PROTAIS
  • Ukuboza 24, 2023
  • Hashize amezi 2
Image

Isantere ya Rwanda Rushya, iherereye mu Kagari ka Nyamiyaga, mu Murenge wa Shingiro Akarere ka Musanze, barashimira Perezida wa Repubulika Paul Kagame wabateje imbere akabaha gutura heza n’umutekano.

Iyi santere yaje guhindura izina ikitwa Rwanda Rushya yahoze yitwa ku Kabatwa, ahantu harangwaga n’inzu za nyakatsi mbere y’umwaka wa 1994.

Wasangaga uretse inzu zo guturamo n’utubare twabaga twubatse mu buryo bwa nyakatsi. Kuba rero haravuguruwe byatumye haba hashya mu buryo bugaragarira amaso, ari na ho bahera bashimira Perezida Kagame.

Sinzabaheza Jean Damascene yagize ati: “Aha hantu mubona kuva muri za 1985 hari za nyakatsi gusa ku buryo buri gihe nko mu bihe by’izuba hahoraga hashya inzu. Mbese hari ahantu wavuga ko ari mu ishyamba kandi ni byo urabona ko duturiye ibirunga. Kuva rero aho Kagame ari kumwe n’ingabo zahoze ari iza FPR Inkotanyi bahagarikiye Jenoside yakorewe Abatutsi mu 1994, aha hantu ni bwo hageze inzu y’amabati, duhita tuhita Rwanda Rushya kuko uko twabayeho twari tuzi ko tutari Abanyarwanda  ahari.”

Uwingabire Alice yabwiye Imvaho Nshya ko abatuye muri Rwanda Rushya bajyaga babona amatara mu Mujyi wa Musanze bakabona ari ibitangaza ari na yo mpamvu bumvaga basa nk’abari mu Rwanda rwabo.

Yagize ati: “Twarebaga amatara mu Mujyi wa Musanze tukumva ari mu kindi gihugu. Nawe se abantu twiberaga mu nzu z’ibyatsi kubona Peteroli ari ugukora urugendo, twumvaga ko tutari Abanyarwanda. Kagame rero adukoreye imihanda hano, atuzanira amazi, amashanyarazi, twumva ko aduhaye u Rwanda rushya kuko twari tumaze gusezerera ibishaje. Perezida yarakoze kuko twari twaribagiranye tubaho nk’inyamaswa”.

Kuri ubu isantere ya Rwanda Rushya irangwamo ibikorwa binyuranye by’iterambere kubera umuriro w’amashanyarazi wahageze, bakora inzugi n’amadirishya binyuze mu gusudira.

Hari amabarizo aho bikorera ibikoresho by’ububaji ku buryo ngo batacyirirwa bajya gushaka ibikoresho byo kubaka mu  Mujyi wa Musanze kubera ko bafite amaduka abicuruza, iyi santere ngo ikaba inatahwamo imodoka ebyiri.

Ikindi bishimira ni umuhanda unyura muri iyi santere Perezida Kagame yabubakiye mu rwego rwo kuborohereza imigenderanire. Kuri ubu na ba mukerarugendo bicara muri iyi santere bagiye gusura ibirunga bakabasigira  ku madovize.

Abo muri Rwanda Rushya bavuga ko bazakomeza gusigasira ibyo bagenda bageraho, kandi ko bishimiye kuzongera gutora neza mu matora yo mu mwaka wa 2024.

Isantere ya Rwanda Rushya kuri ubu ituwe n’abasaga 200, kandi ikorerwamo imirimo myinshi ku buryo n’abakoreramo imirimo ya buri munsi basaga 500.  Abo barimo abacuruzi n’abanyabukorikori, bakaba bishimira umutekano bafite kuri ubu cyane ko muri kariya gace kari karabaye indiri y’Abacengezi mu myaka igera kuri 15 ishize.

  • NGABOYABAHIZI PROTAIS
  • Ukuboza 24, 2023
  • Hashize amezi 2
TANGA IGITEKEREZO
Nzayinganyiki vedaste says:
Ukuboza 24, 2023 at 6:07 pm

Isantere ya rwandarushya iri mu mudugudu was nyamiyaga ,akagari ka mudende ,umurenge was shingiro ,akarere ka musanze . Gusa mur iyi centre bibaye byixa hanyuzwamo umuhanda wa kaburimbo kuk uriya mwabonye ni mwiza ark ibiciro byo kuwukoresha cyane cyane nko gutega moto kuk Ari zo zibineka usanga bihenze cynn

Andika igitekerezo

AMATEGEKO AGENGA IYANDIKA RY'IGITEKEREZO CYAWE