Muhanga: Urukiko Rwisumbuye rwanze inzitizi mu bujurire bw’abaregwa gusenya urukuta

  • AKIMANA JEAN DE DIEU
  • Werurwe 20, 2024
  • Hashize ibyumweru 3
Image

Urukiko Rwisumbuye rwa Muhanga ruherereye mu Murenge wa Nyamabuye, mu Kagali ka Gitarama mu Mudugudu wa Kavumu rwatesheje agaciro ubusabe bw’abantu 9 ku nzitizi bagaragarije urukiko zo kuba bafunzwe binyuranyije n’amategeko ku byaha bakurikiranyweho.

Kuri uyu wa Gatatu tariki ya 20 Werurwe 2024, Urukiko Rwisumbuye rwafashe umwanzuro wo gutesha agaciro inzitizi zagaragajwe n’abaregwaga n’ababunganira ko impamvu batanze zidakwiye kuba urwitwazo rwabafasha kurekurwa bakaburana bari hanze rufata umwanzuro wo gutesha agaciro ubusabe bwabo.

Ibyo byaha birimo icyaha cyo gusenya cyangwa konona inyubako y’undi ku bushake utari nyirayo ndetse n’ubufatanyacyaha mu gusenya cyangwa konona inyubako y’undi ku bushake utari nyirayo.

Hasenywe urukuta rwa Metero 100 rwari rwubakishije amatafari ya Ruliba mu Karere ka Kamonyi.

Ni nyuma y’uko mu iburana ryabaye tariki ya 13 Werurwe 2024 ku bujurire bwatanzwe n’abaregwa bahamijwe ibyaha n’Urukiko rw’Ibanze rwa Gacurabwenge, abunganizi barimo Me Zitoni Pierre Claver na Me Christophe Niyomugabo bavugaga ko inteko ikwiye kuburanisha aba bantu mu bujurire bari hanze ku byaha bakurikiranyweho byo gusenya cyangwa konona inyubako y’undi ku bushake utari nyirayo n’ubufatanyacyaha bukurikiranyweho abantu 7.

 Me Niyomugabo yagize ati: “Tugendeye ku ngingo ebyiri ziri mu itegeko No 027/2019 ryo ku wa 19/09/2019 ryerekeye imiburanishirize y’Imanza z’Inshinjabyaha mu ngingo ya 143 ivuga ku ifungwa rinyuranyije n’amategeko ndetse n’ingingo ya 188 ivuga ku nkurikizi z’ubujurire, turifuza ko abakiliya bacu barekurwa duhereye kuri izi ngingo kuko bigaragara ko abo twunganira bafunzwe mu buryo bunyuranyije n’amategeko tugasaba urukiko kubarekura bakaburana ubujirire bwabo bari hanze.”

Abaregwa bari bajuririye icyemezo cyafashwe n’Urukiko rw’Ibanze rwa Gacurabwenge rubaha ibihano birimo igihano cyo gufungwa imyaka 5 n’ihazabu y’amafaranga kuri Mutangana Eric na Mukakarangwa Lea.

Maniraguha Damien, Masengesho Leonard, Mukashyaka Jacqueline, Nambazimana Charles, Nsanzimana Pierre, Ntakirutimana Aloys, Niyomugabo Xavier bahanirwa ubufatanyacyaha bahanishwa gufungwa imyaka 5 no gutanga ihazabu ya miliyoni 3 z’amafaranga y’u Rwanda kuri buri wese.

Bose uko ari 9 kandi bari bategetswe ko bagomba gutanga indishyi za miliyoni 5,9 zikomoka ku rukuta rwasenywe.

Hakimara kugaragazwa inzitizi z’ababurana n’ababunganira ku ya 13 Werurwe 2024, Inteko iburanisha uru rubanza yahise yiha iminsi 5 yo kwiga kuri izo nzitizi z’abakurikiranyweho icyaha bafungiwe mu Igororero rya Nyamagabe n’Igororero rya Muhanga.

Uyu munsi tariki ya 20 Werurwe 2024, Urukiko rwatesheje agaciro izo nzitizi, hafatwa umwanzuro ko abajuririoye inzitizi bazaburana tariki ya 12 Mata 2024 saa tatu.

  • AKIMANA JEAN DE DIEU
  • Werurwe 20, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE