Muhanga: Umushinga w’abagore wahindutse uruganda rwinjiza hafi miliyari 1 Frw

  • AKIMANA JEAN DE DIEU
  • Ukuboza 1, 2023
  • Hashize amezi 6
Image

Imyaka igiye kugera kuri 20, icyari igitekerezo cy’abagore bibumbiye mu Ihuriro ry’abagore COCOF (Conseil Consultatif des Femmes rihinga soya rikanayitunganyamo inyama (Tofu), gishibutsemo uruganda rutunganya umusaruro wa soya rwinjiza miliyoni zisaga 980 z’amafaranga y’u Rwanda.

COCOF yari Umuryango wari ushyize imbere iterambere ry’abagore n’abakobwa watangiye mu mwaka wa 2004 igera mu 2014 ubwo yahindukaga uruganda rutunganya ibikomoka ku binyamisogwe rwitwa MFP (Muhanga Food Processing) rukorera mu Kagari ka Ruli, Umurenge wa Shyogwe.

Koperative yahindutse uruganda nyuma y’aho abo bagore bahisemo gushaka abashoramari bubaka uruganda maze bo bakaruguramo imigabane.

Urwo ruganda rwatangiye rwinjiza nibura miliyoni 24 z’amafaranga y’u Rwanda, rukaba rwari rufite ubushobozi bwo gukora toni imwe ku munsi, ariko ubu rugeze ku bushobozi bwo gutunganya toni zirenga 10 ku munsi.

Ni uruganda rutunganya Tofu, ifu igezweho ya soya aho hejuru y’umusaruro wabo bawugemura mu Ngo Mbonezamikurire y’Abana bato (ECDs) mu bice bitandukanye by’Igihugu, ndetse bafite n’umushinga wo kuyitunganyamo amata nubwo kuri ubu abonwa gusa n’abakeneye ayo guhita banywa.

Bamwe mu banyamigabe muri urwo ruganda, baravuga ko batangiye ibikorwa byabo badaharanira inyungu bakaba bageze ku rwego rwo gushora imari itubutse na bo ikabungukira amafaranga abafasha kwiteza imbere.

Ndabibonye Alphonse avuga ko yatangiye ari umukozi aza kugurisha ihene 8 yari yoroye atanga imigabane maze amafaranga yashoye aramugarukira yubaka inzu nziza yo kubamo igendanye n’igihe.

Yagize ati: “Ahagana muri 2014 ni bwo nabaye umukozi w’uru ruganda ndetse amafaranga nakoraraga ntangira kuyizigama nguramo ihene ziroroka ziba 8 ndazigurisha maze amafaranga nkuyemo ndayashora nguramo imigabane itangira kunyungukira kandi buri mwaka hari amafaranga yinjira kuri konti yanjye akunganirwa n’umushahara mpembwa”.

Nibagwire Gaudence avuga ko yatangiye akorana na COCOF ari umuryango washinzwe udaharanira inyungu ugamijwe guteza imbere abagore n’abakobwa.

Yemeza ko kuva yatanga imigabane muri uru ruganda yamaze kwiteza imbere bigaragara akaba ntawe ategereza ko amufasha.

Yagize ati: “Njyewe natangiranye na COCOF mu mwaka wa 2004 ukaba wari umuryango washinzwe ugamije guha agaciro abagore n’abakibwa ariko ugatunganya igihingwa cya soya biza guhinduka dukoramo ikigo cy’ishoramari duhereye ku bikoresho twari dufite ndetse tunatanga amafaranga. Ariko ubuzima bwarahindutse cyane kuko mu mafaranga mbona ku migabane yanjye nyishuramo amafaranga y’ishuri kandi ntabwo abakozi bakorera hano bakidandabirana bafite ubuzima bwiza.”

Akomeza avuga ko iri shoramari rishingiye mu kugura imigabane batangiye kuritoza ababakomokaho kuko bigaragara ko byabahaye izindi ngufu zishingiye ku ifaranga kubera kwishyira hamwe n’abandi byabahaye umusaruro.

Umuyobozi Mukuru w’Uruganda Rwa Muhanga Food Processing, Nzayisenga Desire, yashimye abagore batangije uyu mushinga bashaka guteza imbere umugore n’umukobwa no guha agaciro igihingwa cya soya.

Yagize ati: “Uruganda rwatangiranye ingufu nkeya mu mwaka wa 2004 rutangizwa n’abagore bishyize hamwe kugira ngo bihe agaciro ariko bahe agaciro igihingwa cya soya kuko bakoragamo inyama za “Tofu” ndetse n’amata yayo”.

Umwe mu bashoye imari muri uyu mushinga w’abagore, yavuze ko kuva mu mwaka 2014 ari umunyamuryango yaguze imodoka ya miliyoni  10 ndetse anubaka inzu ifite agaciro ka miliyoni 30 z’amafaranga y’u Rwanda, bitewe n’imigabane afitemo.

Yagize ati: “Bivuzeko nibura muri iyi myaka ninjije amafaranga y’u Rwanda asaga miliyoni 35 kubera iri shoramari, kandi ndumva nshaka kuzanatangira abana banjye imigabane mbatoze gushora imari”.

Ubuyobozi bw’Uruganda MPF bvuga ko bafite intumbero yo kugura imashini zigezweho zongera umusaruro w’ibyo bakora, birimo iyo fu ya soya, Tofu, amajyane ya soya n’ibindi bitandukanye.

Akomeza avuga ko bafite uruganda rugenda rukura kuko bahereye ku bakozi 4 gusa bakaba bageze ku 107 harimo abakora nka nyakabyizi 94, mu gihe 13 ari bo bakozi bahoraho na bo bavuye kuri 4 batangiranye.

Bifuza no kurushaho kwagura ibikorwa bazana ibiduruzwa bishya ku isoko, ndetse umushinga uhari ni uwo gushaka aho bakorera harushijeho kwisanzura.

  • AKIMANA JEAN DE DIEU
  • Ukuboza 1, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE