Muhanga: Kabera yakatiwe gufungwa by’agateganyo iminsi 30

  • AKIMANA JEAN DE DIEU
  • Gashyantare 9, 2024
  • Hashize ibyumweru 3
Image

Urukiko rw’Ibanze rwa Nyamabuye ruherereye mu Kagali ka Gitarama, Umurenge wa Nyamabuye mu Karere ka Muhanga rwasomeye mu ruhame urubanza ruregwamo Kabera Vedaste, wari umuyobozi w’Ishami ry’Imiyoborere myiza ku Ntara y’Amajyepfo ko akomeza gufungwa iminsi 30 kubera impamvu zikomeye zo gutanga indonke ku wundi muntu kugira ngo adakora ikiri mu nshingano ze.

Rwemeje ko impungenge z’ubushinjacyaha zifite ishingiro bityo Kabera Vedaste akomeza gukurikiranwa afunzwe mu gihe cy’iminsi 30 y’agateganyo kugira ngo dosiye ifatirwe umwanzuro.

Ni urubanza rwaburanishijwe ku ifungwa n’ifungurwa ku itariki 6 Mutarama 2024 ku ku ngoro y’Ubutabera y’uru rukiko rukaba rwasomwe kuri uyu wa 09 Gashyantare 2024.

Mu iburanwa ry’uru rubanza Kabera Vedaste yabwiye urukiko ko amafaranga ibihumbi 10 yoherereje umugenzacyaha wari umaze kumubaza ku bibazo byo guhoza ku nkeke umugore we babana mu rugo.

Ubushinjacyaha bwamusabiraga gufungwa by’agateganyo kubera icyaha cyo gutanga indonke akurikiranyweho kikaba kiri mu byaha by’ubugome.

Bukanongeraho ko uyu mugabo Kabera wari Umuyobozi w’Imiyoborere myiza ku Ntara y’Amajyepfo ibyo yakoze byose yari abizi kuko mu nshingano ze harimo no kurwanya ruswa no gukemura ibibazo by’abaturage, bityo bamurekuye ashobora kwica iperereza cyangwa agacika ubutabera.

Me Joseph Mico Twagirayezu yasabaga urukiko ko Kabera yarekurwa agahabwa ibyo agomba kubahiriza bityo akaba yakurikiranwa ari hanze.

Me Joseph Mico Twagirayezu avuga ko bitamushimije ndetse agiye kuganira n’umukiliya we bakareba icyo bakora gishobora no kuba bajuririra iki cyemezo cyafashwe n’urukiko.

Urukiko rwibukije ko utishimiye iki cyemezo agomba kujurira mu minsi 5.

Kabera Vedaste yakatiwe gufungwa by’agateganyo iminsi 30
  • AKIMANA JEAN DE DIEU
  • Gashyantare 9, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE