Muhanga: imyaka y’abaturage ibangamiwe n’abogereza ibinyabiziga mu gishanga

  • AKIMANA JEAN DE DIEU
  • Gashyantare 12, 2024
  • Hashize amezi 4
Image

Bamwe mu baturage batewe impungenge n’abafite ibinyabiziga birimo imodoka z’amakamyo, amagare, ipikipiki n’imodoka ntoya zikomeje kogerezwa mu gishanga kiri hagati ya Nyabisindu na Ruvumera mu Murenge wa Nyamabuye, kuko amavuta yivanga n’amazi, bavomerera imyaka yabo ikuma.

Mu kiganiro bahaye Imvaho Nshya bemeza ko ubuyobozi bukwiye kubahagurikira hagasigasirwa ibi binyabuzima byibera mu bishanga no kwirinda ko abahinzi bahagirira igihombo ku byo bahinga muri iki gishanga.

Munyampenda Sylvain avuga ko hashize igihe aba bantu bogereza Moto mu gishanga kandi nta muntu ubegera ngo ababuze ahubwo bagahombywa no kuyavomereza ibyo bahinze bikuma.

Ati: “Hashize umwaka urenga aba bantu bogereza muri iki gishanga kiri hagati ya Nyabisindu na Ruvumera kandi banangiza umuhanda kubera amazi, ariko hakiyongeraho ko nta buryo bwo kubungabunga ibidukikije buhari amazi bogesheje ahita amanuka mu mugezi twayavomereza imbuto duhinga zigahita zuma cyangwa zikaraba”.

Ndayisaba Parfait avuga ko bibabaje kubona abantu bakora ibinamba bitandukanye harimo ikiri ahazwi nko kuri Fagiti.

Bogereza imodoka mu muhanda bikawangiza amazi arimo isabune n’amavuta bikamanukira mu gishanga

Yagize ati: “Ni byo hano mu mujyi tugira ibinamba bizwi kandi byoza imodoka ariko iki kinamba kiti muri iki gishanga ahahoze ibarizo hazwi nko kuri Fagiti ndetse n’inyuma y’Ishuri ry’abakobwa biga siyansi rya Al Makhtoum/ Nyabisindu ahazwi nko ku Gitaribani bogerezamo imodoka z’amakamyo n’ibindi binyabiziga”.

Hakizimana Jean Claude avuga ko iyo boza hari ibivuta bijya mu mazi kandi agakoreshwa havomererwa ibyahinzwe mu gishanga ndetse ayo mazi akaba anafatirwa mu mugezi agatunganywa n’uruganda rwa Gihuma akoherezwa mu mujyi wa Muhanga.

Ati: “Turasaba ubuyobozi bwacu kubikurikirana kuko izi modoka zihogerezwa ziba zifite amavuta menshi kandi aya amazi ni nayo uruganda rwa Gihuma ruduha abayanywa bavuga ko bahora barwaye inkorora idakira bagakeka ko binakomoka kuri aya mazi bafatira kuri iki gishanga kandi n’ibindi bishanga ni ko bimeze”.

Umuyobozi w’Akarere ka Muhanga, Kayitare Jacqueline avuga koahakorerwa imirimo yo koza ibinyabiziga hagomba kuba hazwi, kandi hujuje ibisabwa n’amategeko yo kurengera ibidukikije.

Yagize ati: “Ubusanzwe ahakorerwa imirimo yo koza ibinyabiziga (Ibinamba) hagomba kuba hakorera kandi bizwi ariko hakaba hanakurikiza amategeko agenga kurengera ibidukikije iyo bidakozwe gutyo ababikora banyuranya n’itegeko kandi birahanirwa”.

Akomeza avuga ko abakora ibinyuranyije na byo iyi bigaragaye barakurikiranwa   bagahanwa kandi tuzakomeza kubarwanya kugirango turengere ibidukikije.

Ikigo cy’Igihugu cyo kubungabunga ibidukikije mu Rwanda (REMA) giherutse gutangariza Imvaho Nshya ko ingingo ya 3 y’Itegeko n°48/2018 ryo ku wa 13/08/2018 rigenga ibidukikije irebana n’ihame ryo kurinda rifasha gukumira cyangwa kugabanya ingaruka mbi ku bidukikije ivuga ko Ibikorwa bigaragayeho cyangwa bikekwaho kuba byagira ingaruka mbi ku bidukikije ntibigomba gutangira mu gihe inyigo za gihanga zitaragaragaza ko nta kibazo byateza ku bidukikije’.

  • AKIMANA JEAN DE DIEU
  • Gashyantare 12, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE