Muhanga: Barishimira ko begerejwe serivisi z’amaso ku bitaro bya Nyabikenke

  • AKIMANA JEAN DE DIEU
  • Werurwe 13, 2024
  • Hashize ukwezi 1
Image

Bamwe mu baturage bajyaga bagana ibitaro by’amaso bya Kabgayi barishimira ko izi serivisi zagejejwe ku bitaro bya Nyabikenke, bityo bakoroherwa n’urugendo rw’ibilometero 42,5 bakoraga.

Mu kiganiro bahaye Imvaho Nshya bavuga ko bajyaga bakora urugendo rurerure rubasaba gutanga amafaranga y’Urugendo agera ku bihumbi 10 kugenda no kugaruka.

Mukansanga Leonie yabwiye Imvaho Nshya ko yishimye cyane kuko byari kumusaba kujya kwivuriza i Kabgayi agashimira Perezida wa Repubuli ka wabahaye ibitaro byiza.

Yagize ati: “Sinabona amagambo mbivugamo kuko ndishimye cyane kuko bamfashije nkaba nivurije kuri ibi bitaro byiza twahawe n’Umukuru w’Igihugu cyacu Paul Kagame ubu iyo bataduha ibi bitaro nagombaga kujya i Kabgayi kandi biragoranye ahantu utegesha amafaranga arenga ibihumbi 8000 (8000frw) rimwe na rimwe ugasanga muganga ntumubonye bikazagusaba kuzongera gusubirayo kugira ngo uvurwe”.

Mugengamanzi Silas avuga ko ibi bitaro byabavunnye amaguru bibarinda umuhanda mubi uva i Kiyumba werekeza i Kabgayi no kuba wajya kwivuza kure yaho utuye bikaba ngombwa ko wanararayo.

Yagize ati: “Turishimye cyane kuko batwegereje ibi bitaro bikaba byaratuvunnye amaguru kuko hari n’ababaga bafite gahunda yo kujya gufata imiti y’indwara zidakira basigaye bafatira imiti hafi hano ku bitaro twiherewe n’ubuyobozi bwacu”.

Harelimana Jean Nepomuscene avuga ko ubuyobozi bukwiye kubongera abaganga kuko hari igihe abarwayi baba benshi bakavura abarariranye.

Ati: “Turavurwa nta kibazo ariko baduhe abaganga benshi kuko hari igihe usanga twabaye benshi bakabanza kuvura abarariranye abandi bagataha. Bongere umubare w’abaganga kuko umuganga umwe ntabwo ahagije babirebeho.”

Umuyobozi Mukuru w’Ibitaro bya Nyabikenke, Dr Nkikabahizi Fulgence avuga ko hagiye gushira ukwezi iyi serivisi ikora kuko habanje ibikorwa byo gushyiramo ibikoresho mu cyumweru cya 3 cy’ukwezi kwa Gashyantare no kumenyereza umukozi.

Yagize ati: “Tumaze hafi ukwezi dukora kuko twabanje gushyiramo ibikoresho aho bigomba gushyirwa, ndetse dushaka umukozi uhembwa ku mafaranga y’ibitaro kuko ntabwo turahabwa umukozi uhoraho turanamuhugura ariko hari benshi bazaruhuka urugendo bakoraga bajya kwivuza ku bitaro by’amaso bya Kabgayi.”

Akomeza yemeza ko mu minsi bamaze batangije iyi serivisi hamaze kuvurwa abarwayi bagera kuri 62 basabye serivisi kandi bazihawe uko bigomba nuko bisabwa, ariko ntabwo baraba benshi twifuza kwakira benshi kurushaho ku buryo abo mu gice cya Ndiza harimo Imirenge yegereye aho dukorera batugana, gusa iyo tubonye umurwayi ikibazo gikomeye tucyohereza ku bitaro bya Kabgayi kugira ngo bafashirizweyo.

Kugeza ubu ibitaro bya Nyabikenke nyuma y’imyaka 2 bitangiye gukora, bitanga serivisi z’ububyaza no kwita ku bana bavukanye ibibazo, kuvura abataha ndetse n’abashyirwa mu bitaro, ubuvuzi bw’amenyo n’ubw’amaso.

  • AKIMANA JEAN DE DIEU
  • Werurwe 13, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE