Muhanga: Abaturage bishimira ibikorwa bagejejweho n’Impeshakurama

  • AKIMANA JEAN DE DIEU
  • Werurwe 25, 2024
  • Hashize ibyumweru 4
Image

Abaturage babashije guhindura ubuzima babikesha ibikorwa bagejejweho n’Itorero ry’abaganga bo mu Karere ka Muhanga rizwi nk’Impeshakurama.

Bashima ko abagize iryo torero bitanga bikiyongera ku nshingano bafiteyo kuvura, bakanagira uruhare rwo kwita ku bababaye bakennye kurusha abandi.

Mukamfizi Adoratha ni umuturage wo mu Murenge wa Rugendabali avuga ko ashimira abo baganga bamuhaye inka atarabitekerezaga akavuga ko azoroza abandi nimara kubyara.

Yagize at: “Turashimira aba baganga bacu kuko baradufasha cyane haba aho bavurira ku kigo nderabuzima ariko banongeyeho kutwegera benshi mu bataragiraga amata barayaduha baduha inka kandi ku bwanjye nabafatiyeho urugero nk’uko bayimpaye ntayo nguze nanjye niyororoka nzitura abandi kuko uru ni urugero rwiza baduhaye.”

Amagi afasha imiryango guhangana n’imirire mibi

Murekatete Isabelle avuga ko ibi bikorwa by’Impeshakurama byamuhaye intege zo kumva ko adakwiye kwiheba ahubwo agakoresha ubufasha bamuhaye bakamuha ubwisungane mu kwivuza ku muryango we w’abana 7 arera.

Ati: “Ndi umukene kuko ntacyo mfite naheraho kugira ngo mbone Mituweli z’abantu 8 ingunga imwe, ariko abaganga bambereye Malayika ntazi aho aturutse baramfasha ntabwo narinzi aho nzakura amafaranga twarwaraga tugahita twigurira utunini twa magendu tukivura”.

Karekezi Jean Réne avuga ko mu minsi ishize umuryango we wari wugarijwe n’imirire mibi kugera aho abana be b’inkurikirane barwara indwara z’imirire mibi baramufasha yigishwa uko bakwiye kubafata nuko babagaburira barakira.

Ati: “Kugeza ubu turishimye cyane kuko ubusanzwe abaganga twabasangaga ku mavuriro ariko basigaye banafata umwanya bakaza aho dutuye kutwigisha. Nkanjye nahugijwe n’akazi abana banjye b’inkurikirane barwara indwara z’imirire mibi, barwara bwaki baraje baratwigisha uko twajya dutegura indyo yuzuye bongeraho no kuduha inkoko zitera amagi yafasha abana kubona indyo ikungahaye ku ntungamubiri barakira mu gihe gito, turabashimira cyane.”

Impeshakurama zivuga ko buri mwaka ziyemeza ibikorwa biciye mu mihigo.

Muhire Claude ni umuyobozi mu ivuriro ryigenga rizwi nka Clinic La Providence rikorera mu mujyi wa Muhanga, avuga ko uko imyaka igenda abafite amavuriro ndetse n’abayakoramo bose bashyize hamwe kugira ngo bagire uruhare mu guhindura imibereho y’abaturage.

Ati: “Mu byo duteganya buri mwaka harimo no kwegera abakiliya bacu kandi twebwe nk’amavuriro yaba aya Leta n’ay’abikorera duhuriza hamwe ubushobozi kugira ngo dufashe abaturage bababaye kurusha abandi bave mu mibereho mibi akenshi usanga iterwa n’imyumvire n’ubumenyi biri hasi.”

Umuyobozi w’abatorejwe mu Itorero ry’Impeshakurama bo mu Karere ka Muhanga, Dusengimana Ezella ukora ku bitaro bya Kabgayi, avuga ko itorero biyemeje kuba umusemburo w’impinduka ku baturage babagana ndetse no gukora ubukangurambaga ku ndwara zidakira n’izivurwa zigakira.

Yagize ati: “Iri torero ryacu tubarizwamo ryatojwe mu 2016 habanje abagiye gutorezwa i Gabiro nabo baraza batoza abari basigaye twiyumvisemo amaboko yo gutangira gukora ibikorwa bitandukanye, byagira impinduka ku baturage batugana baje kwivuza indwara bo bakwiye kwirinda.

Twongeraho no kugira ubukangurambaga nibura rimwe mu gihembwe, dufata icyumweru cy’ubuzima tukegera abaturage aho batuye, tukabaganiriza ku byo bakwiye kugiramo uruhare bakagabanya ingendo zijya kwa muganga kwivuza.”

Umuyobozi w’Akarere ka Muhanga Kayitare Jacqueline, yabwiye Imvaho Nshya ko abaganga batorejwe mu itorero ry’Impeshakurama bakwiye gushimirwa kuko bamaze igihe barahisemo kuvura ababagana no kubaha serivisi nziza, bakanagira ibikorwa bindi bihindura imibereho y’abaturage.

Yagize ati: “Aba baganga bakwiye gushimirwa kuko ni umutwe w’intore ugaragaza ko wasize indi yose, uhereye kuri serivisi babaha mu gihe barwaye bagiye kwivuza, ariko baranahindukira bagakusanya amafaranga bakadufasha mu bikorwa bitandukanye byo guhindurira ubuzima imwe mu miryango.”

Izo ntore zatorejwe mu mitwe yindi itandukanye bakwiye kwigira kuri aba ndetse ibikorwa byabo bakabimurika kuko na bo barakora ariko ntabwo babasha kwerekana ibyo bakora.

Mu myaka 7 ishize hamaze gukoreshwa amafaranga y’u Rwanda asaga miliyoni 32 mu bikorwa bitandukanye byo guhindura ubuzima bw’abaturage harimo ibikorwa byo gufasha abaturage guhabwa amacumbi, inka, amagi n’inkoko ku miryango ifite abana bafite imirire mibi n’ingo mbonezamirire zigahabwa bimwe mu byo zikenera, isaso ku miryango itarifite, amata no kwishyurira abaturage ubwisungane mu kwivuza ku batabufite n’ibindi.

  • AKIMANA JEAN DE DIEU
  • Werurwe 25, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE