Muhanga: Abaturage basabwa kugira isuku ntibagire urwitwazo ibura ry’amazi

  • AKIMANA JEAN DE DIEU
  • Gashyantare 24, 2024
  • Hashize amezi 2
Image

Abaturage batuye mu mujyi wa Muhanga bavuga ko kuba ahantu hahurira abantu benshi nta mazi ahari bibateje impungenge zo kwandura indwara, batabigira urwitwazo kuko amazi atabura igihe cyose, ahubwo bagirwa inama yo kuyabika kuko adahora yabuze..

Bamwe mu baturage babashije kuvugana n’Imvaho Nshya bemeza ko ahahoze ubukarabiro mu gihe cya COVID-19 haba ahahurira abantu benshi ku masoko no ku nzu z’ubuyobozii usanga nta mazi abamo, bakavuga ko bashobora kwibasirwa n’indwara ziterwa n’umwanda.

Umulisa Janviere avuga ko akorera mu isoko rya Kijyambere rya Muhanga yemeje ko ahantu hose hari ubukarabiro budakoreshwa usanga nta mazi ahari.

Yagize ati: “Njyewe nsanzwe nkorera ku isoko rya Kijyambere rya Muhanga ariko ahantu hose haba ubukarabiro ntabwo bukoreshwa ndetse no ku maduka habaga za kandagira ukarabe ndetse abantu bakibutswa gukaraba ariko byarahagaze ubona abantu batabyitaho.”

Mugenzi Xavier avuga ko ubuyobozi bigaragara ko bwadohotse akemeza ko hakwiye izindi ntege ariko akongeraho ko ishami rya Muhanga rishinzwe isuku n’isukura rikwiye kujya ritanga amazi kuko ahenshi no kuba nta mazi ahari nabyo bitiza umurindi abadakaraba.

Yagize ati: “Ni byo biragaragara ko abantu twadohotse nubwo igihugu kitari mu bihe bidasanzwe ariko uyu mujyi wa Muhanga unafite ikibazo cy’amazi, kuko ahari twakaraba kandi tukanibutswa kuko hari aho usanga ubukarabiro bwarumye nta mazi wabonamo”.

Umuyobozi w’Ishami rya Muhanga rishinzwe Isuku n’Isukura (WASAC) Muligo Jean Claude, avuga ko ikibazo cy’amazi mu mujyi kidakanganye, ahubwo ikibazo cy’ubukarabiro kidakwiye gutera inkeke kukoabantu babufite bakwiye kujya babika amazi kugira ngo mu gihe babuze amazi bakoreshe ayo bafatiye mu bigega.

Yagize ati: “Ni byo koko dufite ibibazo by’amazi ariko ntabwo twavuga ko adasaranganywa abafatabuguzi bacu ariko ahantu hari ubukarabiro hari abafite ibigega bakwiye kuyabikamo, mu gihe batayafite bagakoresha ayo babitse mu bigega kugera igihe baboneye andi mazi, ntabwo bakwiye kwitwaza ko amazi ntayahari kandi bafite ibigega byajyamo amazi yabafasha kunoza isuku”.

Aha ni ku i Fatima ahari ibigega bigaburira amazi umujyi wa Muhanga, kandi amazi si ikibazo giteye inkeke

Umuyobozi Mukuru w’Ibitaro bya Kabgayi, Dr Jean Baptsiste Muvunyi avuga ko abantu bakwiye kugerageza gukomeza kugira isuku, atari ahahurira abantu benshi gusa, kuko no mu buzima busanzwe isuku igomba kuba umuco. Nubwo igihugu kitari mu bihe bidasanzwe ariko abantu bakwiye gukaraba kuko byafasha kwirinda indwara zikomoka ku mwanda.

Umuyobozi w’Itsinda ry’Abasenateri bo muri Komisiyo y’Imibereho Myiza y’Abaturage n’uburenganzira bwa Muntu, Dr Cyprien Niyomugabo yavuze ko abantu bakwiye kongera kugira umuco wo gukaraba bakirinda ibyorezo bishobora kwaduka bikomotse ku mwanda.

Ati: “Ntabwo dukwiye kwifata nkaho indwara z’ibyorezo twazitsinze abantu bakwiye kugira umuco wo kongera gukaraba ,kuko hari indwara nyinshi zakwaduka ziturutse ku mwanda abantu nibabyibuke kandi banabitoze abato kugira ngo mu gihe indwara z’ibyorezo zaza tube dufite ubumenyi bwo kuzirinda”.

Akomeza avuga ko abantu bakwiye kwirinda kurushaho, bakumva ko ibyorezo byaterwa n’umwanda bigihari nta  kwirara kuko no mu nsengero usanga abantu bahoberana kandi hari abantu barwaye inkorora zikomeye abantu bakwanduzanya ku buryo bisaba ko abantu barushaho kwirinda.

Nubwo abatuye umujyi wa Muhanga biyongera, uruganda rutunganya amazi rukomeje gushaka ibisubizo
  • AKIMANA JEAN DE DIEU
  • Gashyantare 24, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE