Mugisha Bonheur yatangajwe nk’umukinnyi mushya wa Stade Tunisien

Mugisha Bonheur ukina mu kibuga hagati yugarira wakiniraga AS Marsa, yatangajwe nk’Umukinnyi mushya wa Stade Tunisien asinya amasezerano imyaka itatu.

Kuri uyu wa Mbere tariki 2 Nzeri 2024, ni bwo iyi kipe yamutangaje nk’umukinnyi mushya wayo ibinyujije ku mbuga nkoranyambaga zayo.

Mugisha yari maze iminsi atandukanye na Avenir Sportif de La Marsa isanzwe ikina Shampiyona y’Icyiciro cya Mbere muri Tunisia yagezemo muri Nzeri 2023 avuye muri Al Ahli Tripoli na yo muri Shampiyona ya Libya yagezemo atandukanye na APR FC.

Stade Tunisien yashinzwe mu 1948, ifite ibikombe bine bya shampiyona n’ibikombe 7 by’igikombe cy’Igihugu, harimo icyo yatwaye muri uyu mwaka itsinze Bizertin 2-0.

Iyi kipe iri mu ijonjora rya kabiri rya CAF Confederation Cup aho izahura na USM Alger yo muri Algeria.

Mugisha Bonheur abaye Umunyarwanda wa kabiri ugiye gukina muri iyi kipe nyuma ya Nshuti Innocent wayikiniye mu 2018 avuye muri APR FC.