Mu itangazamakuru hashobora gucamo ruswa- MINALOC

  • KAMALIZA AGNES
  • Ukuboza 6, 2023
  • Hashize amezi 3
Image

Minisiteri y’Ubutegetsi bw’Igihugu (MINALOC) irasaba abakora umwuga w’itangazamakuru kuba maso kuko muri uwo mwuga hashobora kubamo icyuho cya ruswa gishobora kwigaragaza mu buryo butandukanye.

Minisitiri w’Ubutegetsi bw’Igihugu Musabyimana Jean Claude yabikomojeho ku wa Kabiri, ubwo yatangizaga ku mugaragaro Umunsi wahariwe imiryango itari iya Leta mu kurwanya ruswa.

Avuga ko kwima umuntu serivisi wagombaga kumuha biha icyuho ruswa bityo no mu itanganzamakuru hashobora gucamo ruswa. Yaboneyeho gusaba abanyamakuru gukumira ko ruswa yagaragara mu mikorere yabo.

Ati: “Mu itangazamakuru hari igihe ruswa ishobora kunyuramo, kuko hari ushobora kuza ati vuga ibi utagombaga kuvuga, ukagenda ukabivuga kuko hari akantu agiye kuguha cyangwa ugasanga arakubwiye ngo mvugira kanaka. Mudufashe rero kugira ngo dukumire.”

Yakomeje agira ati: “Gukumira no kurwanya ruswa ni inshingano duhuriyeho twese nk’Abanyarwanda ndetse n’abafatanyabikorwa bari muri iki gihugu.”

Bamwe mu banyamakuru bemeza ko hari bagenzi babo basaba ruswa bitwaje ibibazo bafite, bagakora inkuru zibogamye, bakanahishira amakosa baba babonye, bigatuma bagoreka amakuru maze abakwiye kurenganurwa ntibakorerwe ubuvugizi.

Bamwe mu baganiriye n’Imvaho Nshya bavuga ko bene nkabo bagenda bashaka amakosa ya bimwe mu bigo ndetse n’abikorera, nyuma yo kuyamenya bagasaba ruswa ngo batayatangaza cyangwa na ba nyiri ibyo bigo bagahitamo guha ruswa abanyamakuru ngo baceceke.

Bashima Leta ko ikomeza gushyira imbaraga mu gukurikirana abatanga n’abasaba ruswa kuko bimunga ubukungu bw’Igihugu.

Umunyamakuru witwa Nzabandora Theogene ati: “Hari abanyamakuru bakora inkuru zibogamye ntibavugire abo bagomba kuvugira, ugasanga bamwe bagiye bashaka amakuru yiganjemo amakosa batagamije gukora ubuvugizi, ahubwo ari ukubera inda mbi zabo zabananiye bagamije kwisabira ruswa.”

Yongeyeho ko umunyamakuru nyawe adakwiye kwitandukanya n’umwuga, kandi ko abenshi bitwaza ubukene kandi mu by’ukuri ari ingeso.

Ati: “Gusaba ruswa nukuri ntibikwiye, ntanubwo umuntu usaba ruswa aba akunda Igihugu, kuko ahari abonye n’uko akigurisha yabikora.”

Bamwe mu banyamakuru barasaba bagenzi babo kwitonda kuko hari abagerageza kubagusha mu cyaha cya ruswa, by’umwihariko igihe barimo gukora inkuru zicukumbuye zigaragaza ibitagenda bishobora gushyira inyungu za bamwe mu kaga.

U Rwanda rwihaye intego ko mu mwaka wa 2050 ruzaba ruri ku mwanya wa mbere ku Isi mu kurwanya no gukumira ruswa; kugeza ubu ruri ku mwanya wa 54 ku manota 51%.

Mu igazeti ya Leta ku byaha n’ibihano bya ruswa, ingingo ya 4 ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Ibihano bivugwa mu gika cya 2 cy’iyi ngingo ni na byo bihabwa umuntu wese utanga cyangwa usezeranya gutanga, mu buryo ubwo ari bwo bwose, indonke iyo ari yo yose, kuri we cyangwa ku wundi muntu kugira ngo hatangwe cyangwa hadatangwa serivisi.

Iyo ibikorwa bivugwa mu gika cya mbere n’icya 3 by’iyi ngingo byakozwe kugira ngo hakorwe ikinyuranyije n’amategeko, igihano kiba igifungo kirenze imyaka irindwi ariko kitarenze imyaka icumi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse, yakiriye cyangwa yatanze.

  • KAMALIZA AGNES
  • Ukuboza 6, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE