Mu 2023, ruswa yaragabanyutse igera kuri 22% mu Rwanda 

  • ZIGAMA THEONESTE
  • Ukuboza 7, 2023
  • Hashize amezi 3
Image

Ubushakashatsi bushya bugaragaza ko igipimo cya ruswa ntoya mu Rwanda (RBI) bukorwa babaza abaturage uko babona ibyuho bya ruswa mu  Rwanda, bwagaragaje  ko yagabanyutse iva kuri 29.1% mu  2022, igera kuri 22% mu 2023.

Ubwo bushakashatsi bwashyizwe ahagaragara kuri uyu wa Kane tariki ya 7 Ukuboza 2023.

Umuvunyi Mukuru Nirere Madeleine, yavuze ko ingamba zashyizweho mu kurwanya ruswa zikiriho ari na yo mpamvu igenda igabanyuka mu Rwanda.

Yagize ati: “Ubu ikigero cyagabunyutse kuri 22% biraterwa n’ingamba nyinshi zashyizweho, mu gukoresha ikoranabuhanga haba mu nkiko haba mu kazi. Ubu uyu munsi hari gahunda yitwa byikorere kandi n’ubukangurambaga bwarazamutse aho nk’Urwego rw’Umuvunyi twashyizemo imbaraga mu kwigisha abanyeshuri.”

Yakomeje agira ati: “Ndetse ubu mu bikorera hashyizweho Komite zo kurwanya ruswa. Ni ingamba zihari mu bigo zireba cyane aho hatangirwa serivisi, muri za banki n’ahandi. Twumva rero ko mu gihe izi Komite zamaze gukora neza, cyane cyane mu mitangire ya serivisi ni ho haba hari imvano ya ruswa, bizatanga umusaruro mu kuyirwanya.”

Madamu Nirere yakanguriye inzego zose gutanga serivisi mu mucyo birinda ruswa.

Nubwo ruswa nto yagabanyutse mu 2023,  TI Rwanda igaragaza ko urwego rw’abikorera ari rwo ruza imbere y’izindi nzego Rwanda mu kugaragaza ibyuho bya ruswa aho ruri ku ijanisha rya 15.60%.

Abakoresha baratungwa agatoki mu kuba ibyuho bya ruswa mu nzego z’abikorera.

Umuyobozi Nshingwabikorwa TI RWANDA, Mupiganyi Appolinaire yagaragaje ko urwego rw’abikorera, impamvu ruza ku mwanya wa mbere ari uko bamwe mu bayobozi bikubira byose ugasanga bibaye ibyuho bya ruswa.

Yagize ati : “Urwego rw’abikorera ruri mu nzego zifite intege nke mu kurwanya ruswa, mu kugendera ku mategeko umukoresha abikora uko abibonye, usanga rero muri bya bigo bito byose ari we ukora byose byaba gucunga imari byose, gushaka abakozi mu gutanga amasoko usanga hazamo ruswa.”

Mu nzego zigaragaramo ruswa (RBI) igaragaza ko  Urwego rw’Igihugu rushinzwe  inzego zimwe  z’imirimo ifitiye igihugu akamaro (RURA) ruza ku mwanya wa kabiri na 13.80%, mu gihe Polisi  y’igihugu yo ikurikiraho na 11.02%.

TI-Rwanda yemeza ko abaturage bavuga ko bahuye na ruswa babarirwa mu miliyoni 6 z’Abanyarwanda bari mu kigero cyo gutanga cyangwa kwakira ruswa.  Muri aba abarenga miliyoni imwe ni bo bagize aho bahurira na ruswa.

TI Rwanda ivuga ko inzego zikwiye kumanuka zigakomeza gucukumbura ahari ibyuho bya ruswa kugira ngo ihashywe burundu.

Mupiganyi Applonaire, Umuyobozi Nshingwabikorwa wa TI-Rwanda, avuga ko umuco wo gutanga amakuru na wo ukiri hasi kubera ko abantu banga kwiteranya ndetse no kuba inzego zishinzwe kurwanya ruswa hamwe na hamwe zitarinda uwatanze amakuru.

Yagize ati: “Ni uwa muco wo kutiteranya ariko nanone ugasanga abo bashinzwe kurwanya ruswa  cyangwa kwakira ibyo bibazo rimwe na rimwe ntibahaye uburinzi cyangwa se ubwirinzi  uwo mutangamakuru yakagombye guhabwa nk’umuntu uje atanga amakuru yubaka igihugu.”

Umuryango TI Rwanda wanasabye ko itegeko ryo gutanga amakuru ryasakazwa hose kugira ngo abaturage batanga amakuru bumve ko kuyatanga ari uburyo bwizewe bwo kubaka igihugu.

  • ZIGAMA THEONESTE
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE