MIGEPROF: Umuryango ni wo shingiro ry’ubukungu bw’igihugu ubungabungwe

  • NYIRANEZA JUDITH
  • Ukuboza 13, 2023
  • Hashize amezi 6
Image

Mu Karere ka Gisagara kuri uyu wa Gatatu tariki ya 13 Ukuboza 2023, habereye ibiganiro byagarutse ku ruhare rw’Inzego z’ibanze mu kwimakaza ihame ry’Uburinganire no kurwanya ihohoterwa rishingiye ku gitsina, Umunyamabanga Uhoraho muri Minisiteri y’Uburinganire n’Iterambere ry’Umuryango MIGEPROF Mireille Batamuliza yibutsa ko Umuryango ari wo shingiro ry’ubukungu bw’Igihugu, ukwiye kurindwa ihohotera.

Uyu munsi ku wa 13 Ukuboza 2023, mu karere ka Gisagara habereye ibiganiro bigaruka ku ruhare rw’Inzego z’ibanze mu kwimakaza ihame ry’Uburinganire no kurwanya ihohoterwa rishingiye ku gitsina. Ibi biganiro byateguwe na GMO, Intara y’Amajyepfo n’Akarere ka Gisagara.

Umunyamabanga Uhoraho Batamuliza yagize ati: “Umuryango ni wo shingiro ry’ubukungu bw’igihugu. Abayobozi murasabwa kuwubungabunga, kuwufasha mu gutera imbere no kuwurinda ihohoterwa iryo ari ryo ryose”. 

Umugenzuzi Mukuru w’Urwego rw’Igihugu rushinzwe iyubahirizwa ry’ihame ry’Uburinganire n’Ubwuzuzanye bw’Abagore n’Abagabo GMO, Umutoni Nadine yashimye Intara y’Amajyepfo mu ishyirwaho ry’Umudugudu ntangarugero muri buri karere mu kwimakaza ihame ry’uburinganire no gukumira ihohoterwa rishingiye ku gitsina. Yasabye abayobozi kuba intangarugero mu kubaka umuryango uzira amakimbirane.

Mu kiganiro cyatanzwe n’ Umugenzuzi Mukuru wungirije mu rwego rw’Igihugu rushinzwe iyubahirizwa ry’Uburinganire n’Ubwuzuzanye, Mukandasira Caritas, cyagarutse ku kwimakaza ihame ry’uburinganire na serivisi zihabwa abakorewe ihohoterwa cyitabiriwe n’ubuyobozi bw’Akarere, abafatanyabikorwa, abayobozi mu Nzego z’ibanze ndetse n’umuyobozi wa RIB mu karere.

Umuyobozi w’ishami ry’Ubushakashatsi mu Rwego rw’Igihugu rw’Imiyoborere Dr Felicien Usengumukiza yatanze ikiganiro kigaruka ku ishusho y’umuryango  mu Karere ka Gisagagara mu myaka itandatu ishinze, uko ihohoterwa rishingiye ku gitsina rihagaze ndetse n’uko abaturage babona serivisi bahabwa.

Abayobozi b’Inzego z’ibanze bitabiriye ibi biganiro bagize umwanya wo kungurana ibitekerezo, ingamba ndetse n’imbogamizi zibangamira iyubahirizwa ry’ihame ry’Uburinganire no kurwanya ihohoterwa rishingiye ku gitsina.

Biyemeje kubaka umuryango uzira ihohoterwa n’amakimbirane.

Ibiganiro byabaye umwanya mwiza wo gushimira abayobozi b’imidugudu babaye indashikirwa mu kwesa umuhigo wo kugira inka ku kigero cyo hejuru aho bawesheje ijana ku ijana. Buri muyobozi w’Umudugudu wahize abandi yahawe ibihumbi ijana by’amafaranga y’u Rwanda.

Hifashishijwe umukino mbarankuru, hagaragajwe imwe mu migirire mibi y’ihohotera rishingiye ku gitsina ikigaragara mu muryango nyarwanda.

Nyuma yo kungurana ibitekerezo, hafashwe ingamba zinyuranye zo kuyihashya kuko yimika amakimbirane mu miryango, ikanaheza abantu mu bukene.

Umufatanyabikorwa Umuragedrama yakinnye umukino ugaruka ku ruhare rw’Inzego z’ibanze mu kurwanya ihohoterwa rishingiye ku gitsina, gukemura amakimbirane mu miryango, kubahiriza gahunda za Leta no kubazwa inshingano mu gihe yatandukiriye mu nshingano ze za buri munsi.

Asoza ibi biganiro, Guverineri w’Intara y’Amajyepfo Kayitesi Alice, yasabye abayobozi b’Inzego z’ibanze mu Karere ka Gisagara gushyira umuturage ku isonga ndetse no kubaka umuryango utekanye kandi ushoboye.

Yasabye by’umwihariko ko imyumvire mibi abantu batekereza ku ihame ry’uburinganire nk’ubwigaranzure bw’umugore ku mugabo yahinduka, kugira ngo habeho koko iterambere ry’umuryango mu buryo bwuzuye.

Guverineri Kayitesi kandi yasabye abayobozi ku byiciro byose kuba ku isonga mu kurwanya ihohotera rishingiye ku gitsina, kudaceceka cyangwa ngo bahishire ikibazo cy’abangavu baterwa inda z’imburagihe, kubikangurira abaturage n’abayoboke, kandi haherewe mu miryango no gukumira kurusha guhangana n’ibyabaye.

  • NYIRANEZA JUDITH
  • Ukuboza 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE