M23 ni Abanyekongo? Ikibazo Perezida Kagame yabajije Tshisekedi akabyemera

  • NTAWITONDA JEAN CLAUDE
  • Mutarama 23, 2024
  • Hashize amezi 4
Image

“U Rwanda ntirwigeze mu buryo ubwo ari bwo bwose, rurema iyi intambara iri kubera muri Congo.”

Uko ni ukuri Perezida wa Repubulika Paul Kagame yashimangiye mu Nama y’Igihugu y’Umushyikirano, mbere yo gusubiramo ikiganiro yigeze kugirana n’abayobozi barimo Perezida wa Repubulika Iharanira Demokarasi ya Congo Felix Antoine Tshisekedi.

Icyo kiganiro cyabaye ubwo inyeshyamba za M23 zari zongeye kubyutsa umutwe nyuma y’imyaka igera ku 10 zari zimaze zitataniye mu bihugu bitandukanye.

Perezida Kagame yashatse kugira ngo afashe abayobozi bari mu Nama kumva umuzi w’ikibazo, biba ngombwa ko ahata ibibazo Perezida Tshisekedi no kugaragaza icyihishe inyuma y’umugambi wo guhiga Abanyekongo bo mu bwoko bw’Abatutsi bagasiga gakondo yabo.

Perezida Kagame yavuze ko, imbere y’abandi bayobozi batandukanye bari mu nama, yabajije ikibazo cya mbere Tshisekedi, agira ati: “Naramubajije ngo mbese aba bantu bari muri M23 ni Abanyekongo cyangwa si bo? Icyo gihe yarambwiye ati, cyane rwose! Abo ni Abanyekongo.”

Perezdia Tshisekedi yakomeje ashyeshyenga ko kuba M23 ari Abanyekongo adahwema kubigaragaza yeruye ko ari Abanyekongo.

Hanyuma yakomeje avuga ko atahwemye kubivuga yeruye ko adahwema kugaragaza ko ari ikibazo cy’Abanyekongo.

Perezida yakomeje agira ati: “Naramubajije nti none icyo kiba ikibazo cyacu gute? Ni gute kiba ikibazo cy’u Rwanda? Narongeye ndamubaza ngira nti “Itsinda ryatangije iyi ntambara, waba uzi aho ryaturutse? Mu by’ukuri mbere y’uko asubiza, Perezida w’Igihugu cy’aho bavuye ni we wabyivugiye.”

Uwo muyobozi w’ikindi gihugu cy’abaturanyi na we yemeje ko inyeshyamba zateye ziturutse mu gihugu cye kubera ko bari barambiwe gukomeza guhezwa ishyanga bashaka gusubira kuri gakondo yabo.

Perezida Kagame yakomeje agira ati: “Nanone nongeye kumubaza, ngira nti, none ni gute ukomeza guhuza u Rwanda n’iki kibazo? Ndongera ndamubaza nti kubera iki mu minsi ishize warashe ibisasu ku butaka bwacu?

Naravuze nti kubera iki, ni iki ushaka ko abo Nanyekongo bahava? Yaravuze ati, ibi, urabona bakwiye gusubira iyo bavuye, ndamubaza none se bazasubira hehe?…”

Perezida Kagame yasobanuye uburyo Guverinoma ya RDC ishinja u Rwanda kuba ishyigikiye umutwe wa M23  ishingiye ku myumvire y’uko Abanyekongo bo mu Bwoko bw’Abatutsi bakwiye gusunikwa bakajya mu Rwanda, byitwa ko ari ho iwabo.

Yavuze ko u Rwanda rucumbiye Abanyekongo bakabakaba 100,000 ndetse no muri Uganda hakaba harahungiye abandi barenga 400,000 bose bakaba biganjemo abahunze itsembabwoko ribakorerwa.

Mu mwaka wa 2012, ni bwo umutwe wa M23 wavutse bwa mbere, ariko nyuma yo gutsindwa abari bawurimo bahungira mu bihugu by’abaturanyi.

Perezida Kagame ageza ijambo ku bihumbi by’abitabiriye Inama y’Igihugu y’Umushyikirano

Perezida Kagame yavuze ko icyo gihe uwo mutwe watsindwaga abawugize bahungiye mu bihugu by’abaturanyi, u Rwanda ruhungiramo abarwanyi bari hagati ya 500 na 600 n’intwaro zabo.

Perezida Kagame yagize ati: “ Icyo twakoze twabashyize mu nkambi yo muri Ngoma, kandi twabambuye intwaro maze tuzihereza Guverinoma ya Kinshasa. Ibyo barabizi ntibashobora no kubihakana.”

Icyo gihe Guverinoma ya Congo yatumije abari abayobozi ba M23 maze babacumbikira muri hoteli amezi atanu nta n’umwe uraza guhura na bo, kugeza ubwo batashye amaramasa kandi bari bijejwe ko icyo kibazo kigiye gukemurwa mu buryo bwa Politiki.  

Bashinja u Rwanda gufasha M23, bakarenza ingohe Congo ifasha FDLR

Perezida Kagame yavuze ko kugeza uyu munsi atariyumvisha uburyo imiryango mpuzamahanga yifatanya na RDC mu gushinja u Rwanda ko rutera inkunga M23, bakirengagiza ko RDC na yo ifasha umutwe wa FDLR washinzwe n’abasize bakoze Jenoside yakorewe Abatutsi mu myaka 30 ishize.

Ati: “Ushobora kubahuza natwe (M23), ushobora kudushinja ibyo wiboneye byose. None ni iki uvuga kuri FDLR iri mu Burasirazuba bwa Repubulika Iharanira Demokarasi ya Congo (RDC), imyaka igera kuri 30?”

Perezida Kagame yakomoje no ku ngabo zoherejwe mu Butumwa bw’Umuryango w’Abibumbye bwo kugarura amahoro mu Burasirazuba bwa RDC (MONUSCO), ashimangira ko izo ngabo zahamaze imyaka 25 ariko kugeza iyi myaka ikibazo cya FDLR bari baje gukemura cyakomeje kugumaho kugeza uyu munsi.

Leta ya Congo na yo yabanje kwizigiza ko nta FDLR ikiba ku butaka bw’icyo gihugu ariko u Rwanda ruyibutsa amazina yabo, aho bacumbitse n’aho bashinze za bariyeri basoresherezaho.

Perezida Kagame ati: “ Ahubwo hari ubwo nabwiye Perezida wa DRC, none ntuzi ko aba bantu bari muri ibi bice? Ahubwo bakaba banahashyira za bariyeri bagasoresha? Yabanje kwiraza inyanza, ariko arabyibuka.”

Perezida Tshisekedi akigera muri Congo yatangiye gukora ubukangurambaga bwo gusunika inyeshyamba za M23 zikagera mu Rwanda ndetse n’uyu munsoi ngo ni yo ntego bafite.

Perezida Kagame yagize ati: “Iyo bigeze ku kurinda iki gihugu  cyababaye igihe kinini ariko ntihagire uza kugitabara, nta ruhushya nkeneye ku wo ari we wese kugira ngo nkore ibyo dukwiriye gukora kugira ngo twirinde.”

  • NTAWITONDA JEAN CLAUDE
  • Mutarama 23, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE