Liverpool yegukanye Premier League 20

Liverpool yanyagiye Tottenham Hotspurs ibitego 5-1 yegukana Igikombe cya Shampiyona y’u Bwongereza (Premier League) ku nshuro ya 20.

Ni mu mukino w’Umunsi wa 34 Shampiyona y’u Bwongereza wabaye ku Cyumweru, tariki 27 Mata 2025 kuri Anfield Stadium.

Iyi kipe yagiye gukinwa uyu mukino isabwa kuganya ikegukana igikombe nyuma yaho Arsenal bari bahanganye inganyije na Crystal Palace hagati muri iki cyumweru.

Liverpool yabanjwe igitego cyatsinzwe na Dominic Solanke ku munota wa 12. nyuma y’iminota ine gusa Luis Díaz ahita acyishyura mbere y’uko Alexis Mac Allister na Cody Gakpo bashyiramo ibindi igice cya mbere kitararangira.

Mu cya kabiri, Mohamed Salah yakomeje kongera umubare w’ibitego ashyiramo icya kane, kikaba icya 28 yari yinjije muri uyu mwaka w’imikino, gituma akomeza kuyobora abafite byinshi. 

Ku munota wa 69 myugariro wa Tottenham Hotspur, Destiny Udogie, yitsinze igitego cya gatanu. 

Umukino warangiye Liverpool FC itsinze Tottenham Hotspur ibitego 5-1, ihita yegukana Igikombe cya Shampiyona y’u Bwongereza. 

Ni igikombe cya 20 mu mateka yayo ikaba yabinganyije na Manchester United nk’amakipe amaze kubitwara inshuro nyinshi.

Liverpool yegukanye igikombe cya shampiyona ifite amanota 82 irusha Arsenal ya kabiri amanota 15 mu gihe habura imikino ine ngo umwaka w’imikino wa 2024/25 urangire. 

Biteganyijwe ko iki gikombe Liverpool yegukanye izagishyikirizwa tariki ya 25 Gicurasi, ubwo izaba yahuye na Crystal Palace, dore ko ari bwo izaba yakiriye umukino wa nyuma muri uyu mwaka.

Igikombe cya Shampiyona y’u Bwongereza yaherukaga kugitwara mu mwaka w’imikino wa 2019/20, aho yasoje ifite amanota 99 ikurikiwe na Manchester City ifite 81.

Amakipe atatu ya nyuma yamanutse mu Cyiciro cya Kabiri ni Ipswich, Leicester City na Southampton.