Leta yahagurukiye igihombo cy’abanyeshuri batandikisha ibihangano byabo

  • NGABOYABAHIZI PROTAIS
  • Gashyantare 7, 2024
  • Hashize ibyumweru 4
Image

Bamwe mu banyeshuri bo mu mashuri makuru na Kaminuza, bavuga ko kutamenya amakuru bituma batandikisha ibihangano byabo bikaba bibakururira ibihombo by’igihe kirekire.

Bavuga ko kundandikisha ibihangano byabo nk’umutungo mu by’ubwenge, bituma abandi babyiyitirira muri iki gihe Isi yahindutse nk’umudugudu, ba nyirabyo babihanze bagataha amaramasa.

Irasubiza Louange umwe muri abo banyeshuri biga muri imwe muri kaminuza zo mu Rwanda, avuga ko abatabasha kwandikisha ibihangano byabo akenshi babiterwa n’amikoro make hakiyongeraho no kuba babibiteho amakuru adahagije.

Yagize ati: “Nta makuru dufite ngo tube twakwandikisha ibihangano byacu, tubura abaduha amakuru asesuye tukumva ko ari ibintu bisaba inzira ndende. Icyo gihe rero iyo bigenze gutyo urinumira, nkanjye nanze gushyira igihangano cyanjye hanze kugira ngo batacyiba kuko bahita bacyiyitirira bahereye nyine ku mbaraga nkeya zifatiye ku bukene.”

Ngabonziza Elie wiga mu bijyanye n’ikoranabuhanga we avuga ko kwandikisha igihangano bizanira inyungu nyiracyo.

Akomeza agaragaza ko bamaze umwaka bandikishije porogaramu ya mudasobwa

Yagize ati: “Twebwe icyo twakoze ni uko twandikishije igihangano cyacu, kandi byatumye twigirira icyizere kuko nta muntu wahangara ngo yiyitirire igihangano cyawe kuko iyo umaze kucyandikisha uba ugishinganye.”

Twinamatsiko yavuze ko kwandikisha ibihangano ari ingirakamro

Akomeza yemeza ko bakoze ibisabwa byose na byo bidahenze none mu gihe cy’umwaka igaragaza uko abakozi bagera ku kazi ku masaha cyangwa se abanyeshuri bitabirira amasomo.

Ati: “Abayikoresha rero bamaze kutwishyura asaga miliyoni ebyiri, nta mpamvu yo kuvumbura igihangano cyawe ngo uterere iyo, ni ngombwa kucyandikisha.”

Mu gukemura iki kibazo aho usanga ibihangano by’abantu byibwa n’abandi, Minisiteri y’Ikoranabuhanga no guhanga Ibishya (MINICT) ifatanyije n’Urwego rw’Igihugu rw’Iterambere (RDB) ikomeje ubukangurambaga muri za kaminuza n’amashuri makuru.

Umukozi mu Ishami rishinzwe gukurikirana mu biro by’Umwanditsi Mukuru muri RDB, Twinamatsiko Claine, avuga ko ariya ari amahirwe ku rubyiruko rushishikarizwa gutangira kurinda imishinga n’ibihangano byabo kugira ngo hatazagira ababyiyitirira.

Yagize ati: “Twasanze ahenshi urubyiruko rukora ubuvumbuzi ariko ugasanga ntabwo bahaye agaciro ubwo buvumbuzi akoze, we akabibona ko ari ikintu giciriritse. Aho bamwe bajya mu marushanwa yatsindira nka miliyoni 5 bikaba bigarukiye aho ugasanga rero hari ubwenge bwinshi n’ubuhanga bwinshi birimo gutakara, icyo gihe rero ibyo bitekerezo bibaye bisigasiwe byageza kure  ba nyira byo bagatera imbere.”

Uyu mukozi akomeza avuga ko kwandikisha icyo wavumbuye mu Rwanda byororoshye, aho usabwa amafaranga atarenze ibihumbi 30 y’ibirango by’ubucuruzi.

Umutungo bwite mu by’ubwenge wandikishwa ni ibihangano by’ingeri zose, ibikoresho n’ibikorerwa mu nganda n’amazina yabyo,amazina y’imishinga n’amasosiyete.

Ngabonziza avuga ko kwandikisha ibihangano bizana inyungu
  • NGABOYABAHIZI PROTAIS
  • Gashyantare 7, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE